han mah-e-nau sunen hum us ka nam

haañ mah-e-nau suneñ ham us kā naam

jis ko tū jhuk ke kar rahā hai salām

do din aaya hai tū nazar dam-e-sub.h

yahī andāz aur yahī andām

baare do din kahāñ rahā ġhā.eb

banda aajiz hai gardish-e-ayyām

uḌ ke jaatā kahāñ ki tāroñ kā

āsmāñ ne bichhā rakhā thā daam

marhabā ai surūr-e-ḳhās-ḳhavās

habbazā ai nashāt-e-ām-avām

uzr meñ tiin din na aane ke

le ke aaya hai iid kā paiġhām

us ko bhūlā na chāhiye kahnā

sub.h jo jaa.e aur aa.e shaam

ek maiñ kyā ki sab ne jaan liyā

terā āġhāz aur tirā anjām

rāz-e-dil mujh se kyoñ chhupātā hai

mujh ko samjhā hai kyā kahīñ nammām

jāntā huuñ ki aaj duniyā meñ

ek hī hai ummīd-gāh-e-anām

maiñ ne maanā ki tū hai halqa-ba-gosh

'ġhālib' us kā magar nahīñ hai ġhulām

jāntā huuñ ki jāntā hai tū

tab kahā hai ba-tarz-e-istifhām

mehr-e-tābāñ ko ho to ho ai maah

qurb-e-har-roza bar-sabīl-e-davām

**

tujh ko kyā paaya rū-shanāsī kā

juz ba-taqrīb-e-īd-e-māh-e-siyām

jāntā huuñ ki is ke faiz se tū

phir banā chāhtā hai māh-e-tamām

maah ban māhtāb ban maiñ kaun

mujh ko kyā baañT degā tū in.aam

merā apnā judā mo.āmla hai

aur ke len-den se kyā kaam

hai mujhe ārzū-e-baḳhshish-e-ḳhās

gar tujhe hai ummīd-e-rahmat-e-ām

jo ki baḳhshegā tujh ko far faroġh

kyā na degā mujhe mai-e-gulfām

jab ki chaudah manāzil-e-falakī

kar chuke qat.a terī tezī-gām

tere partav se hoñ faroġh-pazīr

kuue va mushkūe va sahn-o-manzar-o-bām

dekhnā mere haath meñ labrez

apnī sūrat kā ek billorīñ jaam

phir ġhazal kī ravish pe chal niklā

tausan-e-tab.a chāhtā thā lagām

zahr-e-ġham kar chukā thā merā

tujh ko kis ne kahā ki ho badnām

mai hī phir kyoñ na maiñ piye jā.ūñ

ġham se jab ho ga.ī ho ziist harām

bosa kaisā yahī ġhanīmat hai

ki na samjheñ vo lazzat-e-dushnām

ka.abe meñ jā bajā.eñge nāqūs

ab to bāñdhā hai dair meñ ehrām

is qadah kā hai daur mujh ko naqd

charḳh ne lī hai jis se gardish vaam

bosa dene meñ un ko hai inkār

dil ke lene meñ jin ko thā ibrām

chheḌtā huuñ ki un ko ġhussa aa.e

kyoñ rakhūñ varna 'ġhālib' apnā naam

kah chukā maiñ to sab kuchh ab tū kah

ai parī-chehra paik-e-tez-ḳhirām

kaun hai jis ke dar pe nāsiba sā

haiñ mah-o-mehr-o-zohra-o-bahrām

tū nahīñ jāntā to mujh se sun

nām-e-shāhansha-e-buland-maqām

qibla-e-chashm-o-dil bahādur-shāh

maz.har-e-zul-jalāl val-ikarām

shahsavār-e-tarīqa-e-insāf

nau-bahār-e-hadīqa-e-islām

jis kā har fe.al sūrat-e-e.ajāz

jis kā har qaul ma.anī-e-ilhām

bazm meñ mezbān-e-qaisar-o-jam

razm meñ ūstād-e-rustam-o-sām

ai tirā lutf zindagī-afzā

ai tirā ahd farruḳhī farjām

