بچہ بولا دیکھ کر مسجد عالی شان

اللہ تیرے ایک کو اتنا بڑا مکان

میں رویا پردیس میں بھیگا ماں کا پیار

دکھ نے دکھ سے بات کی بن چٹھی بن تار

گھر کو کھوجیں رات دن گھر سے نکلے پاؤں

وہ رستہ ہی کھو گیا جس رستے تھا گاؤں

سب کی پوجا ایک سی الگ الگ ہر ریت

مسجد جائے مولوی کوئل گائے گیت

سیدھا سادھا ڈاکیہ جادو کرے مہان

ایک ہی تھیلے میں بھرے آنسو اور مسکان

وہ صوفی کا قول ہو یا پنڈت کا گیان

جتنی بیتے آپ پر اتنا ہی سچ مان

نقشہ لے کر ہاتھ میں بچہ ہے حیران

کیسے دیمک کھا گئی اس کا ہندوستان

مجھ جیسا اک آدمی میرا ہی ہم نام

الٹا سیدھا وہ چلے مجھے کرے بد نام

نینوں میں تھا راستہ ہردے میں تھا گاؤں

ہوئی نہ پوری یاترا چھلنی ہو گئے پاؤں

میں بھی تو بھی یاتری چلتی رکتی ریل

اپنے اپنے گاؤں تک سب کا سب سے میل

چڑیا نے اڑ کر کہا میرا ہے آکاش

بولا شکھرا ڈال سے یوں ہی ہوتا کاش

اس جیسا تو دوسرا ملنا تھا دشوار

لیکن اس کی کھوج میں پھیل گیا سنسار