ہر طرف دوستی کا میلہ ہے

پھر بھی ہر آدمی اکیلا ہے

دونوں لازم ہیں لا زوال بھی ہیں

اک ترا حسن اک مرا یہ عشق

تیرے سانچے میں ڈھل گیا آخر

شہر سارا بدل گیا آخر

جسے بھی دوست بنایا وہ بن گیا دشمن

یہ ہم نے کون سی تقصیر کی سزا پائی

ہار جائے گی زندگی لیکن

ہارنے کا نہیں مرا یہ عشق

کس سادگی سے وہ بھی دغا دے گیا مجھے

جس شخص نے کہا تھا کبھی دیوتا مجھے

فرحتؔ سناؤں کس کو کہانی میں گاؤں کی

گھر گھر میں زندہ لاشیں تھیں مجبور ماؤں کی

چہرے بدل بدل کے کہانی سنا گئے

درد و الم فراق مری جاں کو آ گئے

میرے ہر ایک سچ پہ انہیں جھوٹ کا گماں

کرتا ہے بد گمان خدا خیر ہی کرے

میں عقیدت میں نعت لکھتا ہوں

میں حقیقت میں نعت لکھتا ہوں

شہر کا شہر مری جاں کی طلب رکھتا ہے

آج سوچا ہے یہی جان کا صدقہ دے دوں

وہ میرے بخت کی تحریر کیوں نہیں بنتا

وہ میرا خواب ہے تعبیر کیوں نہیں بنتا

پھیلے ہیں سارے شہر میں قصے عجیب سے

گزرا ہے جب بھی پھول سا چہرہ قریب سے

اک دوسرے سے خوف کی شدت تھی اس قدر

کل رات اپنے آپ سے میں خود لپٹ گیا

یہ کائنات آج بھی منسوب آپ سے

یہ کائنات آج بھی جاگیر آپ کی

تم اسے لے چلو لب کوثر

اے فرشتو یہ کربلائی ہے

زلزلوں کی نمود سے فرحتؔ

مستقر مستقر نہیں رہتے

تعمیر کر گئے کبھی مسمار ہو گئے

لمحے مری اٹھان کو دیوار کر گئے

رقص کرتے ہوئے بگولوں میں

ماتمی شور بھی ہوا کا ہے

بے تابیٔ اظہار نے یوں خاک کیا ہے

دزدیدہ نگاہی نے مجھے چاک کیا ہے

لاکھ اجزا میں ہو گیا تقسیم

کیا عجب مجتمع ہوا فرحتؔ

دن نکلتے ہی بدن پر حبس کی یورش ہوئی

رات بھر سوچوں کے پتھراؤ سے سر جلتا رہا

بات اہل جنوں کی کیا سمجھے

وہ خرد جو کڑے زیان میں ہے