chhupā gayā gahrā.ī meñ dariyā apnā haal

maiñ jab bhī andar gayā bāhar diyā uchhāl

chhupa gaya gahrai mein dariya apna haal

main jab bhi andar gaya bahar diya uchhaal

din meñ maz.hab jāgtā laakh bhalī hai raat

har tan laage ek sā ik hī laage zaat

din mein mazhab jagta lakh bhali hai raat

har tan lage ek sa ek hi lage zat

qismat se jab vasl kī paidā huī sabīl

paas samundar dekh kar bhārī ho ga.ī jhiil

qismat se jab wasl ki paida hui sabil

pas samundar dekh kar bhaari ho gai jhil

tū mujh meñ mahdūd hai maiñ tujh meñ mahdūd

mere saa.e meñ tirā dikhne lagā vajūd

tu mujh mein mahdud hai main tujh mein mahdud

mere sae mein tera dikhne laga wajud

zamīñ ek dikhtī rahī jab tak paḌī phuhār

sūkhā paḌte hī 'anas' aane lagī darār

zamin ek dikhti rahi jab tak paDi phuhaar

sukha paDte hi 'anas' aane lagi darar