chashm-e-bad-dūr ḳhusravāna shikoh

au-hashallāh ārifāna kalām

jāñ-nisāroñ meñ tere qaisar-e-rōm

jur.a-ḳhvāroñ meñ tere murshid-e-jām

vāris-e-mulk jānte haiñ tujhe

īraj-o-tor-o-ḳhusrav-o-bahrām

zor-e-bāzū meñ mānte haiñ tujhe

gev-o-godarz-o-bīzhan-o-rihām

marhabā moshgāfī-e-nāvak

āfrīñ āb-dārī-e-samsām

tiir ko tere tīr-e-ġhair-hadaf

teġh ko terī teġh-e-ḳhasam-e-niyām

ra.ad kā kar rahī hai kyā dam band

barq ko de rahā hai kyā ilzām

tere fīl-e-girāñ-jasad kī sadā

tere raḳhsh-e-subuk-ināñ kā ḳhirām

fan-e-sūrat-garī meñ terā guzar

gar na rakhtā ho dast-gāh-e-tamām

us ke mazrūb ke sar-o-tan se

kyoñ numāyāñ ho sūrat-e-idġhām

jab azal meñ raqam-pazīr hue

saf.ha-hā-e-layālī-o-ayyām

aur un aurāq meñ ba-kilk-e-qazā

mujmalan mundaraj hue ahkām

likh diyā shāhidoñ ko āshiq-kush

likh diyā āshiqoñ ko dushman-e-kām

āsmāñ ko kahā gayā ki kaheñ

gumbad-e-tez-gard nīlī-fām

hukm-e-nātiq likhā gayā ki likheñ

ḳhaal ko daana aur zulf ko daam

ātish-o-āb-o-bād-o-ḳhāk ne lī

vaz.a-e-soz-o-nam-o-ram-o-ārām

mehr-e-raḳhshāñ kā naam ḳhusrav-e-roz

māh-e-tābāñ kā ism shahna-e-shām

terī tauqī'-e-saltanat ko bhī

dī ba-dastūr sūrat-e-arqām

kātib-e-hukm ne ba-mūjib-e-hukm

is raqam ko diyā tarāz-e-davām

hai azal se ravā.ī-e-āġhāz

ho abad tak rasā.ī-e-anjām

han mah-e-nau sunen hum us ka nam

jis ko tu jhuk ke kar raha hai salam

do din aaya hai tu nazar dam-e-subh

yahi andaz aur yahi andam

bare do din kahan raha ghaeb

banda aajiz hai gardish-e-ayyam

uD ke jata kahan ki taron ka

aasman ne bichha rakha tha dam

marhaba ai surur-e-KHas-KHawas

habbaza ai nashat-e-am-awam

uzr mein tin din na aane ke

le ke aaya hai id ka paigham

us ko bhula na chahiye kahna

subh jo jae aur aae sham

ek main kya ki sab ne jaan liya

tera aaghaz aur tera anjam

raaz-e-dil mujh se kyon chhupata hai

mujh ko samjha hai kya kahin nammam

jaanta hun ki aaj duniya mein

ek hi hai ummid-gah-e-anam

main ne mana ki tu hai halqa-ba-gosh

'ghaalib' us ka magar nahin hai ghulam

jaanta hun ki jaanta hai tu

tab kaha hai ba-tarz-e-istifham

mehr-e-taban ko ho to ho ai mah

qurb-e-har-roza bar-sabil-e-dawam

aa

tujh ko kya paya ru-shanasi ka

juz ba-taqrib-e-id-e-mah-e-siyam

jaanta hun ki is ke faiz se tu

phir bana chahta hai mah-e-tamam

mah ban mahtab ban main kaun

mujh ko kya banT dega tu inam

mera apna juda moamla hai

aur ke len-den se kya kaam

hai mujhe aarzu-e-baKHshish-e-KHas

gar tujhe hai ummid-e-rahmat-e-am

jo ki baKHshega tujh ko far farogh

kya na dega mujhe mai-e-gulfam

