آج پھر ماں مجھے مارے گی بہت رونے پر

آج پھر گاؤں میں آیا ہے کھلونے والا

آج سمے کا پہیہ گھوما پیچھے سب کچھ چھوٹ گیا

ایک ستارہ بھارت ماتا کی آنکھوں کا ٹوٹ گیا

اب بجلیوں کا خوف بھی دل سے نکل گیا

خود میرا آشیاں مری آہوں سے جل گیا

ایسی ضد کا کیا ٹھکانا اپنا مذہب چھوڑ کر

میں ہوا کافر تو وہ کافر مسلماں ہو گیا

بدلا ہوا ہے آج مرے آنسوؤ کا رنگ

کیا دل کے زخم کا کوئی ٹانکا ادھڑ گیا

بہن کا پیار جدائی سے کم نہیں ہوتا

اگر وہ دور بھی جائے تو غم نہیں ہوتا

بے پردگی پڑوس کی جس کو عزیز ہو

دیوار اپنے گھر کی وہ کیسے بنائے گا

بتوں کی چاہ میں ہم تو عذاب ہی میں رہے

شب فراق کٹی روز انتظار آیا

چمن سے کون چلا ہے خموشیاں لے کر

کلی کلی تڑپ اٹھی ہے سسکیاں لے کر

چمن سے رخصت گل ہے نہ لوٹنے کے لیے

تو بلبلوں کا تڑپنا یہاں پہ جائز ہے

غیر کو درد سنانے کی ضرورت کیا ہے

اپنے جھگڑے میں زمانے کی ضرورت کیا ہے

اس مہرباں نظر کی عنایت کا شکریا

تحفہ دیا ہے عید پہ ہم کو جدائی کا

اس سے بڑھ کر اور کیا ہے سادہ لوحی عشق کی

آپ نے وعدہ کیا اور ہم کو باور ہو گیا

جو رات دن مرے مرنے کی کر رہے تھے دعا

وہ رو رہے ہیں جنازے میں ہچکیاں لے کر

کفن نہ میرا ہٹاؤ زمانہ دیکھ نہ لے

میں سو گیا ہوں تمہاری نشانیاں لے کر

خوش آمدید وہ آیا ہماری چوکھٹ پر

بہار جس کے قدم کا طواف کرتی ہے

کوئی آیا تھا دل کی بستی میں

دل مرا جھومتا تھا مستی میں

کچھ خوشیاں کچھ آنسو دے کر ٹال گیا

جیون کا اک اور سنہرا سال گیا

میں نے سامان سفر باندھ کے پھر کھول دیا

ایک تصویر نے دیکھا مجھے الماری سے

قاتل تری گلی بھی بدایوں سے کم نہیں

جس کے قدم قدم پہ مزار شہید ہے

سنا ہے کہ دلی میں الو کے پٹھے

رگ گل سے بلبل کے پر باندھتے ہیں

تماشا دیکھ رہے تھے جو ڈوبنے کا مرے

مری تلاش میں نکلے ہیں کشتیاں لے کر

تم مٹا سکتے نہیں دل سے مرا نام کبھی

پھر کتابوں سے مٹانے کی ضرورت کیا ہے

تمہارے گھر میں دروازہ ہے لیکن تمہیں خطرے کا اندازہ نہیں ہے

ہمیں خطرے کا اندازہ ہے لیکن ہمارے گھر میں دروازہ نہیں ہے

ان کو بھولے ہوئے اپنے ہی ستم یاد آئے

جب کسی غیر نے تڑپایا تو ہم یاد آئے