بہت دیر ہو گئی
رقیہ پارٹی سے واپس آکر جلدی جلدی کپڑے بدل کر مسہری پر پڑ گئی۔ وہ رونا چاہتی تھی مگر آنکھوں میں آنسو نہیں آ رہے تھے۔ پارٹی کا سماں ایک گڑبڑ خواب کی طرح اس کے سامنے آ رہا تھا۔ ہاں سعید، سعید کو دیکھنے، سعید سے ملنے کے لیے ہی وہ ایسے کپڑے پہن کر گئی تھی جو آٹھ برس پہلے اس نے پسند کیے تھے۔ آٹھ سال پہلے ایسی ہی ایک پارٹی میں سعید نے سب سے الگ ہوکر اس سے کہا تھا، تمہارے کپڑے یہاں سب سے اچھے لگ رہے ہیں۔ تم سب سے زیادہ جچ رہی ہو۔ اس نے کہا تھا، ’’بہت شکریہ۔‘‘ ہلکے سرخ رنگ کے پھولوں والی قمیض، سفید شلوار، دکان میں یاقوت کے بندے، پیر میں سرخ چپل، چہرہ گلابی پوڈر اور ہونٹوں پر سرخ لپ اسٹک یونہی وہ آج بھی سج کر گئی تھی۔ مگر آٹھ برس میں سعید کیسا بدل گیا تھا۔ سب کے سامنے کہنے لگا، ’’ارے رقیہ، تم کس قدر بدل گئیں۔ کیا ہوا گالوں میں گڑھے کیسے پڑ گئے اور چہرہ پر یہ نشان کیسے جو پوڈر سے بھی نہیں چھپتے۔‘‘ وہ یہ کیا کہہ رہا تھا۔ معلوم ہوا کہ اس نے تمام جذبات پر پانی، ٹھنڈا برف کا پانی ڈال دیا۔ آٹھ برس سے وہ اس کے خیال میں محو تھی۔ وہ تعلیم حاصل کرنے انگلینڈ اور پھر امریکہ گیا تھا۔ دل کہا کرتا کہ واپس آکر وہ اسی کو پسند کرے گا۔ نسیمہ کو وہ جو بھی خط لکھتا اس میں رقیہ کو ضرور پوچھتا شاید وہ بھی اسے اتنا ہی چاہنے لگا تھا۔ کیا سچ مچ پوچھا کرتا تھا یا نسیمہ محض مروت میں کہہ دیتی تھی، ’’بھیا کا خط آیا ہے تم کو پوچھا ہے۔‘‘ آخر وہ براہ راست بھی اسے خط لکھ سکتا تھا۔ مگر کبھی کوئی پرزہ بھی نہیں لکھا اور اب آکر تو اس نے اسے اجنبی کی طرح پہچانتے ہوئے گالوں میں گڑھے، چہرہ پر نشان ہی دکھائی دیے۔ وہ بھی کچھ زیادہ تگڑا اور بڑا نظر آیا تیس سے اوپر نکل گیا ہے۔ رقیہ کو پہلے سے زیادہ اچھا لگا۔۔۔ مگر اچھا لگنے سے کیا ہوتا ہے۔ وہ تو اسے اچھی نہیں لگی۔ وہ ریحانہ، پروین، رعنا سب سے کھلکھلا کھلکھلاکر ہنستا رہا۔ رقیہ کی طرف جب بھی رخ کیا تو خاموش ہو گیا اور پھر سب کے سامنے اس کے چہرہ پر تنقید کرنے لگا۔
اس نے اپنا رخ کپڑوں کی الماری کی طرف کیا، جس میں قد آدم شیشہ لگا تھا۔ اس کے چہرے پر جو چھائیاں پڑ گئی تھیں صاف دکھائی دیں۔ یہ کم بخت کسی طرح نہیں جاتیں کیسی کیسی دوائیں کیسی کیسی کریمیں لگائیں اور یہ گڑھے شمیم تو انہیں کی تعریف کرتا تھا، ’’ہائے نزاکت‘‘ کہہ کر تڑپ جاتا تھا۔ مگر وہ اسے بالکل نہ بھایا۔ اس کے دل میں سعید گھسا ہوا تھا۔ یہ سعید جو ایک دفعہ آگ لگا کر بالکل الگ ہو گیا معلوم ہوتا ہے کہ جیسے اس نے کبھی کہیں دور سے اسے دیکھا تھا۔ اب اک دم سے دیکھ کر یاد کیا۔ انگلینڈ اور امریکہ میں نہ معلوم کتنی لڑکیوں سے ملا ہوگا۔ وہاں کی لڑکیاں تو خود مردوں کا پیچھا کرتی ہیں اور پاکستانی انہیں خاص طور پر بھاتے ہیں اور اب یہاں کوئی انہی کی طرح کی ڈھونڈ لےگا۔ اتنا کوالیفائیڈ ہو کر آیا ہے اونچی جگہ ملےگی اور نہ جانے کتنے رئیسوں کی لڑکیاں اس کے پیچھے دوڑیں گی۔ پارٹی سے جاتے وقت بھی کئی اس کے ساتھ موٹر میں گئیں۔ رقیہ کو کوئی اشارہ بھی نہیں کیا۔ شمیم کس قدر لٹو تھا مگر رقیہ نے اسے لفٹ ہی نہیں دی۔ آخر کو اس نے شکیلہ سے شادی کر لی۔ رقیہ نے کہا تھا، ’’پیچھا چھوٹا، دو برس تک اس نے ہلکان کیا۔ اس سے سعید کتنا اچھا تھا۔‘‘
پھر کلیم سے ملاقات ہوئی۔ اس نے رقیہ کے پیچھے کئی ہزار خرچ کر دیے ہوں گے۔ پرزنٹ، سنیما، ہر تفریح میں ساتھ، مگر رقیہ نے اس کی طرف بھی رخ نہیں کیا۔
آٹھ برس بڑا لمبا وقت ہوتا ہے۔ وہ انٹر میں تھی سعید بھی اس کے ساتھ تھا۔ بی ایس سی میں ساتھ رہا اور اس کے بعد انگلینڈ چلا گیا۔ آٹھ برس، دو برس ایم اے کے، ایک بی ٹی کا اور پانچ برس کی ملازمت، تین برس پہلے تک ہر طرف سے پیغام آتے رہے۔ اماں، ابا، بھائی سب نے رشتہ لگانا چاہا اور آخر میں رومانہ کے والد۔ اس کمبخت اطہر نے کہا تھا، ’’یہ ایسی نارنگی ہے جو پیڑ پر لگے لگے سوکھ گئی۔‘‘ کیا وہ سچ تھا۔ ’’اب کوئی جوان تو پھنستا نہیں کوئی دوجا جو کرلے تو کرلے۔‘‘ قمر کی اماں نے کہا تھا۔
’’عورت بیسی اور کھیسی اور تو اب تیس کو ہونے کو آئی، اب شادی ہو چکی۔‘‘
’’ادھر لڑکی نے نوکری کی اور ادھر شادی کے دروازے اس کے لیے بند ہو گئے۔‘‘
’’ارے نوکری سے عورت سوکھنے لگتی ہے اور اگر موٹی ہو تو ڈھل جاتی ہے۔‘‘
’’لڑکیاں بی اے میں آتی ہیں تو بچوں کی طرح کھلی ہوئی اور بی اے کرتے کرتے مرجھانے لگتی ہیں اور ایم اے کے بعد تو بالکل کھپٹا 58 ہو جاتی ہیں۔ چہرہ پر خون بھی نہیں رہ جاتا۔‘‘
’’جوبن تیرے ڈھل گئے اک آن خالی رہ گئی، سرمایہ تیرا بک گیا دکان خالی رہ گئی۔‘‘ بڑا پست شعر مگر قاسم بات بات میں یہ سنا دیتا تھا۔
’’تم سمجھتی ہو کہ جو جو وقت جا رہا ہے وہ تمہاری لڑکی کی قیمت بڑھ رہی ہے۔‘‘ خالہ جان نے اماں سے کہا۔
’’اے بہن کیا کروں کوئی جڑتا ہی نہیں۔‘‘
’’آج کل کے زمانے میں گھر بیٹھے کوئی نہیں آتا۔ لڑکی ادھر ادھر لے جاؤ۔ فیشن کرنے دو اور لڑکیوں کے ساتھ پھرنے دو۔ کوئی نہ کوئی پسند کر لےگا۔ آخر تسنیم کی اسی طرح شادی ہوئی تھی۔ یہ پڑھانے جانا، چلے آنا کافی نہیں ہے۔‘‘ خالہ نے مشورہ دیا تھا۔
