روتے روتے مرے ہنسنے پہ تعجب نہ کرو

ہے وہی چیز مگر دوسرے انداز میں ہے

لفظوں سے بنا انساں لفظوں ہی میں رہتا ہے

لفظوں سے سنورتا ہے لفظوں سے بگڑتا ہے

ان ہزاروں میں اور آپ، یہ کیا؟

آپ، جو ایک تھے ہزاروں میں

کرتا ہوں ایک خواب کے مبہم نقوش یاد

جب سے کھلی ہے آنکھ اسی مشغلے میں ہوں

مری نظر میں ہے انجام اس تعاقب کا

جہاں بھی دوستی جاتی ہے دشمنی جائے

طے کر کے دل کا زینہ وہ اک قطرہ خون کا

پلکوں کی چھت تک آیا تو لیکن گرا نہیں

آج زنداں میں اسے بھی لے گئے

جو کبھی اک لفظ تک بولا نہیں

یادوں نے لے لیا مجھے اپنے حصار میں

میرا وجود حافظہ بن کر سکڑ گیا

جو چپ لگاؤں تو صحرا کی خامشی جاگے

جو مسکراؤں تو آزردگی بھی شرمائے