پیسہ تھا پاس رہتے تھے ہر آن آشنا

پیسہ تھا پاس رہتے تھے ہر آن آشنا

یا دور دور کرتے ہیں اے جان آشنا

ایسا لہو زمانے کا اب ہو گیا سفید

دشمن ہوئے ہیں جو تھے مری جان آشنا

دیکھوں گی بے قرار ہوں مرتی ہوں سچ یہ ہے

آنکھیں ہیں دل ہے جان ہے ایمان آشنا

ہرگز نہیں نگوڑے خصم میں ذرا وہ بات

اس دل کے جو نکالے گا ارمان آشنا

قالب ہوں جن کے دو اجی اور ایک جان ہو

وہ آشنا پہ ہوتے ہیں قربان آشنا

اے جانؔ عاشقانہ کہو طور کی طرح

ہیں جن محاوروں سے مرے کان آشنا