انّاجی

انّاجی، عرف کتوں والی خالہ کا اُس دن لانڈھی بابرمارکیٹ سے خریداری کرکے نکلتے ہوئے حادثہ ہوگیاتھا۔ موٹر سائیکل پر سوار دو لڑکوں نے انھیں ٹکر ماردی تھی۔ اُن کی خریداری کے تھیلے اور بید کی ٹوکری سے بڑے گوشت کے چھیچڑے، پارچے، بڑی آنتوں کے ٹکڑے، ہڈے اور چربی کے لوتھڑے اچھل کر ڈامر کی سڑک پر بکھر گئے تھے۔ انّا جی نے کتوں کی خوراک سمیٹتے ہوئے لڑکوں کو انگریزی میں گالیاں دینا شروع کیں۔ Stupid bastard اور foolishجیسے الفاظ سن کر لڑکے مرعوب ہوگئے اور انھیں کسی طرح سہارا دے کر گھر پہنچا گئے۔ انھیں چوٹ آئی تھی، لیکن وہ ا پنی تکلیف کی پرواہ کیے بغیر مصر تھیں کہ انھیں ہسپتال نہیں بلکہ اُن کے گھر لے جایا جائے۔ جہاں ٹائیگر، مینا اور نادرشاہ اُن کا بے چینی سے انتظار کررہے ہیں۔ لڑکے سمجھے یہ اُن کے بیٹے ہیں، لیکن جب گھر کے قریب گرانڈیل ٹائیگر اُن پر لپکا تو وہ انّا جی کو گلی کے کونے میں پٹک سر پٹ دوڑ گئے۔

اُسی دن بلکہ اُس وقت، میں اپنے نئے نویلے ڈبل کیسٹ ریکارڈر کی گویا آرتی اتار رہا تھا، جو مزمل بھائی نے دبئی سے کسی کے ہاتھ میرے لیے بھجوایا تھا۔ بھجوانے سے پہلے انھوں نے قسمیں دی تھیں کہ میں میٹرک میں شاندار نمبر لاؤں گا۔ ابا نے ہمیشہ کی طرح گھر سے نکال دینے کی دھمکی دے رکھی تھی، کہ میں ہر وقت ناچ گانوں اور ٹی وی میں لگارہتا ہوں پڑھتا خاک بھی نہیں وغیرہ۔ امی نے کہا تھا کہ ان بے ہودہ گانوں کی آواز نیچے کی منزل تک نہ آئے۔ دادی نے البتہ اُسے دیکھ کر پوچھا تھا، ’’اس میں سے سہگل کی آواز آئے گی؟‘‘

’میری عمر کے نوجوانو، دل نہ لگانا او دیوانو، ‘سمیت سائیڈ A پر ’’قرض‘‘ اور سائیڈ B پر ’’شان‘‘ فلم کے گانے میں نے گرومندر کے Koyokoyo میوزک سینٹر سے بھروا رکھے تھے۔ رشی کپور اور متھن میرے آئیڈیل تھے اور ڈانس تو گویا میری رگ رگ میں دوڑ رہا تھا۔ لیکن ان حرامزادے کتوں کی بھوں بھوں نے میرا سارا مزہ کرِکرِا کر دیا تھا۔ جانے کہاں مرگئی تھیں انا جی، جو اُن کے بغیر یہ منحوس کتے میرے گانوں کا ستیاناس کیے دے رہے تھے۔ جھنجلا کر میں نے ٹیپ ریکارڈر بند کیا اور کھڑکی سے نیچے اُن کے صحن میں جھانکا، انا جی کا دور دور تک کوئی پتہ نہ تھا۔ کتوں کا مسلسل بھونکنا میرے سر پر ہتھوڑوں کی طرح لگ رہا تھا، بھو بھوبھو! چڑ کر ایک ٹوٹی چپل نیچے اُن بھیڑیوں پر کھینچ ماری جس کا ذرہ برابر بھی نوٹس نہ لیا گیا۔۔۔ آخر کو وہ انا جی کے کتے تھے۔ اُن ہی کی طرح بے حس، ڈھیٹ اور ہٹ دھرم۔

اگلے دن جب میں اناجی کے ہاں ٹی وی دیکھنے گیا، تو پتہ چلا کہ اُن کی تو دائیں ٹانگ ٹوٹ چکی ہے، گھٹنے تک پلاستر ہے اور وہ پلنگ پر آگئی ہیں۔ خیر مجھے کیا، میں تو آرام سے رنگین ٹی وی پر ’’تنہائیاں‘‘ کی پانچویں قسط دیکھنے میں مشغول رہا۔ مجھے سنیعہ بہت اچھی لگتی تھی، کچھ کچھ مونا جیسی۔۔۔ مونا ہمارے سامنے والے پڑوسی انصاری صاحب کی بیٹی۔ اچانک انا جی نے پانی مانگا، میں بے دلی سے اٹھا۔ اُسی وقت نشریاتی رابطہ منقطع ہونے سے ٹی وی پر مکھیاں آنے لگیں۔ میں نے ٹی وی کو دوچار مکّے مارے مگر وہاں صرف مکھیاں ہی بھنبھنا رہی تھیں۔ پانی اُن کے پاس پٹک کر میں وہاں سے چل دیا۔ قاری صاحب کے آنے کا وقت ہورہا تھا اور ابو کے خبرنامے کا بھی۔ میں نے انا جی کی طرف مڑکر بھی نہ دیکھا۔ مجھے لنگڑے لولے بدصورت لوگوں سے نفرت تھی۔ ہونہہ! لنگڑی انا جی۔ ویسے تو سارے محلے کی جان عذاب کر رکھی تھی انا جی اور ان کے بھیڑیئے نما کتوں نے، لیکن ہماری چونکہ دیوار ایک تھی اس لیے سب سے زیادہ عذاب ہم جھیلتے تھے۔ کہنے کو ہم لوگ ہمسائے تھے یعنی ایک دوسرے کا سایہ، لیکن ایک دوسرے کے سائے سے بھی بیزار تھے۔

کراچی ایئرپورٹ کے قرب و جوار میں بسی ملیر کی یہ کالونی، بہت قدیم اور سفید پوش نفوس پر مشتمل تھی۔ یہاں اونچی سرخ چھتوں والے بڑے بنگلے بھی تھے جن کے اندر لان، آگے باڑھ اور ہرے بھرے درخت تھے۔ سول ایوی ایشن کے عملے کے لیے چھوٹے کوارٹرز کی کئی قطاریں تھیں، جو میرے والد اور اُن جیسے معمولی ملازموں کے لیے بنائے گئے تھے۔ انا جی کے شوہر، لقمان صاحب بھی ابا کے ہمراہ کام کیا کرتے تھے۔ بڑے ہی ملنسار اور وجیہہ مرد تھے بے چارے، پتہ نہیں کیسے اس چڑچڑی، بدمزاج اور بدشکل انا جی سے شادی کرلی تھی۔