مگر اس وقت بھی کافی دیر ہو گئی تھی۔ اس کے دل میں سعید کیا بیٹھا تھا، نہ لینا ایک اور نہ دینا دو۔ یہ دل میں کون کہتا تھا، ’’آئے گا آنے والا آئےگا آنے والا۔‘‘ وہ آنے والا آ گیا۔ مگر کس تیور سے آیا تھا۔ ’’تمہارے چہرے پر دھبے، تم بدل گئیں۔‘‘ دل کو کاٹ کر رکھ دیا۔ اب اگر رخ کرے تو ٹھوکر مار دے۔ مگر اب اس کے رخ کرنے کی کوئی امید نہ تھی۔ آٹھ برس سے پلتی ہوئی امید سے اس کی عادت پڑ گئی تھی۔ ایک اسٹروک میں ختم ہو گئی۔ اب اس کے دل سے ایک آہ نکلی اور آنکھوں سے آنسو ٹپکنے لگے۔
ہائی اسکول کے سرٹیفکیٹ کے حساب سے بھی وہ اب تیس کی تھی حالانکہ وہ اپنے کو ۲۲ سے ۲۴ تک کا بتاتی تھی۔ سب کہتے رہنے کے باوجود اسے یہ احساس نہ تھا کہ اس کا حسن ڈھل گیا ہے۔ آج سعید نے اس کے آنکھوں کے سامنے کے سب پردے اک دم ہٹا دیے تھے۔ وہ بلک بلک کر رونے لگی۔ تکیہ گیلا ہوگیا۔ اس نے والدہ سے کہہ دیا تھا آج کھانا نہیں کھاؤں گی پارٹی میں بہت کھا لیا ہے۔ اب اسے رات بھر روتے رہنے یا روتے روتے سو جانے کے سوا اور کچھ کام نہیں تھا۔
گھنٹے بھر سے زیادہ رونے دھونے اور کروٹیں بدلنے کے بعد کچھ طبیعت ہلکی ہوئی اور اب اسے اس کی شاگردہ رومانہ کے والد نعیم صاحب سی ایس پی ریٹائرڈ یا د آئے۔ وہ اپنی لڑکی کو روز کالج پہچانے اور لے جانے موٹر پر آتے تھے۔
’’ڈیڈی یہ ہماری مس ہیں پروفیسر رقیہ۔‘‘
’’آپ کہاں رہتی ہیں آیے آپ کو آپ کے گھر اتار دوں گا۔‘‘
اور پھر وہ روز ہی اسے اس کے گھر سے لیتے اور گھر پہنچا دیتے۔ کیسی آنکھیں گڑو گڑو کر وہ رقیہ کو دیکھتے تھے۔ معلوم ہوتا تھا کہ نظر جسم کے آر پار ہو جائےگی۔
’’مس آپ ہمارے گھر ہوتی چلیں۔‘‘ رومانہ نے کہا تھا۔
اور اس کا گھر کیسا بڑا، کیسا عمدہ، لان، گھاس، پھولوں کی کیاریاں، ایک طرف نیم کا درخت، دوہزار گز کا پلاٹ، چار بڑے بڑے حصے، دو منزلے، دوہزار کا کرایہ اور آٹھ سو پنشن جس حصے میں رہتے تھے، دو بڑے بڑے بیڈروم، ایک ہال، بڑا سیٹ صوفے کا اور کھانے کی میز، چائے پر کیا کیا سامان تھا۔
’’رومانہ کی شادی میرے بھائی کے لڑکے سے ٹھہری ہے۔ وہ جلدی کر رہے ہیں۔ میں کہتا ہوں بی اے پاس کرلے تو شادی ہو۔ اس کی ماں کو مرے ہوئے چار برس ہو گئے۔ اس کی شادی ہو گئی تومیں اکیلا رہ جاؤں گا۔ میرے تین لڑکے ملازم ہیں۔ سب کی شادیاں ہو گئیں۔ دو لڑکیاں بھی بیاہ گئیں۔ اب یہ رہ گئی ہے۔‘‘
’’سب بھائی ڈیڈی سے کہتے ہیں کہ آپ ایک اور شادی کر لیجئے۔ ابھی آپ ساٹھ کے نہیں ہے۔‘‘ رومانہ نے کہا تھا۔
