گل کے ہونے کی توقع پہ جیے بیٹھی ہے

ہر کلی جان کو مٹھی میں لیے بیٹھی ہے

کبھی صیاد کا کھٹکا ہے کبھی خوف خزاں

بلبل اب جان ہتھیلی پہ لیے بیٹھی ہے

گر مرے دل کو چرایا نہیں تو نے ظالم

کھول دے بند ہتھیلی کو دکھا ہاتھوں کو

تیر و تلوار سے بڑھ کر ہے تری ترچھی نگہ

سیکڑوں عاشقوں کا خون کیے بیٹھی ہے

بجز حق کے نہیں ہے غیر سے ہرگز توقع کچھ

مگر دنیا کے لوگوں میں مجھے ہے پیار سے مطلب

ہم جو شب کو ناگہاں اس شوخ کے پالے پڑے

دل تو جاتا ہی رہا اب جان کے لالے پڑے

ان کو آنکھیں دکھا دے ٹک ساقی

چاہتے ہیں جو بار بار شراب

چنداؔ رہے پرتو سے ترے یا علی روشن

خورشید کو ہے در سے ترے شام و سحر فیض

گرچہ گل کی سیج ہو تس پر بھی اڑ جاتی ہے نیند

سر رکھوں قدموں پہ جب تیرے مجھے آتی ہے نیند

ناداں سے ایک عمر رہا مجھ کو ربط عشق

دانا سے اب پڑا ہے سروکار دیکھنا

دل ہو گیا ہے غم سے ترے داغ دار خوب

پھولا ہے کیا ہی جوش سے یہ لالہ زار خوب

سنگ رہ ہوں ایک ٹھوکر کے لیے

تس پہ وہ دامن سنبھال آتا ہے آج

بسنت آئی ہے موج رنگ گل ہے جوش صہبا ہے

خدا کے فضل سے عیش و طرب کی اب کمی کیا ہے

دریغ چشم کرم سے نہ رکھ کہ اے ظالم

کرے ہے دل کو مرے تیری یک نظر محظوظ