baiThegā to ruk jā.egī ye gardish-e-daurāñ

tū ḳhuuñ kī tarah jism meñ phirne kī adā siikh

baiThega to ruk jaegi ye gardish-e-dauran

tu KHun ki tarah jism mein phirne ki ada sikh

qatroñ se samundar kā banānā nahīñ mushkil

qatre meñ samundar ko samone kī adā siikh

qatron se samundar ka banana nahin mushkil

qatre mein samundar ko samone ki ada sikh

shauq-e-manzil mujhe yuuñ le ke uḌā

ḳhaar dekhe na rahguzar dekhī

shauq-e-manzil mujhe yun le ke uDa

KHar dekhe na rahguzar dekhi

ab dil meñ ārzū-e-chaman hī nahīñ rahī

qisse sune jo ham ne qafas meñ bahār ke

ab dil mein aarzu-e-chaman hi nahin rahi

qisse sune jo hum ne qafas mein bahaar ke

agar chaltā sahāroñ par hī 'rāġhib'

to chalne ke kabhī qābil na hotā

agar chalta sahaaron par hi 'raghib'

to chalne ke kabhi qabil na hota

ye sab māh-o-anjum mire vāste haiñ

magar is zamīñ par maiñ qaid-e-jahāñ huuñ

ye sab mah-o-anjum mere waste hain

magar is zamin par main qaid-e-jahan hun

ḳhayāl-o-vahm hai manzil yahāñ milī hai kise

chalā hai jo bhī usī rahguzar meñ rahtā hai

KHayal-o-wahm hai manzil yahan mili hai kise

chala hai jo bhi usi rahguzar mein rahta hai

aur baḌh jaatā hai dil meñ mire shauq-e-manzil

jab pareshān sī ye gard-e-safar hotī hai

aur baDh jata hai dil mein mere shauq-e-manzil

jab pareshan si ye gard-e-safar hoti hai