zindagi

zindagī rāhat-e-jāñ dard dil-e-zār bhī hai

bāñjh khetī bhī hai aur kisht-e-guhar-bār bhī hai

zindagī ek dhanak

shoḳh rañgoñ se banī

zindagī qarz bhī hai farz bhī hai

zindagī ek sarāb

zindagī jām-e-sharāb

zindagī husn-e-shabāb

zindagī bū-e-gulāb

zindagī kyuuñ ho azaab

jis ne jis rañg meñ dekhā ye banī vaisī hī

shād-nāshād to ābād haiñ barbād yahāñ

faqr ek phuul bhī hai dhuul bhī hai

zindagī gahrā samundar koī

us falak-bos bulandī se pare

log jiite haiñ ki marnā hai unheñ

zehn-o-māhaul kī tārīkī meñ

jis tarah hogā ba-har-taur guzar kar leñge

log jiine se bahut pahle hī mar jaate haiñ

ik tasāhul kā bahāna hai ye andāz un kā

aao ham ziist sajā.eñ apnī

azmat-e-ādam-o-havvā na ghaTā.eñ hargiz

ham vafā-kesh baneñ

ḳhidmat-e-quam-o-vatan apnā salīqa ban jaa.e

husn ke phuul bikhereñ ḳhushbū

pyaar ke nuur se raushan hoñ fazā.eñ saarī

dil meñ nafrat na rahe

dard miT jaa.eñ mile sabr-o-qarār

raushnī paa.e hayāt

raat kī zulmateñ miT jaa.eñ kahīñ kho jaa.eñ

ḳhūgar-e-rañj baneñ vāris-e-aurañg-e-nashāt

sarḳhushī paa.e hayāt

jiinā jab tak hai salīqe se ji.eñ

maut aa.e to qarīne se mareñ

husn-e-tadbīr se gulshan meñ guhar-bārī ho

kaam kuchh aise kareñ

ziist jāved bane

zindagi rahat-e-jaan dard dil-e-zar bhi hai

banjh kheti bhi hai aur kisht-e-guhar-bar bhi hai

zindagi ek dhanak

shoKH rangon se bani

zindagi qarz bhi hai farz bhi hai

zindagi ek sarab

zindagi jam-e-sharab

zindagi husn-e-shabab

zindagi bu-e-gulab

zindagi kyun ho azab

jis ne jis rang mein dekha ye bani waisi hi

shad-nashad to aabaad hain barbaad yahan

faqr ek phul bhi hai dhul bhi hai

zindagi gahra samundar koi

us falak-bos bulandi se pare

log jite hain ki marna hai unhen

zehn-o-mahaul ki tariki mein

jis tarah hoga ba-har-taur guzar kar lenge

log jine se bahut pahle hi mar jate hain

ek tasahul ka bahana hai ye andaz un ka

aao hum zist sajaen apni

azmat-e-adam-o-hawwa na ghaTaen hargiz

hum wafa-kesh banen

KHidmat-e-quam-o-watan apna saliqa ban jae

husn ke phul bikheren KHushbu

pyar ke nur se raushan hon fazaen sari

dil mein nafrat na rahe

dard miT jaen mile sabr-o-qarar

raushni pae hayat

raat ki zulmaten miT jaen kahin kho jaen

KHugar-e-ranj banen waris-e-aurang-e-nashat

sarKHushi pae hayat

jina jab tak hai saliqe se jien

maut aae to qarine se maren

husn-e-tadbir se gulshan mein guhar-bari ho

kaam kuchh aise karen

zist jawed bane