زندگی تو نہیں

زندگی تو نہیں تم

مگر میری جاں

زندگی کی طرح ہو

ڈوبتی شام ساحل پہ

کوئی پرندہ اڑے

دور منجدھار میں

ناؤ سے کوئی مانجھی لگائے صدا

سرسرائے ہوا

کوئی پتا ہلے

کوئی غنچہ کھلے

یاد آتی ہو تم

اور ایسی ہی رت میں

کبھی من چلی

نرم و نازک ہوا

گدگداتی تو ہوگی

تمہیں میری جاں

اور اک بے ادب

سر پھرا نوجواں

یاد آتا تو ہوگا تمہیں ناگہاں

مجھ کو احساس ہے

فاصلے ہیں بہت

دوریاں ہیں بڑی

منزلیں ہیں کڑی

پھر بھی اے جان جاں

یہ تو سوچو ذرا

ہم اکیلے بھی اک دوسرے کے بنا

جی تو لیں گے مگر

کیا یہ جینا ہوا

زہر پینا ہوا