بارش کے آثار تھے۔ ٹیپ ریکارڈر کو قریب کرکے میں سونے کی کوشش کرنے لگا۔ انا جی کا نوٹس پہلی مرتبہ میں نے کئی سال پہلے، کسی عیدمیلادالنبی کی شام کو لیا تھا۔ اُس دن محلے میں ایک آدھ مکان کے آگے مٹی کے چراغ جل رہے تھے اور تقریباً ہر گھر سے سوجی بھوننے یا پوریاں تلنے کی خوشبوئیں آرہی تھیں۔ امی نے مجھے سارا دن سودا لینے کے لیے بہتیرا دوڑایا تھا۔ اتنی بار کہ مجھے اس عید ہی سے چڑ محسوس ہورہی تھی۔ صبیحہ باجی کے ساتھ مل کر میں نے ڈرائنگ روم کا فرنیچر ہٹایا تھا، سفید چاندنیاں بچھائی تھیں اور پارے مسجد سے لاکر ترتیب سے جمائے تھے۔ امی دادی کے ساتھ کھیر بنانے اور پوریاں تلنے میں مشغول تھیں۔ ایک ایک کرکے محلے کی سیدھی سادھی عورتیں جمع ہونے لگیں، کہ قرآن ختم کرکے انھوں نے میلاد پڑھنا تھا۔ یہ ہر سال کا معمول تھا۔ مجھے اُس وقت اپنے بلیک اینڈ وہائٹ ٹی وی پر ٹام اینڈ جیری دیکھنا تھا کہ گیٹ پر گھنٹی بجی۔ باہر انّا جی سر پر سوتی ساڑھی کا پلو جمائے، ہاتھ میں طشتری سے ڈھانکے ایک پیالہ لیے کھڑی تھیں۔ میں نے پوچھا، ’’یہ کیا ہے؟‘‘ انا جی بولیں ’’کھیر بنائی تھی بیٹا، بارہ وفات ہے ناں۔‘‘ انا جی ایک دم اپنا پیر اندر رکھ کربولیں، ’’گھر میں میلاد ہورہی ہے؟ ارے واہ! میں سلام بہت اچھا پڑھتی ہوں۔‘‘ وہ اندر آنے لگیں۔ اس سے پہلے کہ دادی آکر اُن کا خیر مقدم کرتیں، بجلی کی سی تیزی سے امی باہر آئیں۔ پیالہ میرے ہاتھ میں تھا۔ امی جلدی سے بولیں، ’’انا جی لوگ پورے ہوگئے ہیں آپ رہنے دیں ہم خود ہی میلاد پڑھ لیں گے۔ آپ کا شکریہ۔‘‘ اور اُنہیں تقریباً نکار کر گیٹ بند کرلیا۔ میں نے طشتری اٹھا کر اندر دیکھا، اچھی کھوئے والی فیرنی تھی۔ انگلی ڈال کر چاٹنا چاہتا تھا کہ امی نے پیالہ چھین کر وہیں کیاری میں الٹ دیا۔ سفید کھیر مٹی پر پڑی چاندنی کی طرح دمک رہی تھی۔ امی بولیں، ’’پھینکو اسے گندے لڑکے۔‘‘ میں نے پوچھا، ’’کیوں؟‘‘ جواب ملا، ’’ارے کتے والے گھر کی کوئی چیز ہم نہیں کھاسکتے۔ توبہ! توبہ! سب غلیظ ہوتا ہے ان کے گھر کا، رحمت کے فرشتے بھی نہیں آتے ان کے یہاں تو۔ کہیں ان کے کتوں کی وجہ سے فرشتے ہمارے گھر کو بھی نہ نظرانداز کردیں، ویسے ہی تمھارے ابا کی نوکری خطرے میں ہے۔ گھن آرہی تھی اس عورت سے مجھے، گندی سی کھیر لیے چلی آئیں ! آئی اماں جان،‘‘ کہہ کر لپک جھپک اندر چلی گئیں۔ لیکن چولہے پر پکنے سے تو سب جراثیم مرجاتے ہیں، کل ہی تو سائنس کی مس تسلیم نے سمجھایا تھا۔ خیر میرا ٹام اینڈ جیری نہ ختم ہوجائے، پانچ منٹ کے لیے تو آتا ہے۔ میں اندر بھاگا۔

دیوار کی دوسری طرف کھڑی انا جی نے امی کا یہ مقدس درس بڑی رسان سے سنا اور آنگن میں لگے نلکے سے بالٹی بھر کر صحن دھونے لگیں۔ اُن کے تین شیر نما کتے ۔۔۔ ٹائیگر، نادرشاہ اور کتیا مینا، اُن کے اور پانی کے ساتھ کھیلنے لگے۔ ذرا دیر میں انا جی کھلکھلانے لگیں، ’’یا نبی سلام علیک یا رسول سلام علیک‘‘ کی آواز پر تخت سے اٹھ کر قبلہ رو کھڑی ہوگئیں۔ سر پر پلو جمالیا اور ہاتھ باندھ لیے۔ زیرلب سلام پڑھنے لگیں، ’’یا نبی سلام علیک یا رسول سلام علیک۔‘‘ اندر لقمان صاحب چھوٹا سا بیگ باندھے گھر چھوڑنے کو تیار کھڑے تھے۔

انا جی اُس وقت ٹائیگر کی جوؤں کو چننے میں ایسے منہمک تھیں، جیسے کوئی کنواری چاند رات میں اپنی مہندی کے نقش و نگار اور محبوب کے خیالات میں محو ہو، بالکل غرق۔ بھاری بیگ لٹکائے لٹکائے لقمان صاحب کا کاندھا شل ہوگیا۔ دیر تک ادھر سے اُدھر کوئیک مارچ کرتے رہے، صراحی سے کئی کٹورے پانی پی گئے مگر انا جی کے کان پر جوں نہ رینگی۔ مجبوراً پھٹے، ’’میں جارہا ہوں۔‘‘ انھیں وہم سا ہوا کہ انا جی نے ’’کہاں‘‘ بولا ہے۔ ویسے انھوں نے لقمان صاحب کے بجائے ٹائیگر کو چپت لگاتے ہوئے کہا تھا کہ کہاں سے لے آئے ہو یہ ticks، شریر۔ لقمان صاحب تلملا کر جزبز ہوتے ہوئے گویا پھٹ پڑے، ’’آج فیصلہ کرلو انیلا! یا تو یہ ملعون کتے اس گھر میں رہیں گے یا پھر میں۔‘‘ انا جی لاپرواہی سے بولیں، ’’ٹائیگر پھر ticksلے آیا۔ بدتمیز !naughty ہاں تو لقمان صاحب آپ کس کے ہاں رہیں گے اب؟ صدیق کے ہاں؟ ٹھیک ہے۔ اُس کی بیٹھک خالی ہی پڑی رہتی ہے۔ اچھا ہے اس کی بھی صحبت ہوجائے گی۔‘‘ اتنا کہا اور تینوں کتوں کے لیے شام کا کھانا تیار کرنے میں لگ گئیں۔ لقمان صاحب کو اپنے بہرے ہونے کا کامل یقین ہوگیا۔ دل و دماغ سے چنگاریاں پھوٹ رہی تھیں، پیر پٹکتے ہوئے گھر سے نکل گئے۔ جاتے جاتے بولے ’’جارہا ہوں میں، ہمیشہ ہمیشہ کے لیے۔ تمھیں مجھ سے اور بچوں سے زیادہ یہ منحوس خون خوار اور گدھے کے بچے کتے عزیز ہیں، انیلا بیگم! خدا حافظ۔‘‘ ٹائیگرنے مالکن کی جانب اُن کے غصے کو اشتعال جانا اور لپکا اُن کے پیچھے، لیکن وہ جان کی سلامتی کے لیے پہلے ہی کواڑ بند کرچکے تھے۔

باپ کو جاتا دیکھ دونوں بچے، معین اور جہاں آراء بھی مچلنے لگے لیکن انا جی کی ایک ہی ڈانٹ نے دونوں کو سہمادیا۔ جوان ہوتے معین کے چہرے سے بغاوت عیاں تھی البتہ جہاں آراء اسکول یونیفارم پہنے باقاعدہ لرز رہی تھی۔ معین بولا، ’’ابا ہمیشہ کے لیے چلے گئے کیا؟‘‘ اناجی بولیں ’’کہیں نہیں گئے، وہ آجائیں گے۔‘‘ معین اُداس ہوگیا، ’’کھانا؟‘‘ انا جی بولیں، ’’ابھی ٹائیگر، نادر شاہ کسی نے کھانا نہیں کھایا تم لوگ کیسے کھا سکتے ہو۔ ویسے ہم نے کچھ پکایا بھی نہیں ہے۔‘‘ معین بولا، ’’جہاں آراء کو بھوک لگی ہے۔‘‘ انا جی نے جواب دیا، ’’چائے بنالو دو کپ اور پاپے پر مکھن لگا کر کھالو۔ اور ہاں پھر دونوں آکر یہاں ان بچوں کے ticks صاف کرو۔‘‘ جہاں آراء کو ٹائیگر کی جوئیں چننے کے خیال سے بھی متلی ہوئی۔ وہ ابکائی لیتی غسل خانے کی طرف بھاگی۔ مرتے کیا نہ کرتے، دونوں جوان ہوتے بچے کتوں کی خدمت کرتے رہے، ورنہ انھیں رات کو بھوکا ہی سونا پڑتا اور اب تو ابا بھی نہیں ہیں۔ یہ تقریباً روزانہ کا ہی معمول تھا۔

