zindagi to nahin

zindagī to nahīñ tum

magar merī jaañ

zindagī kī tarah ho

Dūbtī shaam sāhil pe

koī parinda uḌe

duur mañjdhār meñ

naav se koī māñjhī lagā.e sadā

sarsarā.e havā

koī pattā hile

koī ġhuncha khile

yaad aatī ho tum

aur aisī hī rut meñ

kabhī man-chalī

narm-o-nāzuk havā

gudgudātī to hogī

tumheñ merī jaañ

aur ik be-adab

sar-phirā naujavāñ

yaad aatā to hogā tumheñ nā-gahāñ

mujh ko ehsās hai

fāsle haiñ bahut

dūriyāñ haiñ baḌī

manzileñ haiñ kaḌī

phir bhī ai jān-e-jāñ

ye to socho zarā

ham akele bhī ik dūsre ke binā

jī to leñge magar

kyā ye jiinā huā

zahr piinā huā

zindagi to nahin tum

magar meri jaan

zindagi ki tarah ho

Dubti sham sahil pe

koi parinda uDe

dur manjdhaar mein

naw se koi manjhi lagae sada

sarsarae hawa

koi patta hile

koi ghuncha khile

yaad aati ho tum

aur aisi hi rut mein

kabhi man-chali

narm-o-nazuk hawa

gudgudati to hogi

tumhein meri jaan

aur ek be-adab

sar-phira naujawan

yaad aata to hoga tumhein na-gahan

mujh ko ehsas hai

fasle hain bahut

duriyan hain baDi

manzilen hain kaDi

phir bhi ai jaan-e-jaan

ye to socho zara

hum akele bhi ek dusre ke bina

ji to lenge magar

kya ye jina hua

zahr pina hua