lahore ki hawas hai na multan ki hawas

lahore kī havas hai na multān kī havas

aTkī huuñ ik muġhal se hai tūrān kī havas

rakkhā hai jaise sog dogānā ne yaar kā

missī kī kuchh havas hai na kuchh paan kī havas

mujh ko chhuā to khā.ūñgī almās kuuT kar

dil kī rahegī dil hī maiñ marjān kī havas

chāñdī to kyā maiñ sone meñ mañDhvā duuñ ai buā

ho Dholne kī tujh ko jo qur.ān kī havas

arzī lagā duuñ jā ke adālat meñ mehr kī

haañ le marūñ jo un ko ho bohtān kī havas

mujh se kiyā nigoḌe ne bī raat raat bhar

to bhī miTī na us mue shaitān kī havas

aulād jītī-jāgtī jam jam ho us ke ghar

puurī ḳhudā kare mire be-jān kī havas

ai 'jān' ab bulā le vo detī hai tujh pe jaan

miTTī meñ to milā na banī jaan kī havas

lahore ki hawas hai na multan ki hawas

aTki hun ek mughal se hai turan ki hawas

rakkha hai jaise sog dogana ne yar ka

missi ki kuchh hawas hai na kuchh pan ki hawas

mujh ko chhua to khaungi almas kuT kar

dil ki rahegi dil hi main marjaan ki hawas

chandi to kya main sone mein manDhwa dun ai bua

ho Dholne ki tujh ko jo quran ki hawas

arzi laga dun ja ke adalat mein mehr ki

han le marun jo un ko ho bohtan ki hawas

mujh se kiya nigoDe ne bi raat raat bhar

to bhi miTi na us mue shaitan ki hawas

aulad jiti-jagti jam jam ho us ke ghar

puri KHuda kare mere be-jaan ki hawas

ai 'jaan' ab bula le wo deti hai tujh pe jaan

miTTi mein to mila na bani jaan ki hawas