munh pe kya puchhna yusuf se bua mere baad

muñh pe kyā pūchhnā yūsuf se buā mere baad

ishq meñ naam zuleḳhā kā huā mere baad

raat ko ḳhvāb meñ lailā ne kahā bandī se

tū ne phir zinda kiyā naam mirā mere baad

sach maiñ kahtī huuñ nabī-baḳhsh burā hai dāmād

rakkhe izzat mirī bachchī kī ḳhudā mere baad

kār-ḳhāne meñ ḳhudā ke nahīñ kuchh daḳhl buā

bachcha tum pahle janīñ byaah huā mere baad

muñh pe jo chāhatīñ kah letī burā yā ki bhalā

un se baajī ko na karnā thā gilā mere baad

bhayyā farhād hī the jaan jo dī shīrīñ par

tum nahīñ aise jo dikhlāo vafā mere baad

bholī kis birte pe ho yaad rahe ai banno

is nasīhat kā uThāoge mazā mere baad

jiitī jab tak huuñ maiñ hai saarī mohabbat sāhab

aise tum byaah karoge na bhalā mere baad

dil yatīmoñ kā bahut hotā hai nāzuk banoñ

jān'-sāhab ko ghuḌuknā na zarā mere baad

munh pe kya puchhna yusuf se bua mere baad

ishq mein nam zuleKHa ka hua mere baad

raat ko KHwab mein laila ne kaha bandi se

tu ne phir zinda kiya nam mera mere baad

sach main kahti hun nabi-baKHsh bura hai damad

rakkhe izzat meri bachchi ki KHuda mere baad

kar-KHane mein KHuda ke nahin kuchh daKHl bua

bachcha tum pahle janin byah hua mere baad

munh pe jo chahatin kah leti bura ya ki bhala

un se baji ko na karna tha gila mere baad

bhayya farhad hi the jaan jo di shirin par

tum nahin aise jo dikhlao wafa mere baad

bholi kis birte pe ho yaad rahe ai banno

is nasihat ka uThaoge maza mere baad

jiti jab tak hun main hai sari mohabbat sahab

aise tum byah karoge na bhala mere baad

dil yatimon ka bahut hota hai nazuk banon

jaan'-sahab ko ghuDukna na zara mere baad