zindagi aur KHudi

ḳhudī ko zaat kā irfāñ nahīñ to kuchh bhī nahīñ

ḳhudī haqīqat-e-uryāñ nahīñ to kuchh bhī nahīñ

na pūchh mujh se vo rāhat jo iztirāb meñ hai

tū misl-e-anjum-e-raḳhshāñ nahīñ to kuchh bhī nahīñ

ho sho.ala-bār ki duniyā hai toda-e-ḳhāshāk

tirī ḳhudī sharar-afshāñ nahīñ to kuchh bhī nahīñ

ḳhirad hai lazzat-e-īmāñ ke zikr se bezār

hayāt lazzat-e-īmāñ nahīñ to kuchh bhī nahīñ

tū jis kī sa.ī se tābāñ hai kaukab-e-taqdīr

faroġh-e-ālam-e-imkāñ nahīñ to kuchh bhī nahīñ

ḳhudī kī zarb se larzāñ hai kā.enāt tamām

ḳhudī ke bahr meñ tūfāñ nahīñ to kuchh bhī nahīñ

ba-faiz-e-soz-e-ḳhudī terī ziist kī rāteñ

harīf-e-sub.h-e-zar-afshāñ nahīñ to kuchh bhī nahīñ

tujhe ḳhabar nahīñ kyā hai hayāt-e-sho.ala-mizāj

ragoñ meñ shorish-e-pinhāñ nahīñ to kuchh bhī nahīñ

ḳhudī kā zaḳhma hai mizrāb-e-sāz-e-kaun-o-makāñ

ḳhudī kā saaz ġhazal-ḳhvāñ nahīñ to kuchh bhī nahīñ

tire jamāl kī is par asaas hai ai dost

tū apne dil kā nigahbāñ nahīñ to kuchh bhī nahīñ

kamāl-e-ishq hai zauq-e-nazar kī sairābī

yahāñ tajallī-e-fārāñ nahīñ to kuchh bhī nahīñ

vajūd-e-qatra-e-naisāñ se hai sadaf kī numūd

sadaf meñ qatra-e-naisāñ nahīñ to kuchh bhī nahīñ

mirī navāoñ se larzāñ haiñ tār-e-ūd-e-hayāt

maiñ zindagī kā hudī-ḳhvāñ nahīñ to kuchh bhī nahīñ

KHudi ko zat ka irfan nahin to kuchh bhi nahin

KHudi haqiqat-e-uryan nahin to kuchh bhi nahin

na puchh mujh se wo rahat jo iztirab mein hai

tu misl-e-anjum-e-raKHshan nahin to kuchh bhi nahin

ho shoala-bar ki duniya hai toda-e-KHashak

teri KHudi sharar-afshan nahin to kuchh bhi nahin

KHirad hai lazzat-e-iman ke zikr se bezar

hayat lazzat-e-iman nahin to kuchh bhi nahin

tu jis ki sai se taban hai kaukab-e-taqdir

farogh-e-alam-e-imkan nahin to kuchh bhi nahin

KHudi ki zarb se larzan hai kaenat tamam

KHudi ke bahr mein tufan nahin to kuchh bhi nahin

ba-faiz-e-soz-e-KHudi teri zist ki raaten

harif-e-subh-e-zar-afshan nahin to kuchh bhi nahin

tujhe KHabar nahin kya hai hayat-e-shoala-mizaj

ragon mein shorish-e-pinhan nahin to kuchh bhi nahin

KHudi ka zaKHma hai mizrab-e-saz-e-kaun-o-makan

KHudi ka saz ghazal-KHwan nahin to kuchh bhi nahin

tere jamal ki is par asas hai ai dost

tu apne dil ka nigahban nahin to kuchh bhi nahin

kamal-e-ishq hai zauq-e-nazar ki sairabi

yahan tajalli-e-faran nahin to kuchh bhi nahin

wajud-e-qatra-e-naisan se hai sadaf ki numud

sadaf mein qatra-e-naisan nahin to kuchh bhi nahin

meri nawaon se larzan hain tar-e-ud-e-hayat

main zindagi ka hudi-KHwan nahin to kuchh bhi nahin