افسر میرٹھی ایک ممتاز شاعر، ادیب اور نقاد کے طور پر جانے جاتے ہیں۔ انہوں نے بچوں کے لئے بھی بہت سی نظمیں اور کہانیاں لکھیں۔ افسر کے تخلیقی اور تنقیدی ادب کی نمایاں صفت اس کا مقصدی ہونا  ہے۔ 
افسر 29 نومبر 1895 کو میرٹھ میں پیدا ہوئے ۔ اصل نام حامد اللہ تھا۔ مدرسہ عالیہ میرٹھ سے عربی و فارسی کی تعلیم حاصل کرنے کے بعد میرٹھ کالج سے بی اے کیا اور گورنمنٹ کالج لکھنؤ میں اردو کی تدریس سے وابستہ ہوگئے۔ ایک لمبے عرصے کے تدریسی تجربے کے بعد افسر نے بچوں کے نصاب کی کئی کتابیں بھی تصنیف کیں۔ 
افسر کے شعری مجموعے ’پیام روح‘ اور ’جوئے رواں‘ کے نام سے منظر عام پر آئے۔ ’ڈالی کا جوگ‘ اور ’پرچھائیاں‘ ان کے افسانوں کے مجموعے ہیں۔ ’نورس‘ اور ’نقدالادب‘ کے نام سے ان کی تنقیدی کتابیں شائع ہوئیں۔ اس کے علاوہ بھی متعدد موضوعات پر افسر کی کئی کتابیں شائع ہوئیں۔ 
1958 میں افسر کا انتقال ہوا۔