بپا قرطاس پر یوں ماتم شبیر کرتا ہوں

بپا قرطاس پر یوں ماتم شبیر کرتا ہوں

میں اشکوں کے قلم سے کربلا تحریر کرتا ہوں

پشیماں ہو کے دریا ہچکیوں سے رونے لگتا ہے

علی اصغر کی جب میں تشنگی تصویر کرتا ہوں

مرے ادراک کے قلب حزیں سے خوں نکلتا ہے

بیاں میں جب بھی حال زینب دلگیر کرتا ہوں

نبی کی آل کا دشمن مسلماں ہو نہیں سکتا

کوئی گر ہے تو میں اس کی کھلی تکفیر کرتا ہوں

مری گر کوئی عزت ہے تو بس اس کا سبب یہ ہے

میں اہل بیت کی واصفؔ بہت توقیر کرتا ہوں