صادق الخیری کے افسانے

اکیلا درخت

ایک ایسے شخص کی کہانی ہے، جس کے تعلقات بہت ساری عورتوں سے تھے۔ جب اس کی شادی ہوئی تو اسے اپنی بیوی پر بڑا ناز ہوا اور وہ اس سے دل و جان سے محبت کرنے لگا۔ ایک روز جب وہ مال روڈسے ٹہل کر لوٹتا ہے تو اسے اپنی بیوی گم سم سی نظر آتی ہے۔ پوچھنے پر پتہ چلا کہ اسے اس کا کوئی پرانا عاشق یاد آ رہا ہے۔

دیوتا کی مسکراہٹ

یہ ایک ایسے فرد کی کہانی ہے، جو اپنےکلرک ساتھیوں کے ساتھ ایلی فینٹا جزیرے پر سیر کے لیے جاتا ہے۔ اس گروہ میں ایک سیاح لڑکی بھی ہے۔ وہ اس کے ارد گرد چکر لگاتا ہے۔ مگر لڑکی کوئی نوٹس نہیں لیتی۔ گھومتے گھومتے وہ ایک دیو کے سامنے جا کھڑے ہوتے ہیں۔ اسے دیکھ کر لڑکے کو لگتا ہے کہ دیو کے جسم کا بالائی حصہ نسوانی اور نچلا حصہ مردانہ ہے۔ اتفاق سے وہ لوگ اور وہ لڑکی جزیرے پر ہی چھوٹ جاتے ہیں۔ وہ شخص جب اس لڑکی کے ساتھ زبردستی کرتا ہے تو دیکھتا ہے کہ اس لڑکی کے تن کا اوپری حصہ زنانہ اور نیچے کا حصہ مردانہ ہے۔

دھنک

یہ ایک جج کے ایسے بیٹے کی کہانی ہے، جو اپنے شوق کے لیے بغیر کوئی امتحان پاس کئے ریلوے میں بھرتی ہو جاتا ہے۔ اسے ایک اسٹیشن پر ٹکٹ کلکٹر کی پوسٹ دی جاتی ہے۔ وہاں کام کرتے ہوئے اسے ریلوے کی بہتری کے طرح طرح کے خیال آتے رہتے ہیں۔ ان میں سے ایک خیال پر وہ عمل بھی کرتا ہے۔ مگر اس عمل کو کرتے ہوئے ایک روز ایک ایسا حادثہ پیش آتا ہے کہ اس کی آنے والی زندگی کے سبھی خواب بکھر جاتے ہیں۔