ye dil masos ke chup bhi nahin raha jata

ye dil masos ke chup bhī nahīñ rahā jaatā

gila jo kartī huuñ chāhat kā hai mazā jaatā

lagī hai aag mohabbat kī dil meñ aa ke bujhā

dogānā jaan ḳhudā kā hai ghar jalā jaatā

jo suntā martā hai farhād logo shīrīñ par

vo bis kī gāñTh thā ḳhusrau bhī zahr khā jaatā

maiñ baat kartī jo apnoñ meñ tum se ai sāhab

zalīl hotī ye bandī tumhārā kyā jaatā

vo ġham-zadī huī duniyā meñ ai husainī jaan

ki mere haal kā hai marsiya paḌhā jaatā

ḳhudā dikhā.e na peḌū kī aañch kā sadma

ye vo julāpā hai hargiz sahā nahīñ jaatā

jo fikr hotī hai roTī kī she'r kahne meñ

burā bhalā yūñhī ai 'jān' hai bakā jaatā

ye dil masos ke chup bhi nahin raha jata

gila jo karti hun chahat ka hai maza jata

lagi hai aag mohabbat ki dil mein aa ke bujha

dogana jaan KHuda ka hai ghar jala jata

jo sunta marta hai farhad logo shirin par

wo bis ki ganTh tha KHusrau bhi zahr kha jata

main baat karti jo apnon mein tum se ai sahab

zalil hoti ye bandi tumhaara kya jata

wo gham-zadi hui duniya mein ai husaini jaan

ki mere haal ka hai marsiya paDha jata

KHuda dikhae na peDu ki aanch ka sadma

ye wo julapa hai hargiz saha nahin jata

jo fikr hoti hai roTi ki she'r kahne mein

bura bhala yunhi ai 'jaan' hai baka jata