ذرے ذرے میں مہک پیار کی ڈالی جائے

بو تعصب کی ہر اک دل سے نکالی جائے

مسکرا کر ان کا ملنا اور بچھڑنا روٹھ کر

بس یہی دو لفظ اک دن داستاں ہو جائیں گے

آخری وقت تلک ساتھ اندھیروں نے دیا

راس آتے نہیں دنیا کے اجالے مجھ کو

ہو کے مجبور یہ بچوں کو سبق دینا ہے

اب قلم چھوڑ کے تلوار اٹھا لی جائے

تیرے فراق نے کی زندگی عطا مجھ کو

تیرا وصال جو ملتا تو مر گیا ہوتا

گر ترنم پر ہی دانشؔ منحصر ہے شاعری

پھر تو دنیا بھر کے شاعر نغمہ خواں ہو جائیں گے

اپنے دشمن کو بھی خود بڑھ کے لگا لو سینے

بات بگڑی ہوئی اس طرح بنا لی جائے

روداد شب غم یوں ڈرتا ہوں سنانے سے

محفل میں کہیں ان کی صورت نہ اتر جائے