na jaane kah ga.e kyā aap muskurāne meñ

hai dil ko naaz ki jaan aa ga.ī fasāne meñ

na jaane kah gae kya aap muskurane mein

hai dil ko naz ki jaan aa gai fasane mein

mirī zindagī kī zīnat huī āfat-o-balā se

maiñ vo zulf-e-ḳham-ba-ḳham huuñ jo sañvar ga.ī havā se

meri zindagi ki zinat hui aafat-o-bala se

main wo zulf-e-KHam-ba-KHam hun jo sanwar gai hawa se

abhī se sub.h-e-gulshan raqs-farmā hai nigāhoñ meñ

abhī puurī naqāb ulTī nahīñ hai shām-e-sahrā ne

abhi se subh-e-gulshan raqs-farma hai nigahon mein

abhi puri naqab ulTi nahin hai sham-e-sahra ne

yaad haiñ aap ke toḌe hue paimāñ ham ko

kījiye aur na sharminda-e-ehsāñ ham ko

yaad hain aap ke toDe hue paiman hum ko

kijiye aur na sharminda-e-ehsan hum ko

giit hariyālī ke gā.eñge sisakte hue khet

mehnat ab ġhārat-e-jāgīr tak aa pahuñchī hai

git hariyali ke gaenge sisakte hue khet

mehnat ab ghaarat-e-jagir tak aa pahunchi hai

ye taaj ke saa.e meñ zar-o-sīm ke ḳhirman

kyuuñ ātish-e-kashkol-e-gadā se nahīñ Darte

ye taj ke sae mein zar-o-sim ke KHirman

kyun aatish-e-kashkol-e-gada se nahin Darte

guzrā hai kaun phuul khilātā ḳhirām se

'shādāb' aaj rāhguzar pā rahā huuñ maiñ

guzra hai kaun phul khilata KHiram se

'shadab' aaj rahguzar pa raha hun main

saḳht-jāñ vo huuñ ki maqtal se sar-afrāz aayā

kitnī talvāroñ ko detā huā āvāz aayā

saKHt-jaan wo hun ki maqtal se sar-afraaz aaya

kitni talwaron ko deta hua aawaz aaya