zindagi siTiyan bajati hai

ye sāñsoñ ke chalne ko kyoñ zindagī kī alāmat kahā hai

ye sāñseñ to muflis kī bhī chal rahī haiñ

ġharībī ke sho.ale nigalnā

aur is saañs kī ḳhasta rassī pe chalnā

agar merī koī karāmat nahīñ hai

to maiñ sāl-hā-sāl se ek kartab kiye jā rahā huuñ

ye sab ek circus hai aur kuchh nahīñ hai

ki jis meñ faqat maiñ ġharībī ke sho.ale nigaltā huā saañs kī ḳhasta rassī pe chaltā huā ik tamāshā banā huuñ

jise dekh kar zindagī sīTiyāñ ab bajāne lagī hai

azal se ye dastūr qaa.em huā hai

ki muflis kī aulād bhī muflisī kāTtī hai

chalo ab ye dastūr hī toḌ Dāleñ

vo yuuñ baḌbaḌāyā

to phir us ne ḳhanjar se apne ġharībī ke iklaute vāris kī sāñsoñ kī rassī ko hī kaaT Daalā

vo ḳhush thā

ki ab us kā laḳht-e-jigar

muflisī kī aziyyat se āzād yuuñ ho gayā hai

ki jaise kisī qaid se koī panchhī

to faaqe ke dhāgoñ meñ uljhe badan kī achānak se āñkhoñ ke parde haTe

aur vo ālam-e-ḳhvāb se jaag uTThā

to us kī nigāhoñ ne apne ġharībī ke iklaute vāris ko dekhā

to rone lagā vo

ki us kī tarah us kī ġhurbat kā vāris ġharībī ke sho.ale nigaltā huā saañs kī ḳhasta rassī pe chalne lagā hai

vo bhī ek circus kā joker banā hai

jise dekh kar zindagī sīTiyāñ phir bajāne lagī hai

ye sanson ke chalne ko kyon zindagi ki alamat kaha hai

ye sansen to muflis ki bhi chal rahi hain

gharibi ke shoale nigalna

aur is sans ki KHasta rassi pe chalna

agar meri koi karamat nahin hai

to main sal-ha-sal se ek kartab kiye ja raha hun

ye sab ek circus hai aur kuchh nahin hai

ki jis mein faqat main gharibi ke shoale nigalta hua sans ki KHasta rassi pe chalta hua ek tamasha bana hun

jise dekh kar zindagi siTiyan ab bajaane lagi hai

azal se ye dastur qaem hua hai

ki muflis ki aulad bhi muflisi kaTti hai

chalo ab ye dastur hi toD Dalen

wo yun baDbaDaya

to phir us ne KHanjar se apne gharibi ke iklaute waris ki sanson ki rassi ko hi kaT Dala

wo KHush tha

ki ab us ka laKHt-e-jigar

muflisi ki aziyyat se aazad yun ho gaya hai

ki jaise kisi qaid se koi panchhi

to faqe ke dhagon mein uljhe badan ki achanak se aankhon ke parde haTe

aur wo aalam-e-KHwab se jag uTTha

to us ki nigahon ne apne gharibi ke iklaute waris ko dekha

to rone laga wo

ki us ki tarah us ki ghurbat ka waris gharibi ke shoale nigalta hua sans ki KHasta rassi pe chalne laga hai

wo bhi ek circus ka joker bana hai

jise dekh kar zindagi siTiyan phir bajaane lagi hai