اسکول سے بھاری بستے لادے میں اور ارمان چلنے سے زیادہ رک رہے تھے۔ کبھی گولا گنڈا چوستے، کبھی بنگالی کی مچھلیاں دیکھتے اور کبھی بیوٹی ہیئر سیلون پر لگے امیتابھ اور رشی کپور کے پوسٹرز دیکھتے۔ بے خیالی میں، میں نے بال امیتابھ کی طرح سنوارنے کی کوشش بھی کی تھی کہ ارمان تھک کر سیلون کے سامنے تھڑے پربیٹھ گیا اور بولا، ’’دیر ہورہی ہے یار جلدی گھر چلو، مجھے تین بجے ڈاکٹر فاطمہ کے پاس بھی جانا ہے۔‘‘ میں نے بھی شرارت سے کہا، ’’کیوں، وہ تو لیڈی ڈاکٹر ہیں۔ تمھیں کیا مسئلہ ہوگیا ہے، ہیں؟‘‘ ارمان اُداسی بھرے لہجے میں بولا، ’’بس یار وہ آپا کے ساتھ جانا ہے، تین سال ہوگئے آپا کو بچہ نہیں ہو رہا ہے۔ امی کی زندگی بڑی tough ہے۔ بچہ نہ ہوا تو آپا کو شاید طلاق ہو جائے۔ مسرور علی خان! ابو امریکا سے نہ خط لکھ رہے ہیں نہ پیسے بھیج رہے ہیں۔ میرا یونیفارم پھٹ گیا ہے، جوتا چھوٹا ہوگیا ہے، پیر کی چھوٹی انگلی زخمی ہوگئی ہے، مجھ سے چلا بھی نہیں جاتا۔ گھر میں بالکل پیسے نہیں ہیں، دو مہینے سے فیس نہیں گئی ہے میری۔ کل مس ناہید سارا دن کھڑا رکھیں گی مجھے اور میں روؤں بھی نہیں؟ مسرور میں خودکشی کرلوں؟ یار ایسے میں خودکشی حرام تو نہیں ہوتی ناں؟‘‘ میں نے بیگ سے اپنی رپورٹ نکال کر کہا ’’اُلو کے پٹھے، نامرد، یہ دیکھ پوری رپورٹ لال ہے۔ خاص کر منحوس maths میں 0 اور انگلش میں صرف 05نمبر ملے ہیں پھر بھی میں گولا گنڈا چوس رہا ہوں، امیتابھ کی طرح پوز کررہاہوں اور تم۔۔۔؟‘‘ ارمان کو روتے دیکھ کر میں نے کہا، ’’مرد بنو یار!سنو ایک کام کرو، شام کو مجھے ابا سے یہ رپورٹ سائن کروانی ہے، میں خود کرلیتا مگر اب وہ اردو میں دستخط کرنے لگے ہیں۔ دستخط کیا، ایک بل کھاتی مکڑی کے اوپر ایک اژدھا بٹھا کر سائیڈ میں کرکٹ کا بلا رکھ دیتے ہیں، بس اتنی سی بات ہے ۔۔۔ شام کو آجانا۔‘‘ ارمان رونا بھول کر بولا ’’کیوں آؤں شام کو؟‘‘ میں نے کہا، ’’جو رونا تم ابھی رو رہے تھے وہ عین ٹائم پر ابا کے سامنے رونا۔ یہ۔۔۔ ابا جو امریکا میں کھوگئے ہیں، آپا کابچہ نہ ہونا، وغیرہ۔ بس وہ مجھ پر زیادہ غصہ نہیں کرسکیں گے اور کھٹ سے دستخط کردیں گے۔‘‘ پھر اسے پچکارتے ہوئے میں نے کہا، ’’دیکھو میری جان آج ہے جمعرات۔۔۔ کل ہے چھٹی۔ تو، سلیم ویڈیو سے لارہا ہوں VCR، صرف تیس روپے کرائے پر تین فلمیں۔ نمک حلال، شان، قرض اور مغل اعظم دادی کے لیے۔ باقی سب کو بھی بلالیں گے۔ بس بڈھا دستخط کردے اس پر۔‘‘ ارمان بولا، ’’مگر سلیم ویڈیو کے VCR کا ہیڈ کیسٹ چباتا ہے، اُس سے مت لو۔‘‘ میں نے اسے گھورااور ہمیشہ کا تابعدار ارمان خاموش ہوگیا۔ ارمان کو ڈھارس دلا کر میں مطمئن ہوگیا۔ اس رات سب کچھ پلان کے مطابق ہوا۔

ابا، اخبار جسارت کے لیے پارٹ ٹائم کام کرتے تھے۔ مہاجروں کی کسی نئی تنظیم نے ہر طرف ہلچل مچا رکھی تھی۔ اباکو اُن کے قائد اور اُن کے نظریات سے شدید اختلاف تھا۔ وہ تھے تو مہاجر، مگر سندھ میں رہنے کے باعث اپنے آپ کو سندھی کہتے تھے۔ جے پور سے ہجرت کرکے لٹ پٹ کر اب یہ چھوٹا سا آشیانہ اُنہیں ملا تھا۔ اُس کو بھی اپنے کھرے اور بے باک کالم لکھ لکھ کر برباد کرنے پر تلے ہوئے تھے۔ دستخط پر بلا بٹھاتے ہوئے انھوں نے اپنا مخصوص جملہ۔۔۔ ’’اگلی مرتبہ فیل ہوئے تو گھر سے نکال دوں گا۔۔۔‘‘ کہا۔ بس میں مطمئن ہوگیا کہ ابا ٹھیک ہیں۔

اُس رات اوپر میرے کمرے میں امی، اُن کی چھ سہیلیاں، ارمان، پندرہ محلے کے دوست، پڑوسی اور اُن کے شیرخوار بچے تک ٹھسم ٹھسا بیٹھے تھے۔ دادی نے مغل اعظم تو برائے نام دیکھی کہ وہ دیکھ رکھی ہے، پھر پاکیزہ کو یاد کرتے ہوئے فجر قضا کرکے ’’نمک حلال‘‘ بھی دیکھ ڈالی۔ ’’جوانی جان من حسین دلربا‘‘ جب چلا تو مجھے ناچار پروین بوبی کے خوبصورت ڈانس کو آگے بڑھانا پڑا۔ سارا وقت میں VCR سے چپک کر بیٹھا رہا کہ کوئی اور گندہ سین نہ آجائے اور دادی، ابا سے شکایت کر، ہماری یہ واحد تفریح بھی بند نہ کروادیں۔ یکایک میں نے جمائیاں لینا شروع کردیں تاکہ سب جائیں۔ سب کے جانے کے بعد ارمان سلیقے سے دریاں طے کرنے لگا۔ نیند سے گرا پڑتا تھا بے چارہ، لیکن پھر میری دکھائی اصل فلموں نے اُس کی آنکھیں پوری طرح کھول دیں۔ صبح ہوچکی تھی، دیر تک سو بھی نہیں سکتے تھے۔ جمعہ کی نماز جماعت سے پڑھنا بھی تو لازمی تھی۔ انا جی کو جھوٹے منہ بھی بلاوا نہ دیا گیا تھا۔ کیوں کہ اُس دور میں، بلکہ ہر دور میں اہلیان محلہ نے اُن کا مکمل بائیکاٹ کر رکھا تھا۔ وجہ بلکہ وجوہات تھے اُن کے کتے۔

اُس دن جہاں آراء اور نادر شاہ دونوں بخار میں پھنک رہے تھے۔ معین، بہن کے ماتھے پر پٹیاں ڈال رہا تھا اور اناجی نادر شاہ کو گود میں لیے اُس کے لیے ایسے پریشان تھیں، گویا اُن کی پہلوٹی کی اولاد ICU میں جاچکی ہو۔ انا جی بولیں، ’’نادر شاہ کھانے کی طرف دیکھ بھی نہیں رہا۔ اسے دیکھو معین، دیدے ڈھلکائے دے رہا ہے۔ سانس بھی رک رک کر لے رہا ہے۔‘‘ معین بولا، ’’انا جی۔۔۔ جہاں آراء کے دست اور الٹیاں رکنے میں نہیں آرہے۔ اس کو ڈاکٹر آغا کے ہاں لے چلتے ہیں، چلیں ناں، بٹوہ نکالیں، میں اسے اٹھاتا ہوں۔‘‘ انا جی نے ایک بھائی کی التجا سنی تک نہیں اور اپنے کان نادر شاہ کی تھوتھنی سے لگادیے، جیسے کہ وہ اُس سے مکالمہ کررہی ہوں۔ اناجی بولیں، ’’اس محلے کے بدذات بچوں نے پتھر مارے ہیں میرے نادر شاہ کو اوپر چھت سے، بزدل کہیں کے۔ نادر شاہ بیٹا! زیادہ درد ہورہا ہے؟ کھانا کھاؤ گے؟ ادھر ہی لادوں؟‘‘

معین بہن کے پاس جاکر دیوار سے ٹکر مارنے لگااور زور زور سے ابا! ابا! چلانے لگا۔ جہاں آراء کو رونے کاتو موقع ہی چاہیے تھا۔ اتنے میں انا جی اندر آئیں اورکڑک کر بولیں، ’’چپ ہوجاؤ دونوں۔ یہ لو صدیق کا نمبر۔‘‘ ڈائری سے ایک فون نمبر ڈائل کرنے لگیں 62311۔ انا جی نے گھورتی نظروں سے معین کو بہت کچھ سمجھادیا۔ معین فون پر، ’’ہیلو، ہیلو ابا! آپ واپس آجائیں جہاں آراء کی طبیعت بہت خراب ہے آپ کو پکار رہی ہے۔‘‘ جواب میں ابا بولے ’’اور انیلا کے وہ ملعون شیطانی کتے؟ وہ حرامزادے؟‘‘ معین تھوک نگل کر بولا، ’’وہ چلے گئے ابا۔ اناجی نے انھیں کسی کو دے دیا۔ جہاں آراء کی طبیعت بہت خراب ہے۔‘‘ اناجی نے لائن کاٹی، ریسیور چھینا۔ تار لپیٹتی ہوئی فون اٹھا کر اپنے کمرے میں چلی گئیں۔ فون پر تالا ڈالنا نہ بھولیں۔ معین نے اُسی دم فیصلہ کرلیا تھا کہ وہ انیس سال کی عمر میں شارجہ سے ملی، الیکٹریشن کی نوکری کی پیشکش کوقبول کرکے پیسہ کمائے گا اور جہاں آراء کو اس جہنم سے نکال لے گا۔ انا جی نادر شاہ کو ڈراپرسے کال پول پلا رہی تھیں۔

