zindabaad ai watan

zindābād ai vatan zindābād ai vatan

tujh se ābād hai zindagī kā chaman

tere uttar himāla tirā pāsbāñ

tere dakhkhin meñ hai hind-sāgar ravāñ

tere pūrab meñ hai desh bañgla javāñ

tere pachchhim buhaira-arab nigahbāñ

terī dhartī pe bahtī rahī gang-o-jaman

zindābād ai vatan zindābād ai vatan

tere sāñche meñ gautam sā insāñ Dhalā

terī dhartī pe nānak bhī paidā huā

terī āġhosh meñ murlī vaalā palā

tere gulshan meñ islām phūlā-phalā

tere pahlū meñ sab hī rahe haiñ magan

zindābād ai vatan zindābād ai vatan

tujh pe bahutoñ ne aa kar hukūmat bhī kī

saikḌoñ ne bilā-vaj.h nafrat bhī kī

kuchh to vo the jinhoñ ne sharārat bhī kī

haiñ karoḌoñ jinhoñ ne mohabbat bhī kī

tujh pe qurbān kyūñkar na ho jān-o-tan

zindābād ai vatan zindābād ai vatan

tū bhagat singh kī āñkhoñ kā taarā banā

Tiipū sultān kā tū dulārā banā

bose kā har qadam par sahārā banā

tū mohammad alī kā bhī pyārā banā

jaan dī par kisī ne na toḌā vachan

zindābād ai vatan zindābād ai vatan

god lenā sadā terī riitī rahī

panj-shīl aaj tak terī niitī rahī

tujh se sachchā.ī duniyā meñ jiitī rahī

tujh se nāgin sadā duudh piitī rahī

tujh se sīkhā ahinsā kā sab ne chalan

zindābād ai vatan zindābād ai vatan

tujh pe gāñdhī javāhar ne rakkhī nazar

terī 'hasrat' 'tilak' ne sadā lī ḳhabar

jaan de ke hue tujh pe lākhoñ amar

indarā ne sañvārā thā tujh ko magar

sab ne mil kar banāyā hai tujh ko dulhan

zindābād ai vatan zindābād ai vatan

zindabaad ai watan zindabaad ai watan

tujh se aabaad hai zindagi ka chaman

tere uttar himala tera pasban

tere dakhkhin mein hai hind-sagar rawan

tere purab mein hai desh bangla jawan

tere pachchhim buhaira-arab nigahban

teri dharti pe bahti rahi gang-o-jaman

zindabaad ai watan zindabaad ai watan

tere sanche mein gautam sa insan Dhala

teri dharti pe nanak bhi paida hua

teri aaghosh mein murli wala pala

tere gulshan mein islam phula-phala

tere pahlu mein sab hi rahe hain magan

zindabaad ai watan zindabaad ai watan

tujh pe bahuton ne aa kar hukumat bhi ki

saikDon ne bila-wajh nafrat bhi ki

kuchh to wo the jinhon ne shararat bhi ki

hain karoDon jinhon ne mohabbat bhi ki

tujh pe qurban kyunkar na ho jaan-o-tan

zindabaad ai watan zindabaad ai watan

tu bhagat singh ki aankhon ka tara bana

Tipu sultan ka tu dulara bana

bose ka har qadam par sahaara bana

tu mohammad ali ka bhi pyara bana

jaan di par kisi ne na toDa wachan

zindabaad ai watan zindabaad ai watan

god lena sada teri riti rahi

panj-shil aaj tak teri niti rahi

tujh se sachchai duniya mein jiti rahi

tujh se nagin sada dudh piti rahi

tujh se sikha ahinsa ka sab ne chalan

zindabaad ai watan zindabaad ai watan

tujh pe gandhi jawahar ne rakkhi nazar

teri 'hasrat' 'tilak' ne sada li KHabar

jaan de ke hue tujh pe lakhon amar

indara ne sanwara tha tujh ko magar

sab ne mil kar banaya hai tujh ko dulhan

zindabaad ai watan zindabaad ai watan