zaḳhm itne haiñ badan par ki kahīñ dard nahīñ

ham bhī pathrāv meñ patthar ke hue jaate haiñ

zaKHm itne hain badan par ki kahin dard nahin

hum bhi pathraw mein patthar ke hue jate hain

ye kyā kam hai amāma bāñdh kar nikle nahīñ ham

ab is se bhī sivā īmān-dārī kaun kartā

ye kya kam hai amama bandh kar nikle nahin hum

ab is se bhi siwa iman-dari kaun karta

kab se maiñ safar meñ huuñ magar ye nahīñ ma.alūm

aane meñ lagā huuñ ki maiñ jaane meñ lagā huuñ

kab se main safar mein hun magar ye nahin malum

aane mein laga hun ki main jaane mein laga hun

suntā hai yahāñ kaun samajhtā hai yahāñ kaun

ye shaġhl-e-suḳhan vaqt-guzārī ke liye hai

sunta hai yahan kaun samajhta hai yahan kaun

ye shaghl-e-suKHan waqt-guzari ke liye hai

the yahāñ saare amal radd-e-amal ke muhtāj

zindagī bhī hameñ darkār thī marne ke liye

the yahan sare amal radd-e-amal ke muhtaj

zindagi bhi hamein darkar thi marne ke liye