سردیاں آگئی تھیں، میں اپنے یونیفارم کے پھٹے سوئٹر کو خود سی رہا تھا۔ دراصل میں اپنے آپ کو مضبوط بنارہا تھا، کہ اگر آٹھویں میں فیل ہونے پر ابا نے سچ مچ گھر سے نکال دیا تو کیا ہوگا؟ دادی کی سانس کبھی کبھار اٹک جاتی ہے، اگر سالانہ امتحان کے نتیجے تک وہ نہ رہیں تومجھے کون ابا کے عتاب سے بچائے گا؟ تین سو مرتبہ شعلے دیکھنے کے بعد میں اور ارمان جے اور ویرو تھے۔ اُن ہی کی طرح کسی ٹھاکر کی مدد کرکے امیر ہونے کا پلان میں بناچکا تھا۔ چلا جاؤں گا اس گھر سے، ہے کیا یہاں پر؟ محلہ بھی بالکل بیکار، فالتو اور پھر مجھے مونا یاد آگئی۔ بے اختیار نظر صبح کے چمکتے سورج پرجاپڑی اور پھر مایوسی سے اپنے کمرے میں جلتے دس واٹ کے بلب پر۔۔۔ مونا اور مجھ میں بس اتناہی فرق تھا۔ اُتنا ہی فرق ماما پارسی اسکول اور لٹل اسٹار گرامر اسکول میں تھا۔ صبح صبح جب میں اور ارمان پولیس کی وردی جیسے یونیفارم۔۔۔ جو صابن سے دھل دھل کر اور بھی بدرنگ ہوچکے تھے ۔۔۔ پہن کر پیدل اسکول جارہے ہوتے، تو عین اُسی وقت انصاری صاحب، ماما پارسی کے سفید اور کلف زدہ یونیفارم میں ملبوس، اپنی تینوں بیٹیوں کے ساتھ فوکسی چلاتے ہوئے ہمارے قریب سے گزرتے۔ میں ہمیشہ مونا کو دیکھ کر ہاتھ ہلاتا، مگر وہ ہمیشہ گردن اکڑائے سامنے دیکھتے رہتی اور گاڑی زن سے گزر جاتی۔

پتہ نہیں کیوں مجھے لگنے لگتا کہ ایسٹ انڈیا کمپنی اور انگریز راج اب بھی قائم ہے۔ یہ جو گاڑی گزری ہے یہ ملکہ وکٹوریہ کی بگھی ہے اور میں بلڈی ہندوستانی۔ اُس وقت انا جی کے کتے اور وہ خود گہری نیند میں ہوتے تھے۔ گلی ہر خطرے سے پاک ہوتی اور ہم بچے بڑے آزادانہ وہاں سے آتے جاتے۔ دن کے تین بجے سے صبح فجر تک کرفیو لگ جاتا اور وہاں ٹائیگر، جگا اور نادر شاہ یوں ڈیوٹی بدلتے، جیسے مزار قائد پر گارڈز کی تبدیلی ہوتی ہے۔ مجھے ان کتوں کی وجہ سے دو گلی گھوم کر بشیر کریانہ اسٹور تک جانا پڑتا تھا۔ جہاں امی مجھے لاہوری نمک، دہی، صابن، تیل، رائی، پاپڑ، بادیان کا پھول، آٹا، باجرہ اور پھول جھاڑو لینے کے لیے دوکروڑ چکر لگوایا کرتی تھیں۔ ٹائیگر تو مجھے بہت ہی زہر لگا کرتا تھا کیوں کہ دوسال میں وہ میری اکلوتی سفید شلوار، سفنچ کی ہری چپل، میرا نیا اسکول بیگ، امی کے منگوائے آدھے پاؤ قیمے کی تھیلی اور لنڈا سے لائے جاگرز تک بھنبھوڑ کر چیتھڑے کر چکا تھا۔ انا جی سے شکایت کی تھی، جواب ملا، ’’بچہ ہے ٹائیگر۔ ابھی دانت نکال رہا ہے، ہر چیز چبا ڈالنے کو دل کرتا ہے اُس کا۔‘‘ میں چپ چاپ اپنی ٹانگ کو گھورتا رہ گیاکہ جانے کب اسے بھی چبانے کو دل کرے اُس کا۔ اب میں مونا کو بھول، ٹائیگر کے خاتمے کے بارے میں دن رات منصوبے بنانے لگا۔ جاسوسی ڈائجسٹ اور سسپنس ڈائجسٹ سے سراغ رسانی کی کہانیاں خصوصی توجہ سے پڑھنے لگا، کہ معلوم چلا لقمان صاحب واپس آگئے۔

انا جی گھر بہت صاف ستھرا رکھتی تھیں۔ باورچی خانہ کبھی نہ اجڑتا تھا، کیوں کہ وہاں انسانوں کے لیے کبھی کچھ پکتا بھی نہ تھا۔ لقمان صاحب نے آتے ہی گھر کا جائزہ لیا۔ گھر میں بڑا سکون تھا۔ معین شارجہ میں نوکری کے لیے مختلف دفاتر اور ایجنٹ کے چکر کاٹ رہا تھا۔ جہاں آراء میٹرک کے رزلٹ کا انتظار کررہی تھی۔ کتوں کا دور دور تک پتہ نہ تھا۔ انا جی بھی اطمینان سے اخبارجہاں کا مطالعہ فرما رہی تھیں۔ قریب ہی جنگ، جسارت اور نوائے وقت جیسے اخبار دھرے تھے۔ لقمان صاحب نے ہوا میں تھوتھنی اٹھا کر بالکل کتوں کے انداز میں سونگھا اور فضا کو کتوں کی بو سے پاک پاکر بہت خوش ہوئے، کہ بالآخر وہ کتوں سے برتر ثابت ہوئے اور انا جی نے اُن کی خاطر اپنے لاڈلوں سے جدائی برداشت کرلی۔

لقمان صاحب بہت سا پھل، بسکٹ اور بندوخان کے کباب پراٹھے لے کر آئے تھے۔ خوشی خوشی گھر میں ایک احساس ملکیت لیے گھومنے لگے، مگر اُن کی یہ خوشی عارضی ہی ثابت ہوئی۔ دو چار دن بعد انا جی بابر مارکیٹ گئیں اور واپسی میں زبانیں لپکاتے اُن کے تینوں لخت جگر ساتھ چلے آئے۔ لقمان صاحب نے خون کے گھونٹ پیتے ہوئے اُن سے استفسار کیا، بلکہ کوشش کی تو انا جی نے کہا کہ وہ جھوٹی ہرگز نہیں ہیں۔ ان تینوں کو کسی قصائی کے ہاں رکھوادیا تھا۔ یہ وہاں اپنے کام سے گئیں تو بچے ساتھ چلے آئے۔ بے چاری جہاں آراء ان کی جوئیں چننے کے لیے پھر تیار تھی۔ لقمان صاحب بڑی دیر اس ادھیڑبن میں کھڑے رہے کہ انیلا یہ سب انتقاماً کررہی ہے، نفسیاتاً یا پھر عادتاً؟ وہ اس گتھی کو زندگی بھر سلجھا نہ سکے۔

اُس رات سردی کڑاکے کی تھی۔ کہنے کو نیوائر نائٹ تھی مگر ہمارے محبوب جنرل کے اُس بے نور دورِ حکومت میں عیسائی سال نو کے بارے میں سوچنا بھی حرام تھا۔ شام کی کرکٹ بھی بند تھی۔ اب ہم سب بچے سرشام ہی گھروں میں قید کردیے جاتے تھے۔ میں اُس رات بہت بے چین تھا، کیوں کہ ارمان خبر لایا تھا کہ ماما پارسی کی لڑکیاں مونا کے ہاں پارٹی کررہی ہیں اور میرا وہاں جانا ضروری ہے۔ کیسے اور کیوں؟ یہ دو سوال اتنے ہی بڑے تھے جتنے کہ سویت یونین بڑی سپر پاور ہے یا امریکا؟ یا خالائیں ہمیشہ اچھی اور پھوپھیاں ہمیشہ بری کیوں ہوتی ہیں؟ ہمارے آخری سانسیں لیتے بلیک اینڈ وہائٹ ٹی وی کے خبرنامے پر ابا کی نظریں یوں جمی تھیں، گویا صمد بانڈ سے چپکی ہوئی ہوں۔ کیوں کہ بالآخر مارشل لاء اٹھالینے کی خوشخبری قوم کو دی جارہی تھی اور اب ضیا الحق چیف مارشل لا ایڈمنسٹریٹر کے بجائے، جلد ہی صدر ضیا الحق بننے جارہے تھے۔ مجھے کیا۔ ملک جائے بھاڑ میں، فوج رہے یا ریفرنڈم ہو۔ مجھے تو مونا کی پارٹی میں جانا تھا۔

