koi mar jae ya ho jaan-ba-lab

koī mar jaa.e yā ho jān-ba-lab

apne matlab se hai unheñ matlab

rakhte laala haiñ ranDiyāñ ghar meñ

ghar kī biivī ke sāmne ye ġhazab

dūlhā bhaa.ī se dil-lagī baazī

karo dulhan buā magar ba-adab

kaam ujlat bigāḌ detī hai

pūchhte haiñ bigaḌ bigaḌ ke sabab

shaiḳh-jī haath par dharā lūñgī

maiñ na mānuñgī aap kī ab-tab

ḳhaam hai ye udheḌ-bun guyyāñ

chhūTtī hai miyāñ se kasbī kab

terī lauñDī kī ye duā hai tujhe

ho taraqqī miyāñ baḌhe mansab

terī mastāna chaal par baajī

gar phaḌak jaa.eñ vo to kyā hai ajab

qat.a kar degā nīsh-e-af.ī-mū

chhoḌ do varna ādat-e-aqrab

kisī Dhab se nigoḌī aa jaa.e

jāntī huuñ navāb kā matlab

hai yaqīn aaj to muī anqā

aa.egī aadhī raat tak aġhlab

koi mar jae ya ho jaan-ba-lab

apne matlab se hai unhen matlab

rakhte lala hain ranDiyan ghar mein

ghar ki biwi ke samne ye ghazab

dulha bhai se dil-lagi bazi

karo dulhan bua magar ba-adab

kaam ujlat bigaD deti hai

puchhte hain bigaD bigaD ke sabab

shaiKH-ji hath par dhara lungi

main na manungi aap ki ab-tab

KHam hai ye udheD-bun guyyan

chhuTti hai miyan se kasbi kab

teri launDi ki ye dua hai tujhe

ho taraqqi miyan baDhe mansab

teri mastana chaal par baji

gar phaDak jaen wo to kya hai ajab

qata kar dega nish-e-afi-mu

chhoD do warna aadat-e-aqrab

kisi Dhab se nigoDi aa jae

jaanti hun nawab ka matlab

hai yaqin aaj to mui anqa

aaegi aadhi raat tak aghlab