پوچھ کر کون دل دکھاتا ہے

حادثے کب بتا کے ہوتے ہیں

اس سے ہی تو چلتے ہیں کاروبار گلشن کے

وہ ہی رات رانی ہے وہ ہی گل ہزارہ ہے

میرے اشعار چرانے والو

کیا مرا درد چرا سکتے ہو

خاموشی میں رہنے والے لوگوں کو

سناٹے کی گونج سنائی دیتی ہے

اس سے پہلے کے چھین لیتے لوگ

ہم نے خوشیاں ہی دان میں دے دیں

کوئی آیا نہیں منانے ہمیں

ہم نے ناراض ہو کے دیکھ لیا

مجھ کو تنہائیوں نے مارا ہے

بھیڑ دیکھو مرے جنازے کی

کہاں پر کھو گئی اب ڈھونڈھتا ہوں

بھروسہ نام کی چابی ملی تھی

پہلے زخموں سے ہم نوازے گئے

پھر دلاسہ دیا گیا ہم کو

ان کے نخرے ہیں قافیے جیسے

ان کا غصہ ردیف جیسا ہے

جوہری کیوں نہیں پرکھ پایا

گولکنڈہ کی کھان تھے ہم تو

ہم نے پانی کہا تھا اور ان نے

پیاس دے دی ہے پیاس کے بدلے

کون بھلا اپنی مرضی سے بچھڑا تھا

دونوں کی اپنی اپنی مجبوری تھی

ادھورے رہ گئے ہم اس لئے بھی

کوئی ہم کو مکمل چاہیے تھا

تمہاری یاد کی بنجر زمیں پر

سخن کے پھول بوئے جا رہے ہیں

کچھ تو کہیے ہمارے بارے میں

کون ہیں ہم ہمیں پتہ تو چلے

آپ کو دیوتا سمجھتا تھا

آپ تو خوب دیوتا نکلے

یہی کل زخم میں تبدیل ہوں گے

بھرم جو عشق کے پالے گئے ہیں

ربط ٹوٹا تو یوں لگا جیسے

پنکھ نوچے گئے ہوں بلبل کے

آپ اپنی ہی میں قسمت سے چھلا جاتا ہوں

کیا سزا مجھ کو ملی ہے یہ بھلے ہونے کی

یوں سمجھئے غزل مکمل ہے

جب محبت بغل میں بیٹھی ہو