خاص متھن کو کاپی کرتے ہوئے میں نے سفید کوٹ پتلون اور سفید جوتے لنڈا کی سب سے چھوٹی کیبن، بلکہ زمین پر پڑ ے ڈھیر سے تقریباًچنے کے مول اٹھائے تھے۔ محلے میں کوئلے کی استری سے سوٹ کی تمام شکنیں مٹا کر میں نیوائر پارٹی کے لیے تیار تھا، کہ گھنٹی بجی۔ اس اُلّو کے پٹھے ارمان کو کہا بھی تھا کہ نو بجے کے بعد کبھی گھنٹی مت بجانا، بڈھا گھر پہ ہوتا ہے۔ میں گرتے پڑتے باہر لپکا مگر وہاں ارمان کے بجائے اناجی کھڑی تھیں، ہاتھوں میں گندھے آٹے کا تسلہ لیے۔ میں نے ان کی پلاستر والی ٹانگ پر نظر ڈالی تو وہ بولیں، ’’بیٹا! امی سے کہو کہ اس آٹے کی چھ بڑی بڑی روٹیاں بنادیں۔‘‘ میں نے تسلہ ہاتھ میں لے لیااور انا جی بولیں، ’’ہمارے بچے بھوکے ہیں، اس پلاستر کی وجہ سے ہم نیچے بیٹھ کر روٹی نہیں پکاسکتے۔ ٹائیگر تو تندور کی روٹی کو منہ بھی نہیں لگاتا، نہ ہی نادر شاہ کھاتا ہے باہر کی روٹی۔‘‘ یہ سن کر میں تیزی سے پلٹا۔ اور تسلہ اُنھیں واپس تھماتے ہوئے بولا، ’’امی کبھی آپ کے کتوں کے لیے روٹی نہیں بنائیں گی، لے جایئے۔‘‘ میرا بس نہیں چل رہا تھا کہ اس آٹے میں وہ چوہے مار زہر ملادوں، جو امی کل ہی لے کر آئی تھیں۔ انا جی التجا سے بولیں، ’’بیٹا وہ انصاری صاحب کے ہاں خانساماں ہے وہاں لے جاؤ۔ مہربانی کرو۔ وہ پکا دے گا بیٹا۔ ہمیں تو کوئی اُن کے گھر میں آنے بھی نہیں دے گا۔‘‘ کچھ سوچ کر میں مسکرادیا۔

تھوڑی دیر میں گندھے آٹے کا تسلہ ہاتھ میں لیے، میں یوں انصاری صاحب کے گھر پر دستک دے رہا تھا، جیسے نیوائر کا سہ منزلہ کیک تھامے اُس پارٹی میں آیاہوں۔ خانساماں ہی نے گیٹ کھولا۔ دور رکھے کرسمس ٹری پر قمقمے جل بجھ رہے تھے۔ کن اکھیوں سے میں نے مونا کو لان میں سفید میکسی میں ڈانس کرتے دیکھ لیا تھا۔ باقی لڑکیاں بھی لانگ اسکرٹس پہنے ہنسی کے فوارے چھوڑ رہی تھیں۔ میں خانساماں سے بولا، ’’وہ ہماری امی کو ہارٹ اٹیک ہوگیا ہے اور دادی تو بس آخری سانسیں گن رہی ہیں۔ دو چار دن تک ہماری روٹیاں آپ بنادیں گے سر؟‘‘ بنگالی خانساماں عبدالرزاق ’’سر‘‘ سن کر پاگل ہی ہوگیا اور دانت نکوستے آٹا اندر لے گیا۔

میں معصوم شکل بنا کر لڑکیوں کو نظر انداز کرتا، اپنے سفید کوٹ پتلون کی جیبوں میں ہاتھ ڈالے سردی کو چھپاتا، بلاوجہ چنبیلی کے پھول سونگھنے لگا کہ ایک لڑکی کی آواز آئی،

’’I didn't know Mona that you invited boys too?‘‘

ابھی مونا نے ’ہاں ‘ کہا تھا کہ ’ناں ‘، کہ مائیکل جیکسن کا Thriller بجنے لگا اور میرے قدم بے اختیار ناچ اٹھے۔ بس پھر کیا تھا۔ بریک ڈانس کا بھرپور مظاہرہ ہوا اور پھر moon walk پر تو لڑکیوں کی انگریزی میں چیخیں نکل گئیں۔ بہانے سے میں نے مونا کو ڈانس پارٹنر بھی بنالیا اور جھک کر اُس کے کان میں سرگوشی کی، ’’میں تو صرف انگلش میوزک ہی سنتا ہوں۔‘‘ مونا کے ساتھ ساتھ یہ اطلاع میں نے اُسی وقت اپنے آپ کو بھی دی تھی۔ کسی نے کہا،

’’Look at his costume, how wonderful‘‘

پلٹا تو رزاق روٹیوں کا چنگیر لیے کھڑا تھا۔

مونا اور اُس کی وکٹورین دوستوں نے مجھے گرمجوشی سے بائے کیا اور میں مون واک کرتے ہوئے باہر نکل گیا۔ ارمان نے یہ ساری رام کہانی بعد میں کھلے منہ اور پھٹی آنکھوں سے سنی۔ اُس رات مجھے انا جی اور اُن کے کتوں سے تقریباً پیار ہوگیا۔

برسات کا مہینا تھا۔ اُس دن لقمان صاحب ہمیشہ کی طرح دفتر سے سائیکل پر گھر آرہے تھے لیکن پندرہ منٹ کا راستہ دو گھنٹے کا ہوگیا کیوں کہ محلے کے تقریباً تمام ہی لوگوں نے انھیں روک کر کتوں کی شکایت کی۔ رجب علی قادری نے پورے مکان پر گہرا سبز آئل پینٹ کروا کر اوپر سبز گوٹا لگا اسلامی پرچم چڑھا رکھا تھا۔ ہرماہ قوالی کا اہتمام کرواتے تھے اور عنقریب وہاں پیرکرم الدین قادری کا عرس ہونا تھا۔ ایسے میں آس پاس نجس، بلکہ حرام کتوں کا کیا کام۔

تجمل حسین کے بچے انا جی کے کتوں سے خوفزدہ تھے اور ڈر کے مارے بستر میں پیشاب کردیا کرتے تھے۔ اُن کے خیال میں کتوں کو رفع دفع کردینے سے اُن کے بچوں کا یہ طبی مسئلہ فوراً حل ہوسکتا ہے۔ زبیدہ آنٹی حال ہی میں ریاض سے آئی تھیں اور اب برقعہ چھوڑ چمکیلی پٹی کا عبایہ اوڑھتی تھیں۔ راستہ روک کر انھوں نے کئی من گھڑت احادیث لقمان صاحب کو سنا ڈالیں کہ کتوں کی سرپرستی کرکے نہ صرف وہ دین و دنیا بلکہ اپنی عاقبت بھی حرام کررہے ہیں۔ نیز قیامت میں وہ اندھے اٹھائے جائیں گے۔

لقمان صاحب پھر آگ بگولہ ہوتے گھر میں داخل ہونے لگے۔ دروازے پر کباڑیا کھڑا ردّی اخبار، معین (جو اب شارجہ جاچکا تھا) کے پرانے جوتے، کتابیں، دفتر کی ردّی اور کتوں کی بچ جانے والی سوکھی روٹیاں تول رہا تھا۔ ایک بلیک اینڈ وہائٹ تصویر بھی مُڑی تُڑی اُن کاغذوں سے باہر جھانکتی، لقمان صاحب کی بے بسی پر قہقہہ وار ہنس رہی تھی۔ اس تصویر میں وہ اور انیلا (انا جی) دلہا دلہن بنے بیٹھے تھے۔ ساتھ ہی دس سالہ معین اور پانچ سالہ جہاں آراء بیٹھے نئی امی اور پرانی خالہ کو ٹکر ٹکر دیکھ رہے تھے۔ لقمان کی نظریں مشتاقانہ۔۔۔ انیلا کی نظریں البتہ بیزار تھیں۔ دہلیز پر کھڑے کباڑیے کو اخبار تولتے دیکھ کر لقمان صاحب کی سمجھ میں نہیں آیا کہ پہلے کس کا ماتم کریں۔ دس سال سے سسکتی بلکتی اُن کی دوسری شادی کا؟ انیلا کی مسلسل بے حسی اور بے اعتنائی کا؟ یا تین کتوں کے آگے خود کو کتا محسوس کرنے کی بے بسی کا؟ تب اُ ن کی نظر اناجی پر پڑی، جو اب کباڑیے سے مول تول کرنے کے بعد ایک نئے کتے، بلکہ کتیا کو گود میں پکڑ کانچ کی بوتل پر نپل لگا کر دودھ پلا رہی تھیں۔ وہ ہکا بکا رہ گئے کہ اب یہ نئی آفت کہاں سے نازل ہوئی۔ اناجی نے خود ہی ابرآلود مطلع گویا صاف کردیا۔ بولیں، ’’ارے آپ آگئے ! ملیے، مینا سے۔ Russian Puppy ہے۔ وہ سعید ہے ناں، 136 نمبر کوارٹر والا، وہ دے گیا ہے۔ اُن لوگوں کو اچانک ماسکو جانا پڑ گیا، اُس کا فوجی سسر افغان جنگ میں مارا گیا۔ آپ تو جانتے ہیں، سعید کی بیوی Russian ہے۔ وہیں سے تو آئے تھے مینا کے ماں باپ۔ تو وہ لوگ چلے گئے۔ ارے مینا! مینا!‘‘ وہ میناکو پچکارنے لگیں اور بولیں، ’’مینا کی وجہ سے ہم کھانا نہیں بناسکے۔ جہاں آرا سے کہیے آپ کے لیے کھچڑی بنادے، اچار اور پاپڑ سے کھالیجیے گا۔‘‘ لقمان صاحب جل کر بنیان اتارنے لگے۔ صحن میں ٹائیگر، جگا اور نادرشاہ اپنی نئی کزن مینا کے آنے سے بہت خوش تھے۔

