zindan-nama

aaj tārīki-e-shab had sivā lagtī hai

jaane kyā baat huī hai ki ghuTan hotī hai

go ki ik umr guzārī hai isī zindāñ meñ

nīm-tārīk se is gosha-e-vīrāñ se mirī

aisā lagtā hai ki derīna shanāsā.ī hai

us kī dīvāroñ pe likkhe haiñ ka.ī afsāne

jin meñ dil-gīr tamannāoñ kī gahrā.ī hai

us kī be-jān zamīñ ne mirī āñkhoñ meñ bahut

ḳhushk siine ke liye āb-e-baqā paayā hai

us kī maḳhdūsh shikasta sī chhatoñ ne aksar

shab Dhale nāla-e-dil-gīr ko dohrāyā hai

usī zindān ke rauzan ne sahar ke qisse

mehrbāñ ho ke mire haal pe dohrā.e haiñ

ab ye aalam hai ki gardan kā hai hamrāz ye tauq

beḌiyāñ haiñ mire pairoñ kī sahelī ab to

ab to zanjīr kī jhankār meñ lutf aatā hai

ab ye parvāna rihā.ī kā jalā do to sahī

usī zindāñ ko mirī qabr banā do to sahī

taaq kī sham-e-ta.alluq bhī bujhāo to sahī

us se kah do ki rihā.ī nahīñ hone vaalī

mujh meñ zindāñ meñ judā.ī nahīñ hone vaalī

lazzat-e-vasl use ab nahīñ milne vaalī

dil ga.ī raat sahar ab nahīñ hone vaalī

aaj tariki-e-shab had siwa lagti hai

jaane kya baat hui hai ki ghuTan hoti hai

go ki ek umr guzari hai isi zindan mein

nim-tarik se is gosha-e-viran se meri

aisa lagta hai ki derina shanasai hai

us ki diwaron pe likkhe hain kai afsane

jin mein dil-gir tamannaon ki gahrai hai

us ki be-jaan zamin ne meri aankhon mein bahut

KHushk sine ke liye aab-e-baqa paya hai

us ki maKHdush shikasta si chhaton ne aksar

shab Dhale nala-e-dil-gir ko dohraya hai

usi zindan ke rauzan ne sahar ke qisse

mehrban ho ke mere haal pe dohrae hain

ab ye aalam hai ki gardan ka hai hamraaz ye tauq

beDiyan hain mere pairon ki saheli ab to

ab to zanjir ki jhankar mein lutf aata hai

ab ye parwana rihai ka jala do to sahi

usi zindan ko meri qabr bana do to sahi

taq ki sham-e-talluq bhi bujhao to sahi

us se kah do ki rihai nahin hone wali

mujh mein zindan mein judai nahin hone wali

lazzat-e-wasl use ab nahin milne wali

dil gai raat sahar ab nahin hone wali