ایسا نہ ہو یہ رات کوئی حشر اٹھا دے

اٹھتا ہے ستاروں سے دھواں جاگتے رہنا

یہ صحن گلستاں نہیں مقتل ہے رفیقو!

ہر شاخ ہے تلوار یہاں، جاگتے رہنا

کچھ درد کے مارے ہیں کچھ ناز کے ہیں پالے

کچھ لوگ ہیں ہم جیسے کچھ لوگ ہیں تم جیسے

شاید کسی کی یاد کا موسم پھر آ گیا

پہلو میں دل کی طرح دھڑکنے لگی ہے شام

بے داروں کی دنیا کبھی لٹتی نہیں دوراںؔ

اک شمع لئے تم بھی یہاں جاگتے رہنا

وہ لہو پی کر بڑے انداز سے کہتا ہے یہ

غم کا ہر طوفان اس کے گھر کے باہر آئے گا

بہتی نہیں ہے مرد کی آنکھوں سے جوئے اشک

لیکن ہمیں بتاؤ کہ ہم کس لئے ہنسیں

سب مستیوں میں پھینکو نہ پتھر ادھر ادھر

دیوانو! اس دیار میں شیشے کے گھر بھی ہیں

ہم شاعر حیات ہیں ہم شاعر حیات!

دوراںؔ وہ سرخ رنگ کا پرچم تو دو ہمیں

یہ زیست کہ ہے پھول سی مٹ جائے بلا سے

گلچیں سے مگر بر سر پیکار ہی رہئے

پیوند کی طرح نظر آتا ہے بد نما

پختہ مکان کچے گھروں کے ہجوم میں

ان مکانوں میں بھی انسان ہی رہتے ہوں گے

رونقیں جن میں نہیں آپ کی محفل کی سی