مس قیصرنے کلاس میں پوچھا، ’’حبیبہ! تم بتاؤ، تم آگے انٹر کے بعد کیا پڑھو گی؟‘‘ حبیبہ بولی، ’’مس میں ڈاکٹری پڑھوں گی۔‘‘ مس قیصر آگے بڑھیں، ’’اور تم راحیلہ، تم کیا بنو گی؟‘‘ راحیلہ بولی، ’’مس قیصر میری تو انٹر کے رزلٹ سے بھی پہلے شادی ہے۔ محسن میرا کزن ہے اور ہم دونوں کی منگنی بچپن میں ہی ہوگئی تھی۔ میں تو بس دلہن بنوں گی۔‘‘ کلاس کی سب لڑکیاں ہنسنے لگیں۔ مس قیصر انیلا سے مخاطب ہوئیں، ’’اور تم انیلا؟‘‘ سپاٹ لہجے والی انیلا پھرتی سے کھڑی ہوئی اور تن کر بولی، ’’میں astronaut بننا چاہتی ہوں مس۔‘‘ ساری کلاس انیلا کے اس جواب پرسشدر رہ گئی، لڑکی اور astronaut؟ اُن دنوں نیل آرم اسٹرانگ ویسے بھی چاند پر جھنڈے گاڑھ کر امر ہوچکا تھا۔ مس قیصر حیران ہو کر بولیں، ’’astronaut؟ مانا کہ تمھاری حساب اور فزکس وغیرہ میں distinction آسکتی ہے لیکن انیلا!‘‘ انیلا بولی، ’’مس میں spaceship اڑا کر کسی نئے سیارے کو دریافت کرنا چاہتی ہوں۔ مجھے لگتا ہے زمین کے علاوہ کسی دوسرے سیارے پر بھی زندگی پائی جاسکتی ہے۔ مس میں وہیں پہنچنا چاہتی ہوں۔‘‘ راحیلہ آوازہ کستے ہوئے بولی، ’’لو جی۔ ہم سج سنور کر اپنے دلہا کے دل تک پہنچنا چاہ رہے ہیں اور یہ مریخ تک۔‘‘ لڑکیوں کے قہقہے انیلا نے اسکول کے گیٹ سے نکلنے تک سنے۔ انیلا کچھ عجیب سی تھی۔ بہت پڑھاکو، کم بات کرتی تھی۔ ہمیشہ اوّل آتی تھی۔ میٹرک میں رہتے ہوئے BSc کا کورس پڑھتی تھی۔ لیکن یہ باتیں خاص تو ہوسکتی ہیں عجیب نہیں۔

عجیب بات یہ تھی کہ اُس میں نسوانیت نام کو نہ تھی، دوپٹہ اوڑھے یا نہیں، کوئی فرق نہیں پڑتا تھا۔ لڑکیاں ہر وقت اپنے کزنز اور منگیتروں کی باتیں کرتیں۔ بس اسٹاپ پر کھڑے اُن کے انتظار میں پتھر ہوتے ہوئے لڑکوں کی باتیں کرتیں، جب کہ انیلا خود ایک ایسا پتھر تھی جس کی زندگی میں ان سب خرافات کی کوئی جگہ نہ تھی۔ اسپیس انجینئرنگ اُس کا خواب تھا۔ گھر جاکر بھی وہ کتابوں اور خوابوں میں گم رہتی۔ نہ اُسے بننے سنورنے کا شوق تھا، نہ پہننے اوڑھنے کا۔ دس سال پہلے آپا کی شادی ہوچکی تھی۔ اُن ہی کے چھوڑ گئے کپڑے وہ پہن لیتی تھی، بلکہ کبھی تو ابا کی پرانی پتلون قمیض بھی پہن لیتی۔ نلکے، بجلی کے سوئچ اور پانی کی موٹرٹھیک کرنے سے لے کر بلب وغیرہ بدلنے تک، سب شوق سے کرتی۔ یہاں تک کہ چاند رات کو ابا کے ساتھ مل کر کمروں میں رنگ بھی کرڈالتی۔ بھاری سامان اِدھر سے اُدھر لے جانے کے لیے اُس نے خود ایک لوہے کی ٹرالی بنائی تھی۔ اُسے بچے زہر لگتے تھے۔ آپا کے دو بچے تھے، معین اور جہاں آرا۔ ۱۷ سالہ انیلا کے خیال میں بچے ایک تو عورت کی ترقی میں رکاوٹ ہوتے ہیں، دوسرے وہ ماں کو موٹا، بھدا، بیمار اور چڑچڑا کردیتے ہیں۔ لقمان بھائی تو اُسے ڈریکولا لگتے تھے، جنھوں نے آپا کا خون چوس کر بہن کو حسین گڑیا سے بڑھیا بنا ڈالا تھا۔

آپا، جو کبھی اقبال بانو کی غزلیں اور گیت گایا کرتی تھیں، ’’پائل میں گیت ہیں چھم چھم کے‘‘، اب مائکے آکر بچوں کی بیماری، اپنی بیماری، لقمان کی بیماری، ساس کی اجارہ داری، بڑھتی مہنگائی، قرضے اور مکان دار کے تقاضوں کا ہی تذکرہ کیے جاتیں۔ آئینہ دیکھنے کا وقت ہی نہ ہوتا اُن کے پاس۔ اُجڑے خشک بال جن میں ہفتوں کنگھا نہ ہوتا، گندے ناخن اور پھٹی ایڑیاں۔ مسکرانا تو جیسے بھول ہی چکی تھیں۔ اپنا گھر بہت گندہ رکھنے لگی تھیں۔ اور تو اور کھٹی ڈکاریں لینے لگی تھیں۔ انیلا سے بھی برائے نام بات کرتیں بلکہ انیلا خود ایک اجنبی، پھوہڑ عورت کو اپنی آپا سمجھنے سے قاصر تھی۔ انیلا نے ایک مرتبہ لقمان بھائی کو کھری کھری سنادی تھی، کہ آپا کو اس حال میں پہنچانے کے وہی ذمہ دار ہیں۔ اُس دن تو وہ نادم سے ہوئے اور نتیجتاً کچھ ماہ بعدآپا کو پھر حاملہ کر کے مائکے بھجوادیا۔ اب تین مہینے سے آپا کھٹی ڈکاروں اور مٹکا سا پیٹ لیے اُس کے سر پر سوار تھیں۔ اُن کو آتا دیکھ کر انیلا اپنی کاپیوں میں خوامخواہ دقیق سوالات حل کرنے لگتی۔ معین پڑھنے میں نالائق تھا اور جہاں آراء کی maths بہت خراب تھی۔ انیلا کے خیال میں خراب حساب رکھنے والوں کو دنیا میں جینے کا کوئی حق نہیں تھا۔

