سبوئے فلسفۂ عشق و کہکشان حیات

شعاع قہر تبسم, چراغ‌ دیدۂ نم

ہزار جام چھلکتے ہوئے نفس بہ نفس

ہزار باغ مہکتے ہوئے قدم بہ قدم

شراب حسن و محبت فشردۂ انجم

انیس شام و سحر ہمدم وجود و عدام

جلو میں حضرت جبریل سر جھکائے ہوئے

بلند عرش کے تاروں سے عظمت آدم

نگار خانۂ حکمت کلید باب جنوں

امین‌‌ صبح مسرت رئیس شام الم

زباں سے شعر کی تعریف ہو نہیں سکتی

کہ ایک ذرے سے اب تک ہے عقل نامحرم

نہ پوچھ شعر ہے کیا چیز مجھ سے اے ہمدم

مزاج آتش سوزاں لطافت شبنم

خروش صرصر و طوفاں جمود دشت و سراب

سرود فصل بہاراں خرام گردش یم

حریم دل میں جب آتا ہے ناز فرماتا

طرب کے پھول کھلاتا ہے یہ مصور غم

خمار دیدۂ انجم شراب لیل و نہار

حکایت نشنیدہ نگار نا محرم

جہاں ہے شعر چراغ جنوں جلائے ہوئے

وہاں کھڑی ہے خرد اپنا سر جھکائے ہوئے

زمیں سے اہل فلک کو پیام نظارہ

نقاب عارض فطرت کی جنبش پیہم