ہم نے بے انتہا وفا کر کے

بے وفاؤں سے انتقام لیا

بندشیں عشق میں دنیا سے نرالی دیکھیں

دل تڑپ جائے مگر لب نہ ہلائے کوئی

اس بے وفا سے کر کے وفا مر مٹا رضاؔ

اک قصۂ طویل کا یہ اختصار ہے

تم رضاؔ بن کے مسلمان جو کافر ہی رہے

تم سے بہتر ہے وہ کافر جو مسلماں نہ ہوا

ان کے ستم بھی کہہ نہیں سکتے کسی سے ہم

گھٹ گھٹ کے مر رہے ہیں عجب بے بسی سے ہم

قسمت میں خوشی جتنی تھی ہوئی اور غم بھی ہے جتنا ہونا ہے

گھر پھونک تماشا دیکھ چکے اب جنگل جنگل رونا ہے

جو چاہتے ہو سو کہتے ہو چپ رہنے کی لذت کیا جانو

یہ راز محبت ہے پیارے تم راز محبت کیا جانو

درد دل اور جان لیوا پرسشیں

ایک بیماری کی سو بیماریاں

سمجھ تو یہ کہ نہ سمجھے خود اپنا رنگ جنوں

مزاج یہ کہ زمانہ مزاج داں ہوتا