بس اسٹاپ سے چلتے ہوئے انیلا تیزی سے گھر کی طرف جارہی تھی۔ آج ہی آتے ہوئے اُس نے کباڑی سے کسی کے ریسرچ کیے ہوئے فیثاغورث تھیورم پر لکھے thesis کا مسودہ خرید لیا تھا۔ گھر جاکر وہ اس پر غوروخوص کرنا چاہتی تھی، کہ دروازے ہی سے امی اور پڑوسنوں کے رونے دھونے کی آوازیں باہر آنے لگیں۔ دھڑکتے دل سے اُس نے دروازہ دھکیلا۔ صحن کے بیچوں بیچ آپا لیٹی ہوئی تھیں۔ سفید چادر سے ڈھکی ہوئی۔ پھولا ہوا پیٹ پچک چکا تھا۔ بال الجھ کر اور بھی سوکھی رسی جیسے ہوگئے تھے، مگر اُن کے چہرے پر آج بڑا اطمینان تھا۔ آگے ہو کر انیلا نے انھیں دیکھا تو وہ مسکرا رہی تھیں، جیسے کہہ رہی ہوں، انیلا اب میرے پاس وقت ہی وقت ہے۔ تیل ڈال کر بال سنواروں گی، نیا گوٹا لگا جوڑا پہنوں گی، اُسی رنگ کی چوڑیاں پہن کرکھنکاؤں گی۔ اب اکیلی جو ہوں ۔۔۔ نہ بچوں کا جھمیلا ہے نہ میاں کا۔ اب نہ زندگی کادھڑکا رہا نہ موت کا۔ انیلا کو اُس وقت روتے بلکتے معین اور جہاں آراء سے اور بھی نفرت ہوئی۔ لقمان بھائی مسکین بنے آنسو پونچھ رہے تھے اور ابا کے ساتھ تجہیز و تکفین کی باتیں کررہے تھے۔ وہ آگے بڑھی کہ لقمان بھائی کو ایک تھپڑ رسید کرے کہ بس میری آپا کو واپس لاکر دو! میں کچھ نہیں جانتی! مگر لقمان نے سختی سے انیلا کا ہاتھ پکڑ کر اپنی طرف کرلیا، بلکہ جکڑ ہی لیا۔ دور بیٹھی اماں دھیرے سے بس مسکرادیں۔ لا الہ اللہ محمد الرسول اللہ! مرد جنازے کو کاندھا دینے آگے بڑھے۔ انیلا کو محسوس ہوا کہ اُس صحن سے اُس شام ایک نہیں دو جنازے اٹھے تھے۔

جس رات لقمان، انیلا کو اپنے نکاح میں لے کر ملیر کی اس آبادی میں آئے، اُس رات چاند نے بھی انیلا سے اپنا منہ چھپالیا تھا۔ شاید وہ اُس سیارے کی جانب چلا گیا تھا جہاں کبھی انیلا اپنا اسپیس شپ لے کر جانا چاہتی تھی۔ اماں کی آواز دور سے آتی رہی، ’’ارے تو لقمان تمھیں انجینئر بننے سے روکیں گے کیا؟ شادی کے بعد پڑھائی جاری رکھنا۔ ہاں اب معین اور جہاں آراء کی تم خالہ نہیں ماں ہو۔‘‘ انیلا گم سم تھی۔ ارسلا کے حمل، پھر اُس کی جان لیوا زچگی اور اس سارے تکلیف دہ عرصے کے بعد آج لقمان کو راحت نصیب ہونے والی تھی۔ آنے والی سہاگ رات کا سوچ کر وہ مست تھے۔

ذرا سر پھری ہے انیلا تو کیا ہوا۔ مرد کے سائے میں بیٹھ کر کسی بھی سرکش عورت کا دماغ درست ہوجاتا ہے۔ بچوں کو آج نانی کے ہاں چھوڑ آئے تھے وہ۔ راستے ہی سے پھل دودھ مٹھائی خرید لیا تھا۔ ساس نے پلاؤ زردہ ساتھ بڑے سے ٹفن کیرئیر میں باندھ دیا تھا، کہ انیلا نے باورچی خانے کی کبھی شکل بھی نہیں دیکھی تھی۔ انھیں کیا معلوم تھا کہ انیلا نہ صرف باورچی خانے سے، بلکہ بہت سی جبلی اور فطری نعمتوں سے بھی محروم تھی۔ ساری رات لقمان حیلے بہانے سے انیلا کو سیج پر بلاتے رہے، مگر وہ اندھیرے صحن میں بیٹھی کائنات کی کروٹ، ستاروں کی الٹی چال، سیاروں کے ٹکرانے اور اِس کے نتیجے میں نکلنے والی آگ، توانائی اور تپش کی حدت پر غور کرتی رہی۔ اپنی زندگی ختم کرنے کے بارے میں بھی سوچنے لگی۔۔۔ کہ اچانک ایک چھوٹی سی حیوانی بھو بھو نے اُس کی توجہ اپنی طرف مبذول کروالی۔ گلی میں بھوک سے بلبلاتا اور اپنے زخم چاٹتا یہ چھوٹا سا کتے کا پلا ٹائیگر تھا۔ سترہ سالہ انیلا نے سب بھول بھال ماتھے سے گھونگھٹ، ٹیکا نوچا اور کٹوری سے کتے کو دودھ پلانے لگی۔ وصل کے لیے تڑپتے لقمان جب حجلۂ عروسی سے اٹھ کر صحن میں آئے، تو کم سن دلہن ٹائیگر کو گود میں لیے وہیں سر جُھکائے سوچکی تھی۔

سردی کی شدید لہر آئی ہوئی تھی۔ رجب علی قادری نے پیر کرم الدین قادری کے سالانہ عرس کا بڑھیا اہتمام کر رکھا تھا۔ قوالی کے بعد لنگر کا انتظام تھا۔ غلام فرید صابری، مقبول صابری اور ہمنوا پوری عقیدت سے، ’’خواجہ کی دیوانی، میں تو دیوانی‘‘، گارہے تھے۔ رجب علی قادری پھولوں کے ہار پہنے سجادہ نشین بنے بیٹھے تھے۔ مریدین قوالوں پر بڑے بڑے نوٹ نچھاور کررہے تھے۔ بیشتر مرد سفید کرتے پاجامے میں تھے۔ مشتاق حسین کو سخت حال آیا ہوا تھا، جھوم جھوم کر نوٹ اچھال رہے تھے۔ خواتین کے لیے پردے کا خصوصی انتظام تھا، محلے کی پردہ دار بیبیاں وہاں سے محفل سماع میں شریک تھیں۔

انا جی دو ایک مرتبہ ادھر سے اُدھر متوحش نظروں سے کسی کو تلاش کرتی گزر چکی تھیں۔ میں جو سفید کرتے پاجامے پر سیاہ شال اوڑھے، ’’بھر دو جھولی‘‘ پربلاوجہ جھوم رہا تھا، انا جی کو دور سے دیکھ کر ارمان کے پیچھے لگے گاؤ تکیے کی اوٹ میں تقریباً لیٹ گیا۔ ارمان نے مجھے گھورا کہ کیا ہوا؟ میں بولا، ’’یار، کوئی کام دے دیں گی ابھی۔ ہمارے کتوں کی دوا لادو، روٹیاں پکوادو یا پھر مونگ پھلیاں لادو۔ میں نہیں جارہا یہاں سے اٹھ کر۔‘‘ ارمان بولا، ’’چلتے ہیں ناں، میرے تو سر میں درد ہورہا ہے۔ ہم اسپیکر کے اتنے پاس بیٹھے ہیں اور وہ ڈھول والا، کتنے زور زور سے ڈھول پیٹ رہا ہے۔‘‘ میں ارمان کو لتاڑتے ہوئے بولا، ’’وہ ڈھول نہیں، کانگو ڈرمس ہیں بے وقوف، جاہل! مغربی افریقہ میں افریقن قبیلے بجاتے ہیں۔‘‘ میں ارمان کو نیچا دکھانے کا کوئی موقع ہاتھ سے جانے نہیں دیتا تھا۔ ویسے بھی وہ آجکل بہت چپ چاپ اور اُداس رہتا تھا۔ اُس کے ابو امریکا سے آگئے تھے۔ وہ کہیں لاپتہ نہیں ہوئے تھے، بلکہ انھیں بلڈ کینسر ہوگیا تھا۔ میں اب ہر وقت اُسے ساتھ رکھتا اور اوٹ پٹانگ مذاق کرکے اُسے ہنسایا کرتا تھا، کہ کہیں وہ سچ مچ خودکشی نہ کرلے۔ ارمان نے پھر بیزاری سے کہا، ’’مسرور۔ چلو ناں۔ بہت نیند آرہی ہے، گھر جانا ہے۔‘‘ میں نے بتایا، ’’ارے، ابھی تو تاجدارِ حرم نہیں پڑھی انھوں نے۔‘‘ ارمان بولا، ’’گائی نہیں انھوں نے۔‘‘ میں نے کہا، ’’قول سے ہے قوالی اورقوالی پڑھی جاتی ہے، گائی نہیں جاتی جاہل۔ اس کے آخر میں ترانہ پڑھا جاتا ہے، پھر رنگ گایا جاتا ہے۔ اور پھر محفل سماع کا سب سے متبرک اور اہم مرحلہ آتا ہے، لنگر کا۔ یعنی بریانی، قورمہ اور تافتان و زردہ۔ اسے کھائے بغیر تو میں نہیں ٹلنے کا۔ گناہ ملتا ہے اگر لنگر میں شامل نہ ہوں۔‘‘

