ishrati ghar ki mohabbat ka maza bhul gae

'ishratī' ghar kī mohabbat kā mazā bhuul ga.e

khā ke london kī havā ahd-e-vafā bhuul ga.e

pahuñche hotel meñ to phir iid kī parvā na rahī

cake ko chakh ke seva.iyoñ kā mazā bhuul ga.e

bhūle maañ baap ko aġhyār ke charnoñ meñ vahāñ

sāya-e-kufr paḌā nūr-e-ḳhudā bhuul ga.e

mom kī putliyoñ par aisī tabī.at pighlī

chaman-e-hind kī pariyoñ kī adā bhuul ga.e

kaise kaise dil nāzuk ko dukhāyā tum ne

ḳhabar-e-faisla-e-roz-e-jazā bhuul ga.e

buḳhl hai ahl-e-vatan se jo vafā meñ tum ko

kyā buzurgoñ kī vo sab jūd-o-atā bhuul ga.e

naql maġhrib kī tarañg aa.ī tumhāre dil meñ

aur ye nukta ki mirī asl hai kyā bhuul ga.e

kyā ta.ajjub hai jo laḌkoñ ne bhulāyā ghar ko

jab ki būḌhe ravish-e-dīn-e-ḳhudā bhuul ga.e

'ishrati' ghar ki mohabbat ka maza bhul gae

kha ke london ki hawa ahd-e-wafa bhul gae

pahunche hotel mein to phir id ki parwa na rahi

cake ko chakh ke sewaiyon ka maza bhul gae

bhule man bap ko aghyar ke charnon mein wahan

saya-e-kufr paDa nur-e-KHuda bhul gae

mom ki putliyon par aisi tabiat pighli

chaman-e-hind ki pariyon ki ada bhul gae

kaise kaise dil nazuk ko dukhaya tum ne

KHabar-e-faisla-e-roz-e-jaza bhul gae

buKHl hai ahl-e-watan se jo wafa mein tum ko

kya buzurgon ki wo sab jud-o-ata bhul gae

naql maghrib ki tarang aai tumhaare dil mein

aur ye nukta ki meri asl hai kya bhul gae

kya tajjub hai jo laDkon ne bhulaya ghar ko

jab ki buDhe rawish-e-din-e-KHuda bhul gae