jurm-e-mohabbat kī milī ham ko ye pādāsh

apne kāñdhe par chale le kar apnī laash

jurm-e-mohabbat ki mili hum ko ye padash

apne kandhe par chale le kar apni lash

āñgan ke ik peḌ kī ThanDī mīThī chhāñv

shahr meñ jaise aa gayā chal kar merā gaañv

aangan ke ek peD ki ThanDi miThi chhanw

shahr mein jaise aa gaya chal kar mera ganw

rāteñ jañgal kī tarah aur din registān

merī jīvan yātrā kaise ho āsān

raaten jangal ki tarah aur din registan

meri jiwan yatra kaise ho aasan

mere chāroñ or the tarah tarah ke log

phir bhī mujh ko lag gayā tanhā.ī kā rog

mere chaaron or the tarah tarah ke log

phir bhi mujh ko lag gaya tanhai ka rog

ḳhush-fahmī kī dhuup meñ raushan jhūTī aas

añdhiyāre meñ reñgtā har sach kā vishvās

KHush-fahmi ki dhup mein raushan jhuTi aas

andhiyare mein rengta har sach ka wishwas