aaya nazar ufuq pe jo mah-e-‘aza ka chand

aayā nazar ufuq pe jo māh-e-‘azā kā chāñd

us chāñd meñ dikhā.ī diyā fātima kā chāñd

ye din haiñ ġham ke aur ye rāteñ 'azā kī haiñ

ye ahl-e-dil ke haq meñ hai āh-o-bukā kā chāñd

kahne lagā ye chāñd bhī akbar ko dekh kar

kitnā hasīn hai shah-e-karb-o-balā kā chāñd

tū hī batā sakīna ki tere chachā ko ham

hāshim kā chāñd likkheñ yā burj-e-vafā kā chāñd

māh-e-‘azā ke chāñd ko dekhā to yuuñ huā

āñkhoñ meñ aa gayā mirī ashk-e-'azā kā chāñd

girya-kunāñ hai ġham meñ kisī be-kafan ke vo

hai sogvār ab bhī kisī be-ridā kā chāñd

puurī na hogī chashm-e-tamannā kī aarzū

bāloñ ke hai hijāb meñ sharm-o-hayā kā chāñd

ai chāñd dekh apne sitāroñ ke saath saath

nezoñ ke āsmān pe hai karbalā kā chāñd

ye karbalā hai nuur kā mehvar zamīn par

is meñ chhupā hai ḳhāmis-e-āl-e-'abā kā chāñd

'mohkam' 'azā-e-sibt-e-payambar ke charḳh par

chamkegā hashr tak mirī fikr-e-rasā kā chāñd

aaya nazar ufuq pe jo mah-e-‘aza ka chand

us chand mein dikhai diya fatima ka chand

ye din hain gham ke aur ye raaten 'aza ki hain

ye ahl-e-dil ke haq mein hai aah-o-buka ka chand

kahne laga ye chand bhi akbar ko dekh kar

kitna hasin hai shah-e-karb-o-bala ka chand

tu hi bata sakina ki tere chacha ko hum

hashim ka chand likkhen ya burj-e-wafa ka chand

mah-e-‘aza ke chand ko dekha to yun hua

aankhon mein aa gaya meri ashk-e-'aza ka chand

girya-kunan hai gham mein kisi be-kafan ke wo

hai sogwar ab bhi kisi be-rida ka chand

puri na hogi chashm-e-tamanna ki aarzu

baalon ke hai hijab mein sharm-o-haya ka chand

ai chand dekh apne sitaron ke sath sath

nezon ke aasman pe hai karbala ka chand

ye karbala hai nur ka mehwar zamin par

is mein chhupa hai KHamis-e-al-e-'aba ka chand

'mohkam' 'aza-e-sibt-e-payambar ke charKH par

chamkega hashr tak meri fikr-e-rasa ka chand