ابھی گناہ کا موسم ہے آ شباب میں آ

نشہ اترنے سے پہلے مری شراب میں آ

میں تجھ کو جاگتی آنکھوں سے چھو سکوں نہ کبھی

مری انا کا بھرم رکھ لے میرے خواب میں آ

اک مسلسل جنگ تھی خود سے کہ ہم زندہ ہیں آج

زندگی ہم تیرا حق یوں بھی ادا کرتے رہے

وہ قیامت تھی کہ ریزہ ریزہ ہو کے اڑ گیا

اے زمیں ورنہ کبھی اک آسماں میرا بھی تھا

آؤ آج ہم دونوں اپنا اپنا گھر چن لیں

تم نواح دل لے لو خطۂ بدن میرا

چمک دے چاند کو ٹھنڈک ہوا کو دل کو امنگ

اداس قصے کو پھر ایک شاہزادہ دے

اپنے وجود سے پرے اب

کوئی بھی راستہ نہیں ہے

تم تو اے خوشبو ہواؤ اس سے مل کر آ گئیں

ایک ہم تھے زخم تنہائی ہرا کرتے رہے

بس اک خانہ بدوشی ہے کہ اب تک ساتھ ہے اپنے

تعیش ہے تصور میں بھی اب کوئی مکاں رکھنا