کچھ اس طرح سے کہا مجھ سے بیٹھنے کے لیے

کہ جیسے بزم سے اس نے اٹھا دیا ہے مجھے

میں اپنے ہجر میں تھا مبتلا ازل سے مگر

ترے وصال نے مجھ سے ملا دیا ہے مجھے

زخم تلاش میں ہے نہاں مرہم دلیل

تو اپنا دل نہ ہار محبت بحال رکھ

چراغ ہائے تکلف بجھا دیے گئے ہیں

اٹھاؤ جام کہ پردے اٹھا دیے گئے ہیں

خود سے گزرے تو قیامت سے گزر جائیں گے ہم

یعنی ہر حال کی حالت سے گزر جائیں گے ہم

پیش زمیں رہوں کہ پس آسماں رہوں

رہتا ہوں اپنے ساتھ میں چاہے جہاں رہوں

اے خلش بول کیا یہی ہے خدا

یہ جو دل میں خلا سا رہتا ہے

جو مل گئے تو تونگر نہ مل سکے تو گدا

ہم اپنی ذات کے اندر چھپا دیے گئے ہیں

ممکن نہیں ہے شاید دونوں کا ساتھ رہنا

تیری خبر جب آئی اپنی خبر گئی ہے

رات اس بزم میں تصویر کے مانند تھے ہم

ہم سے پوچھے تو کوئی شمع کا جلنا کیا تھا

اے وقت تو کہیں بھی کسی کا ہوا ہے کیا

کیا تجھ کو دیکھنا تری ساعت کو دیکھنا

دبا سکا نہ صدا اس کی تیری بزم کا شور

خموش رہ کے بھی کوئی صدا بنا ہوا ہے

میں کہیں آؤں میں کہیں جاؤں

وقت جیسے رکا سا رہتا ہے