itnā masrūf kar liyā ḳhud ko

ġham bhī aa kar ḳhushī se lauT ga.e

itna masruf kar liya KHud ko

gham bhi aa kar KHushi se lauT gae

tumhārī ḳhush-nasībī hai ki tum samjhe nahīñ ab tak

akele-pan meñ aur tanhā.ī meñ jo farq hotā hai

tumhaari KHush-nasibi hai ki tum samjhe nahin ab tak

akele-pan mein aur tanhai mein jo farq hota hai

kuchh umr apnī zaat kā dukh jhelte rahe

kuchh umr kā.enāt kā dukh jhelnā paḌā

kuchh umr apni zat ka dukh jhelte rahe

kuchh umr kaenat ka dukh jhelna paDa

yahī sabab hai ki aksar udaas rahte haiñ

jo ham se duur haiñ vo aas paas rahte haiñ

yahi sabab hai ki aksar udas rahte hain

jo hum se dur hain wo aas pas rahte hain

par sameTe ḳhud hī baiThā hai parinda ik taraf

jo qafas meñ hī nahīñ us ko rihā kaise karūñ

par sameTe KHud hi baiTha hai parinda ek taraf

jo qafas mein hi nahin us ko riha kaise karun