bahaar-e-jaan-faza hai yar ka KHat

bahār-e-jāñ-fazā hai yaar kā ḳhat

banā tār-e-nazar ruḳhsār kā ḳhat

huā paara dil-e-ḳhud-kār kā ḳhat

na aayā par buā ḳhūñḳhār kā ḳhat

surūr-ārā nahīñ ruḳhsār kā ḳhat

paḌhā jaatā nahīñ mai-ḳhvār kā ḳhat

kisī kaTnī kī bad-kārī kā shar hai

sharārat se hai pur bad-kār kā ḳhat

bahā dil ḳhuun ho ho kar na aayā

mahīna ho gayā sarkār kā ḳhat

bigāḌā naqsh-e-ulfat bad-guhar ne

dikhā kar gauhar-e-murdār kā ḳhat

buā sad-haif hai pyāre ne mujh ko

na likhā ek din bhī pyaar kā ḳhat

ho ḳhush-ḳhabarī tujhe ai bulbul-e-dil

sabā laa.ī gul-e-gulzār kā ḳhat

batā dete haiñ surḳhī dekh kar ham

ki hai ye kasbī-e-bad-kār kā ḳhat

uḌāyā tiir sā shauq-e-nazar ne

kisī ke tālib-e-dīdār kā ḳhat

chaḌhā begam ko aisā pyaar kā jin

girī vo dekhte hī yaar kā ḳhat

buā inkār meñ iqrār kaisā

ḳhat-e-taqdīr hai inkār kā ḳhat

dikhātī kyuuñ na begam sab ko baajī

jo hotā tāle'-e-bedār kā ḳhat

abhī shikva na kar paa.ī thī 'anqā'

ki laayā Dākiyā sarkār kā ḳhat

bahaar-e-jaan-faza hai yar ka KHat

bana tar-e-nazar ruKHsar ka KHat

hua para dil-e-KHud-kar ka KHat

na aaya par bua KHunKHar ka KHat

surur-ara nahin ruKHsar ka KHat

paDha jata nahin mai-KHwar ka KHat

kisi kaTni ki bad-kari ka shar hai

shararat se hai pur bad-kar ka KHat

baha dil KHun ho ho kar na aaya

mahina ho gaya sarkar ka KHat

bigaDa naqsh-e-ulfat bad-guhar ne

dikha kar gauhar-e-murdar ka KHat

bua sad-haif hai pyare ne mujh ko

na likha ek din bhi pyar ka KHat

ho KHush-KHabari tujhe ai bulbul-e-dil

saba lai gul-e-gulzar ka KHat

bata dete hain surKHi dekh kar hum

ki hai ye kasbi-e-bad-kar ka KHat

uDaya tir sa shauq-e-nazar ne

kisi ke talib-e-didar ka KHat

chaDha begam ko aisa pyar ka jin

giri wo dekhte hi yar ka KHat

bua inkar mein iqrar kaisa

KHat-e-taqdir hai inkar ka KHat

dikhati kyun na begam sab ko baji

jo hota tale'-e-bedar ka KHat

abhi shikwa na kar pai thi 'anqa'

ki laya Dakiya sarkar ka KHat