udhar saba ne KHabar di aa kar ki aaj abr-e-bahaar aaya

udhar sabā ne ḳhabar dī aa kar ki aaj abr-e-bahār aayā

idhar garebāñ siye hue maiñ chaman meñ dīvāna-vār aayā

duā hai apnī yahī shab-e-ġham na ho kabhī iztirāb-e-dil kam

ye zindagī zindagī kahāñ phir jo dil ko apne qarār aayā

gila sitam kā jafā kā shikva zabāñ pe aayā tumhīñ kaho kab

ye kyuuñ hai phir ham se sargirānī ye dil meñ kaise ġhubār aayā

sukūn ho kis tarah mayassar nasīb ho chain kaise āḳhir

na maut aa.ī marīz-e-ġham ko na vo shab-e-intizār aayā

na jaane kyuuñ josh-e-girya ab ke bajā.e ghaTne ke baḌh rahā hai

vagarna mahfil se yuuñ to terī maiñ bārhā ashk-bār aayā

udhar saba ne KHabar di aa kar ki aaj abr-e-bahaar aaya

idhar gareban siye hue main chaman mein diwana-war aaya

dua hai apni yahi shab-e-gham na ho kabhi iztirab-e-dil kam

ye zindagi zindagi kahan phir jo dil ko apne qarar aaya

gila sitam ka jafa ka shikwa zaban pe aaya tumhin kaho kab

ye kyun hai phir hum se sargirani ye dil mein kaise ghubar aaya

sukun ho kis tarah mayassar nasib ho chain kaise aaKHir

na maut aai mariz-e-gham ko na wo shab-e-intizar aaya

na jaane kyun josh-e-girya ab ke bajae ghaTne ke baDh raha hai

wagarna mahfil se yun to teri main barha ashk-bar aaya