واقف کہاں زمانہ ہماری اڑان سے

وہ اور تھے جو ہار گئے آسمان سے

رہ گئی ہے کچھ کمی تو کیا شکایت ہے فہیمؔ

اس جہاں میں سب ادھورے ہیں مکمل کون ہے

شام خاموش ہے پیڑوں پہ اجالا کم ہے

لوٹ آئے ہیں سبھی ایک پرندہ کم ہے

کتنے طوفانوں سے ہم الجھے تجھے معلوم کیا

پیڑ کے دکھ درد کا پھولوں سے اندازہ نہ کر

نہ بات دل کی سنوں میں نہ دل سنے میری

یہ سرد جنگ ہے اپنے ہی اک مشیر کے ساتھ

تیری یادیں ہو گئیں جیسے مقدس آیتیں

چین آتا ہی نہیں دل کو تلاوت کے بغیر

بند کمرے میں ترا درد نہ بجھ جائے کہیں

کھڑکیاں کھول کہ یہ آگ ہوا چاہتی ہے

جائیں گے ایک روز سمندر کی گود میں

دریا کے ساتھ ریت کی تحریر اور ہم

تمہاری یاد سے یہ رات کتنی روشن ہے

نظر میں اتنے ہیں جگنو کہ ہم گنائیں کیا

ملن کے بعد آتی ہے جدائی

نرک بھی سورگ سے کتنا نکٹ ہے

ہم اہل غم کو حقارت سے دیکھنے والو

تمہاری ناؤ انہیں آنسوؤں سے چلتی ہے

رستے میں فہیمؔ اس کی طبیعت کا بگڑنا

گھر جانے کا اک اور بہانہ تو نہیں ہے

کسی کے در پہ سجدہ کرتے کرتے

فہیمؔ ایسا نہ ہو سر ٹوٹ جائے

مرگھٹ پتھ پر دیکھ کے ہم کو جانے کیا کیا سوچیں وہ

آنکھوں سے کیا پنیہ کمائے ہونٹوں سے کیا دان ہوئے