zindagi ke liye

dosto shahr-e-ḳhūbāñ se vāpas chalo

fitrat-e-kākul-o-ruḳh ke unvāñ vahī

shām-e-hirmāñ vahī soz-e-pinhāñ vahī

ek hī dāstāñ ek hī guftugū

ek hī aarzū ek hī justujū

dil-navāzī vahī jāñ-gudāzī vahī

sargirānī vahī sarfarāzī vahī

ik taraf chāñdnī muskurātī huī

ik taraf zindagī ḳhaak uḌātī huī

ek hī dā.era ek hī rahguzar

ek mehvar pe ghūme kahāñ tak nazar

ek afsāna ik rāgnī ek lai

zindagī hai ki gardish meñ ik chaak hai

dosto shahr-e-ḳhūbāñ se vāpas chalo

lamhoñ kī sarsarātī huī aañch se

pighle pighle se haiñ ruuh ke aa.ine

dosh par apnī zulfeñ pareshāñ kiye

zindagī aa.ī hai kuchh taqāze liye

zindagī hiir bhī hai zuleḳhā bhī hai

zindagī sohnī bhī hai lailā bhī hai

zindagī sho.ala bhī zindagī laala bhī

zahr kā jaam bhī shahd kā pyāla bhī

zindagī apne jalvoñ kī jhilmil liye

zindagī apnī kirnoñ kā mahmil liye

DhūñDhtī hai kisī qais ke pyaar ko

DhūñDhtī hai kisī dil ke bīmār ko

vaqt kā har taqāzā hai ik be-sutūñ

kitnā sangīn hai khusravī kā fusūñ

zindagī ko bhī ik kohkan chāhiye

zindagī ko bhī ik tesha-zan chāhiye

dosto shahr-e-ḳhūbāñ se vāpas chalo

dosto shahr-e-ḳhūbāñ se vāpas chalo

hiir ke vāste sohnī ke liye

zindagī ke liye aadmī ke liye

dosto shahr-e-KHuban se wapas chalo

fitrat-e-kakul-o-ruKH ke unwan wahi

sham-e-hirman wahi soz-e-pinhan wahi

ek hi dastan ek hi guftugu

ek hi aarzu ek hi justuju

dil-nawazi wahi jaan-gudazi wahi

sargirani wahi sarfaraazi wahi

ek taraf chandni muskuraati hui

ek taraf zindagi KHak uDati hui

ek hi daera ek hi rahguzar

ek mehwar pe ghume kahan tak nazar

ek afsana ek ragni ek lai

zindagi hai ki gardish mein ek chaak hai

dosto shahr-e-KHuban se wapas chalo

lamhon ki sarsaraati hui aanch se

pighle pighle se hain ruh ke aaine

dosh par apni zulfen pareshan kiye

zindagi aai hai kuchh taqaze liye

zindagi hir bhi hai zuleKHa bhi hai

zindagi sohni bhi hai laila bhi hai

zindagi shoala bhi zindagi lala bhi

zahr ka jam bhi shahd ka pyala bhi

zindagi apne jalwon ki jhilmil liye

zindagi apni kirnon ka mahmil liye

DhunDhti hai kisi qais ke pyar ko

DhunDhti hai kisi dil ke bimar ko

waqt ka har taqaza hai ek be-sutun

kitna sangin hai khusrawi ka fusun

zindagi ko bhi ek kohkan chahiye

zindagi ko bhi ek tesha-zan chahiye

dosto shahr-e-KHuban se wapas chalo

dosto shahr-e-KHuban se wapas chalo

hir ke waste sohni ke liye

zindagi ke liye aadmi ke liye