انا جی پھر پریشان سی ایک قنات کے پاس سے ٹائیگر، ٹائیگر کہہ کر پکارتی گزریں۔ یہ دیکھ کر میں بولا، ’’افوہ! تو ان کا منحوس ٹائیگر کہیں دفعان ہوگیا ہے۔‘‘ بچھیا کی پندرہ بیس بوٹیاں بھنبوڑنے کے بعد، اب میں نلی سے جھٹک جھٹک کر گودا نکالتے ہوئے بولا، ’’سارا مزہ کرِکرِہ کردیا اس لنگڑی بڑھیا نے۔‘‘ ارمان نے ڈانٹا، ’’ایسے نہیں بولتے بدتمیز۔‘‘ میں نے کہا، ’’بھئی میں ذرا حقیقت پسند ہوں۔ جو ہے سو ہے۔ تم وہ زردہ پلیٹ میں اوپر تک بھر کر لے آؤ، کاہل! دیکھتے نہیں لوگ دستر خوان سے ہاتھ پونچھ کر اب زردے پر ٹوٹ پڑنے والے ہیں۔ پھر ایسی افراتفری ہوگی، کہ جیسے کہ قیامت کا صور پھونکا جاچکا ہو۔ کوئی کسی کو نہیں پہچانے گا۔ جلدی جاؤ اُدھر۔‘‘ ارمان شرمندگی سے بُدبُدایا، ’’میں نہیں لارہا۔ ابھی لوگ بریانی کھا رہے ہیں میں زردہ لے آؤں۔ مجھے شرم آتی ہے بھئی۔‘‘ میں نے اُسے کڑی نظروں سے گھورا، جس میں بغیر کہے یہ الفاظ پنہاں تھے، کہ اب نہ تو انا جی سے maths کے ٹیوشن پڑھواؤں گا اور نہ ہی VCR پرخاص فلمیں دکھاؤں گا۔ اور نہ واک مین، جو مزمل بھیا نے مجھے بھیجا ہے، وہ تو بالکل بھی سننے کو نہیں دوں گا۔ ارمان ڈش تھماتے ہوئے بولا، ’’یہ لو۔‘‘ وہ سدا کا تابعدار۔۔۔ ایک نہیں دو پلیٹ بھر زردہ لے آیا۔۔۔کہ اچانک انا جی مجھے کالر سے اوپر گھسیٹتے ہوئے بولیں، ’’مسرور، مسرور! فوراً میرے ساتھ آؤ۔ ٹائیگر کہیں نہیں ہے۔ دوپہر سے غائب ہے۔ اُس نے کھانا بھی نہیں کھایا۔ سارا محلہ چھان چکے ہیں ہم۔ نادر شاہ بھی عجیب سویا سویا پڑا ہے۔ کسی نے کوئی شیطانی کی ہے ہمارے بچوں کے ساتھ۔‘‘ میں نے نلی سے نکالے گودے اور زردہ کو ملا کرجلدی جلدی تقریباً نگلتے ہوئے کہا کہ، ’’میں اور ارمان محلے کے باہر چھوٹے تالاب تک دیکھ کر آتے ہیں۔ اگر یہاں نہیں ہے تو چھوٹے تالاب کی طرف چلا گیا ہوگا، کبھی کبھار جاتا ہے وہ وہاں۔‘‘ دل ہی دل میں کتوں کی تمام نسلوں اور اناجی کے آباء واجداد تک کو کوس کر میں چھوٹے تالاب تک پہنچا۔ فجر ہورہی تھی، ارمان نیند سے لڑھک رہا تھا۔ ہم لوٹ ہی رہے تھے کہ دلدل میں کوئی چیز ہلتی ہوئی نظر آئی۔ ارمان چلایا، ٹائیگر! ٹائیگر!

بوڑھا ٹائیگر امید بھری نظروں سے ہم دونوں کو دیکھنے لگا۔ مجھے تو وہ میری خوشبو سے پہچانتا تھا۔ میں آگے جاتے جاتے رک گیا۔ ارمان یہ دیکھ کر بولا، ’’کیا ہوا؟ جاؤ ناں آگے۔ مجھے تو کتوں سے ڈر لگتا ہے اور تمھیں تو وہ کچھ بھی نہیں کہے گا، جاؤ۔ وہ کیچڑ اور دلدل میں پھنس گیا ہے، کہیں مر نہ جائے جلدی جاؤ۔‘‘ میں نے اطمینان سے کہا، ’’مر ہی جانے دو اُسے یار۔ امی نے عید کا نیا جوڑا دیا تھا پہننے کو، اس شرط پہ کہ میں اس پر کسی قسم کے داغ نہیں لگاؤں گا۔ دیکھ رہے ہو یہ سفید کرتا پاجامہ، اگر خراب ہوگیا تو رمضان کی عید پر کیا پہنوں گا؟ تم تو ہو پورے احمق۔‘‘ ارمان آہستہ سے بولا، ’’اور ٹائیگر؟‘‘ میں بے بسی سے گویاہوا، ’’میں نے کل ہی مونا کے ہاں Readers Digest میں پڑھا تھا، کتوں کی عمرآٹھ سے دس سال ہوتی ہے۔ جلد یا بدیر ٹائیگر کو مر ہی جانا ہے ! تو، آج ہی سہی۔‘‘

کچھ دیر بعد میں سینہ تانے، ٹائیگر کی لاش اٹھا کر محلے کی طرف آنے لگا جو مجھے ایک مچھیرے نے نکال کر دی تھی۔ انا جی پر تو سکتہ طاری ہوگیا۔ دس دن تک انھوں نے باقاعدہ ٹائیگر کا سوگ کیا۔ اُس کی لاش قریب ہی ایک خالی پلاٹ میں دفنائی گئی۔ نادرشاہ اور جگا بھی عرصے تک ماتم کناں رہے۔ سوائے میری دادی کے اور کوئی ٹائیگر کی تعزیت کو نہ گیا، جس کا انا جی نے خاصا برا مانا۔

انا جی نے ٹائیگر کی ناگہانی موت کا ذمہ دار نہ صرف رجب علی قادری اور اُن کے مریدوں کو ٹھہرایا، بلکہ اس کی FIR کٹوانے ملیر تھانے بھی پہنچ گئیں۔ یہ اور بات کہ رپورٹ درج کرنے کے بعد SHO نے انھیں چائے پلائی، عزت سے رخصت کیا اور رپورٹ پھاڑتے ہوئے بولا، ’’بے چاری! اچھی خاصی عورت پاگل ہوگئی ہے۔‘‘

جب رشتۂ مناکحت عداوت پر قائم ہو، تو وہی ہوتا ہے جو انیلا اور لقمان کی زندگیوں کے ساتھ ہوا۔ انیلا جب بھی یونیورسٹی سے داخلہ فارم لاتی، لقمان صاحب فارم اور فیس بھرنے کے بجائے بہاولپور اور لاڑکانہ کے دوروں پر نکل جاتے۔ اماں تو اُسے لقمان کے سپرد کرکے صرف حج عمرہ کی باتیں کرتیں۔ ابا گھریلو معاملات میں دخل اندازی پسند نہیں کرتے تھے۔ ویسے بھی انھیں اپنے شاعر دوستوں اور مشاعروں سے فرصت نہ تھی۔ دو چار مرتبہ لقمان نے انیلا کے ساتھ زبردستی کرنے کی کوشش کی تو اُس نے بہت واویلا مچایا۔ اتنا کہ باہر سوئے معین اور جہاں آراء سہم گئے۔ اگلے دن پڑوسی خیریت پوچھنے آگئے کہ کیا وہ نئی دلہن کو زدوکوب کررہے ہیں؟ اب لقمان کسی کو کیا بتاتے، کہ انھیں شرعی حق حاصل ہو کر بھی کچھ میسر نہ ہوا۔ انیلا کسی نفسیاتی مریضہ کی طرح سارا دن پلنگ پوش اور تکیے کے غلاف دھوتی رہی۔ انیلا کے خیال میں اُس کے جسم کے ساتھ ساتھ اُس کا سارا گھر بھی گندا ہوگیا تھا۔

بہت جلد ٹائیگر کے ساتھی جگا اور پھر نادرشاہ بھی آگئے۔ اب برسوں سے انیلا کا معمول تھا کہ دن کے بارہ بجے قریبی مارکیٹ سے کتوں کی خوراک خرید کر، راستے بھر ملنے والے آوارہ کتے بلیوں کو بھی فیضیاب کرتی ہوئی گھر تک پہنچتی۔ کبھی کبھارباقی بچ جانے والے چھیچڑے وغیرہ، اپنی چھت پر کھڑی ہو کر چیل کوؤں کے لیے بھی اچھالتی کہ پرندے بھی کیوں اس من و سلویٰ سے محروم رہیں۔ کبھی یہ چھیچڑے صحن میں پڑھتے کسی بچے کی کاپی پر جاگرتے، کبھی میرے ابا کی چائے کی پیالی میں اور کبھی انصاری صاحب کے انگلش لان میں یوگا کرتی اُن کی بیگم کے منہ پر۔ محلے میں غم و غصہ بڑھتا جارہا تھا کہ ہندوستان کی جانب سے سنہ ۷۱ء میں جنگ کی دھمکیاں آنے لگیں بلکہ ہوائی اڈے پر بمباری کی افواہیں اڑنے لگیں۔ ملک پر جنگ کے سائے منڈلانے لگے، جس کے اثرات برسوں رہے اور شاید ہمیشہ رہیں گے۔