خواب ٹھہرے تھے تو آنکھیں بھیگنے سے بچ گئیں

ورنہ چہرے پر تو غم کی بارشوں کا عکس ہے

میں کسی اور کو دیکھوں بھی تو دیکھوں کیسے

اس کے خوابوں کی ان آنکھوں پہ نگہبانی ہے

شدت تشنہ لبی آج کہاں لائی ہے

پیاس صحرا کی سمندر میں اتر آئی ہے

وہ لڑکیاں کہ جو لگتی تھیں سادہ تحریریں

پڑھی گئیں تو انوکھی پہیلیاں نکلیں

ہر دور کا جو عکس ہے وہ آئنہ ہیں ہم

تخلیق کائنات کا اک سلسلہ ہیں ہم

عمر گزری اک نگاہ لطف کی امید میں

ہم کو اپنے حوصلوں کی یہ ادا اچھی لگی

کر گئیں موجیں شرارت جب بھی لکھا تیرا نام

ریت پر جتنی لکیریں تھیں وہ سب مل جل گئیں

نہ پڑھ لے کوئی تحریریں تمہارے زرد چہرے کی

در و دیوار گھر کے شوخ رنگوں سے سجا رکھنا

ہم نے یہ سوچ کے چھیڑا تھا فسانہ گل کا

اس بہانے ہی ترے ذکر کا پہلو نکلے

نظر میں یادوں کے منظر سمیٹ کر رکھنا

میں جیسا چھوڑ کے آئی ہوں ویسا گھر رکھنا

ہوائیں کرتی ہیں سرگوشیاں سی آنگن میں

نہ جانے آئیں گے کس کے قدم چراغ جلے