zindagani shikaston ka ambar hai

kyā huiiñ vahshatoñ kī javāñ vādiyāñ

maiñ kahāñ thā tamannāoñ ke pāsbāñ

ai dil-e-ġham-zada maiñ kahāñ aa gayā

maiñ ne chāhā thā lekin na chāhā thā yuuñ

inqalāb itnā afsurda itnā hazīñ

haa.e ai merī hasrat-zada justujū

kyoñ tirī kāvishoñ ko zavāl aa gayā

mere qadmoñ se mānūs rāh-e-junūñ

ai fazā kī tamanna-shikan ḳhāmushī

kis tarah muḌ ga.ī kis jagah kho ga.ī

kyā hue aaj afkār ke kārvāñ

jin ke saa.e nigāhoñ se mānūs the

zulmatoñ ke dayāroñ ko kyā ho gayā

jin se thiiñ āshnā merī tanhā.iyāñ

dil kahāñ ārzūoñ kā madfan liye

koī jaa.e bhī āḳhir to jaa.e kahāñ

merā josh-e-safar merī be-bākiyāñ

vo bayābāñ-navardī kī āzādiyāñ

vo taḳhayyul kī ik kā.enāt-e-hasīñ

vo tasavvur kā aalam vo sargoshiyāñ

lamha lamha vo ghaTte hue fāsle

merī raftār par naqsh-e-hairat bane

manziloñ ke fasurda-nazar silsile

aaj kyoñ mere maazī kī taqdīr haiñ

aaj maiñ huuñ jahāñ hai aur afsurdagī

bazm-e-hastī ki nālā-kunāñ mahfileñ

yaas kī vādiyāñ dard kī majliseñ

har qadam par irāda-shikan hādse

har nazar meñ alam-posh ḳhāmoshiyāñ

aise ġhamnāk aalam meñ ghabrā ke phir

kyā ta.ajjub agar aaj dil maan le

zindagānī shikastoñ kā ambār hai

kya huin wahshaton ki jawan wadiyan

main kahan tha tamannaon ke pasban

ai dil-e-gham-zada main kahan aa gaya

main ne chaha tha lekin na chaha tha yun

inqalab itna afsurda itna hazin

hae ai meri hasrat-zada justuju

kyon teri kawishon ko zawal aa gaya

mere qadmon se manus rah-e-junun

ai faza ki tamanna-shikan KHamushi

kis tarah muD gai kis jagah kho gai

kya hue aaj afkar ke karwan

jin ke sae nigahon se manus the

zulmaton ke dayaron ko kya ho gaya

jin se thin aashna meri tanhaiyan

dil kahan aarzuon ka madfan liye

koi jae bhi aaKHir to jae kahan

mera josh-e-safar meri be-bakiyan

wo bayaban-nawardi ki aazadiyan

wo taKHayyul ki ek kaenat-e-hasin

wo tasawwur ka aalam wo sargoshiyan

lamha lamha wo ghaTte hue fasle

meri raftar par naqsh-e-hairat bane

manzilon ke fasurda-nazar silsile

aaj kyon mere mazi ki taqdir hain

aaj main hun jahan hai aur afsurdagi

bazm-e-hasti ki nala-kunan mahfilen

yas ki wadiyan dard ki majlisen

har qadam par irada-shikan hadse

har nazar mein alam-posh KHamoshiyan

aise ghamnak aalam mein ghabra ke phir

kya tajjub agar aaj dil man le

zindagani shikaston ka ambar hai