rote rote mire hañsne pe ta.ajjub na karo

hai vahī chiiz magar dūsre andāz meñ hai

rote rote mere hansne pe tajjub na karo

hai wahi chiz magar dusre andaz mein hai

lafzoñ se banā insāñ lafzoñ hī meñ rahtā hai

lafzoñ se sañvartā hai lafzoñ se bigaḌtā hai

lafzon se bana insan lafzon hi mein rahta hai

lafzon se sanwarta hai lafzon se bigaDta hai

in hazāroñ meñ aur aap, ye kyaa?

aap, jo ek the hazāroñ meñ

in hazaron mein aur aap, ye kya?

aap, jo ek the hazaron mein

kartā huuñ ek ḳhvāb ke mub.ham nuqūsh yaad

jab se khulī hai aañkh isī mashġhale meñ huuñ

karta hun ek KHwab ke mubham nuqush yaad

jab se khuli hai aankh isi mashghale mein hun

aaj zindāñ meñ use bhī le ga.e

jo kabhī ik lafz tak bolā nahīñ

aaj zindan mein use bhi le gae

jo kabhi ek lafz tak bola nahin

tai kar ke dil kā ziina vo ik qatra ḳhuun kā

palkoñ kī chhat tak aayā to lekin girā nahīñ

tai kar ke dil ka zina wo ek qatra KHun ka

palkon ki chhat tak aaya to lekin gira nahin

yādoñ ne le liyā mujhe apne hisār meñ

merā vajūd hāfiza ban kar sukaḌ gayā

yaadon ne le liya mujhe apne hisar mein

mera wajud hafiza ban kar sukaD gaya

jo chup lagā.ūñ to sahrā kī ḳhāmushī jaage

jo muskurā.ūñ to āzurdagī bhī sharmā.e

jo chup lagaun to sahra ki KHamushi jage

jo muskuraun to aazurdagi bhi sharmae

mirī nazar meñ hai anjām is ta.āqub kā

jahāñ bhī dostī jaatī hai dushmanī jaa.e

meri nazar mein hai anjam is taaqub ka

jahan bhi dosti jati hai dushmani jae