jab ki chaudah manazil-e-falaki

kar chuke qata teri tezi-gam

tere partaw se hon farogh-pazir

kue wa mushkue wa sahn-o-manzar-o-baam

dekhna mere hath mein labrez

apni surat ka ek billorin jam

phir ghazal ki rawish pe chal nikla

tausan-e-taba chahta tha lagam

zahr-e-gham kar chuka tha mera

tujh ko kis ne kaha ki ho badnam

mai hi phir kyon na main piye jaun

gham se jab ho gai ho zist haram

bosa kaisa yahi ghanimat hai

ki na samjhen wo lazzat-e-dushnam

kabe mein ja bajaenge naqus

ab to bandha hai dair mein ehram

is qadah ka hai daur mujh ko naqd

charKH ne li hai jis se gardish wam

bosa dene mein un ko hai inkar

dil ke lene mein jin ko tha ibram

chheDta hun ki un ko ghussa aae

kyon rakhun warna 'ghaalib' apna nam

kah chuka main to sab kuchh ab tu kah

ai pari-chehra paik-e-tez-KHiram

kaun hai jis ke dar pe nasiba sa

hain mah-o-mehr-o-zohra-o-bahram

tu nahin jaanta to mujh se sun

nam-e-shahansha-e-buland-maqam

qibla-e-chashm-o-dil bahadur-shah

mazhar-e-zul-jalal wal-ikaram

shahsawar-e-tariqa-e-insaf

nau-bahaar-e-hadiqa-e-islam

jis ka har feal surat-e-eajaz

jis ka har qaul mani-e-ilham

bazm mein mezban-e-qaisar-o-jam

razm mein ustad-e-rustam-o-sam

ai tera lutf zindagi-afza

ai tera ahd farruKHi farjam

chashm-e-bad-dur KHusrawana shikoh

au-hashallah aarifana kalam

jaan-nisaron mein tere qaisar-e-room

jura-KHwaron mein tere murshid-e-jam

waris-e-mulk jaante hain tujhe

iraj-o-tor-o-KHusraw-o-bahram

zor-e-bazu mein mante hain tujhe

gew-o-godarz-o-bizhan-o-riham

marhaba moshgafi-e-nawak

aafrin aab-dari-e-samsam

tir ko tere tir-e-ghair-hadaf

tegh ko teri tegh-e-KHasam-e-niyam

rad ka kar rahi hai kya dam band

barq ko de raha hai kya ilzam

tere fil-e-giran-jasad ki sada

tere raKHsh-e-subuk-inan ka KHiram

fan-e-surat-gari mein tera guzar

gar na rakhta ho dast-gah-e-tamam

us ke mazrub ke sar-o-tan se

kyon numayan ho surat-e-idgham

jab azal mein raqam-pazir hue

safha-ha-e-layali-o-ayyam

aur un auraq mein ba-kilk-e-qaza

mujmalan mundaraj hue ahkaam

likh diya shahidon ko aashiq-kush

likh diya aashiqon ko dushman-e-kaam

aasman ko kaha gaya ki kahen

gumbad-e-tez-gard nili-fam

hukm-e-natiq likha gaya ki likhen

KHal ko dana aur zulf ko dam

aatish-o-ab-o-baad-o-KHak ne li

waza-e-soz-o-nam-o-ram-o-aram

mehr-e-raKHshan ka nam KHusraw-e-roz

mah-e-taban ka ism shahna-e-sham

teri tauqi'-e-saltanat ko bhi

di ba-dastur surat-e-arqam

katib-e-hukm ne ba-mujib-e-hukm

is raqam ko diya taraaz-e-dawam

hai azal se rawai-e-aghaz

ho abad tak rasai-e-anjam