زندگی
زندگی اک منچلے گبرو کا روپ
زندگی نوخیز دوشیزہ کا رنگ
زندگی اک ساتھ مرنے کا خیال
زندگی اک ساتھ جینے کی امنگ
زندگی فکر و نظر کی روشنی
زندگی ذات الٰہی کا شعور
زندگی اک مطمئن صوفی کی رمز
زندگی شب خیز عابد کا سرور
زندگی قرب کنیز خوبرو
زندگی آہنگ و آب آتشیں
زندگی وقف سرود و حسن و مے
زندگی کا لمحہ لمحہ دل نشیں
زندگی احساس کا روشن چراغ
زندگی محرومیٔ فکر و نظر
زندگی لرزاں خدا کے خوف سے
زندگی وقف گنہ شام و سحر
زندگی اک نا خلف بیٹے کا باپ
زندگی مزدور کی بیمار ماں
زندگی بچھڑے ہوئے بھائی بہن
زندگی شام و سحر آہ و فغاں
زندگی ویرانیٔ صحرائے دل
زندگی مفلس کی کٹیا کا چراغ
زندگی گوشہ نشیں حساس ذہن
زندگی محرومیوں سے داغ داغ
زندگی اک گڈریے کا لوک گیت
زندگی آوارہ لڑکوں کا دماغ
زندگی محرومیٔ مصروفیت
زندگی خانہ بدوشوں کا فراغ
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
