کوئی مر جائے یا ہو جان بہ لب

کوئی مر جائے یا ہو جان بہ لب

اپنے مطلب سے ہے انہیں مطلب

رکھتے لالہ ہیں رنڈیاں گھر میں

گھر کی بیوی کے سامنے یہ غضب

دولہا بھائی سے دل لگی بازی

کرو دلہن بوا مگر بہ ادب

کام عجلت بگاڑ دیتی ہے

پوچھتے ہیں بگڑ بگڑ کے سبب

شیخ جی ہاتھ پر دھرا لوں گی

میں نہ مانوں گی آپ کی اب تب

خام ہے یہ ادھیڑ بن گوئیاں

چھوٹتی ہے میاں سے کسبی کب

تیری لونڈی کی یہ دعا ہے تجھے

ہو ترقی میاں بڑھے منصب

تیری مستانہ چال پر باجی

گر پھڑک جائیں وہ تو کیا ہے عجب

قطع کر دے گا نیش افعی مو

چھوڑ دو ورنہ عادت عقرب

کسی ڈھب سے نگوڑی آ جائے

جانتی ہوں نواب کا مطلب

ہے یقین آج تو موئی عنقا

آئے گی آدھی رات تک اغلب