zulm ka ye raqs ek din TuTna hai

ik pukār uTh rahī hai is taraf jo

jo sadā.eñ is shahr ke us taraf se gūñjtī haiñ

shab pasar rahī hai jo ik hausloñ par

ye añdherā kuchh abhī ghanghor hogā

chand rūheñ aur kuchh pāmāl hoñgī

dil abhī to bārhā dil haar degā

yuuñ lagegā is siyāhī kā kahīñ āḳhir nahīñ hai

is ġham-o-andoh kā chāra nahīñ hai

kuchh to ahl-e-‘ilm pe ḳhanjar jahālat ke uTheñge

ḳhvāb pe afkār pe ummīd pe hamla abhī jaarī rahegā

aur salāsil ḳhvāb-e-fardā kā nayā gahnā baneñge

aur bhī kuchh sabz kaliyāñ

surḳh hone kī tavaqqo' hī meñ murjhā jā.eñgī

kar diyā jā.egā ik be-rūh sā iḳhlās ham sab par musallat

phir se kuchh masjūd hoñge chand patthar ke sanam

jin kā na koī ḳhudā na koī devtā hogā

kyoñ magar yārāne-e-man dil hārte ho

kyoñ abhī māyūs hote ho mire ahbāb tum

ye añdherā bhī azal se yaañ nahīñ thā

jis tarah se us ne khā Daalī hai ek ek nuur kī partav

is tarah hī us kā bhī ek ant lāziman hogā

dekh lenā ek din ye bhī fanā ho jā.egā

TuuT jā.eñge salāsil aur fazā maiñ qahqahe gūñjeñge phir se

phir hayāt sar uThā.egī ye tum ḳhud dekh lenā

zulm kā ye raqs ek din TūTnā hai

ek pukar uTh rahi hai is taraf jo

jo sadaen is shahr ke us taraf se gunjti hain

shab pasar rahi hai jo ek hauslon par

ye andhera kuchh abhi ghanghor hoga

chand ruhen aur kuchh pamal hongi

dil abhi to barha dil haar dega

yun lagega is siyahi ka kahin aaKHir nahin hai

is gham-o-andoh ka chaara nahin hai

kuchh to ahl-e-‘ilm pe KHanjar jahaalat ke uThenge

KHwab pe afkar pe ummid pe hamla abhi jari rahega

aur salasil KHwab-e-farda ka naya gahna banenge

aur bhi kuchh sabz kaliyan

surKH hone ki tawaqqo' hi mein murjha jaengi

kar diya jaega ek be-ruh sa iKHlas hum sab par musallat

phir se kuchh masjud honge chand patthar ke sanam

jin ka na koi KHuda na koi dewta hoga

kyon magar yarane-e-man dil haarte ho

kyon abhi mayus hote ho mere ahbab tum

ye andhera bhi azal se yan nahin tha

jis tarah se us ne kha Dali hai ek ek nur ki partaw

is tarah hi us ka bhi ek ant laziman hoga

dekh lena ek din ye bhi fana ho jaega

TuT jaenge salasil aur faza main qahqahe gunjenge phir se

phir hayat sar uThaegi ye tum KHud dekh lena

zulm ka ye raqs ek din TuTna hai