mohammad ali jauhar

pyāre bachcho batāo us kā naam

jānte sab haiñ jis ko ḳhās-o-ām

vo jo ik mo'atabar siyāsī thā

vo jo ik nāmvar sahāfī thā

vo jo urdu kā ek shā.ir thā

fan-e-taqrīr meñ bhī māhir thā

jo mujāhid thā aur aalim bhī

saare aalam meñ jis kī izzat thī

jis ko hamdard comrade milā

paa.ī jis ke qalam ne ḳhuub jilā

jis kī tahrīr thī ḳhilāfat kī

mulk-o-millat kī jis ne ḳhidmat kī

jo muhibb-e-vatan siyāsī thā

aur jo rāmpur kā baasī thā

pyare bachcho batao us ka nam

jaante sab hain jis ko KHas-o-am

wo jo ek mo'atabar siyasi tha

wo jo ek namwar sahafi tha

wo jo urdu ka ek shair tha

fan-e-taqrir mein bhi mahir tha

jo mujahid tha aur aalim bhi

sare aalam mein jis ki izzat thi

jis ko hamdard comrade mila

pai jis ke qalam ne KHub jila

jis ki tahrir thi KHilafat ki

mulk-o-millat ki jis ne KHidmat ki

jo muhibb-e-watan siyasi tha

aur jo rampur ka basi tha