نعیم صاحب کچھ نہیں بولے۔ بڑی حسرت سے رقیہ کو دیکھتے رہے تھے۔ اب تو روز ہی وہ رقیہ کو اپنے گھر لے آتے۔
’’آپ رومانہ کو گھر پر پڑھا دیا کیجئے۔ آپ جو ٹیوشن فیس کہیں گی میں دوں گا۔ موٹر پرگھر سے لے آیا کروں گا۔ موٹر پر پہنچا آیا کروں گا۔‘‘
’’وقت کہاں ہے۔‘‘ رقیہ نے کہا تھا۔
’’آپ کالج سے یہاں آتی ہیں، چائے پی کر تھوڑی دیر آرام کریں، ہمارے یہاں مہمانوں کے لیے ایک بیڈروم خالی ہے اس میں آپ آرام کریں اور پھر لان پر سے دھوپ چلی جانے کے بعد میں لان پر بیٹھ کر آپ سے پڑھوں گی اگر دیر ہو جائے تو رات کا کھانا بھی ہمارے ساتھ کھا لیا کیجئےگا۔ آخری ڈیڈی گاڑی پر آ پ کو پہنچا ہی آیا کریں گے۔‘‘
نعیم صاحب رومانہ کو لیے ہوئے اس کے گھر بھی آئے تھے اور اس کے والد سے اجازت لے لی تھی۔ پہلے مہینہ کے دوسو روپیہ والد کے ہاتھ میں رکھ دیے تھے۔ ’’آپ اتنے باوقار اور ذمہ دار آدمی ہیں اگر رقیہ آپ کے یہاں رہ بھی جائے تو ہم کو کوئی اعتراض نہ ہوگا۔‘‘ والد نے کہا تھا۔
اور پڑھانا تو نام کا تھا، نعیم صاحب سیر کراتے تھے، ریستورانوں میں لے جاتے تھے۔ کھانے کے بعد گھر چھوڑ جاتے تھے۔ کتنا خلوص، کتنی محبت، کتنا آرام۔
’’ہاں یہ بڈھے لوگ بہت چاہتے ہیں، اچھا ہے شادی کر لے۔ ابھی دس بیس برس تو چل جائےگا۔‘‘ خالہ جان نے کہا تھا اور رومانہ کی شادی ہوئی نعیم صاحب کے سب لڑکے لڑکیاں، بہوئیں، داماد آئے گھر بھر گیا۔ کرایہ والے حصوں میں بھی کمرے مانگ لیے گئے۔ نعیم صاحب نے سب کے سامنے کھانے کی میز پر کہا، ’’یہ پروفیسر رقیہ، رومانہ کی استانی ہیں۔ شادی کی سب باتوں میں ان کی رائے اہم رہےگی۔‘‘
رومانے کے بیاہ جانے کے بعد بھی نعیم صاحب موٹر لے کر آتے رقیہ کو کالج پہنچاتے اور پھر واپس بھی لے آتے۔ دوسال میں وہ ان سے بےباک ہو گئی تھی۔ وہ اس سے ’’تم‘‘ سے بات کرنے لگے تھے۔ اسے عمدہ پارکر کا فاؤنٹین پین اور اومیگا گھڑی لے دی تھی۔
پھر ایک دن خط اس کے ہاتھ میں دیا اور بوکھلاہٹ میں موٹر چلا کر غائب ہو گئے تھے۔
’’رقیہ تم نے میری زندگی کے ۳۵ برس کم کر دیے جب میں نے تمہیں پہلے دن دیکھا تھا تو مجھے محسوس ہوا کہ جب میں بیس برس کا تھا تو میرے سامنے ایک لڑکی آئی تھی وہی اب پھر آ گئی۔ میری اس سے شادی نہیں ہو سکی تھی اور وہ مر گئی تھی۔ گھر والوں نے رومانہ کی ماں سے شادی کردی تھی مگر میں تمام زندگی اسی شکل کو تلاش کرتا رہا جو تمہاری ایسی تھی۔ اب تم مل گئی ہو۔۔۔ آگے کچھ نہیں کہتا۔ تم خود سمجھ لو۔‘‘
وہ بڑے شر میلے آدمی تھے۔ یہ خط دینے کے بعد کئی دن وہ غائب رہے۔ پھر رقیہ کو کالج لینے پہنچے۔ وہ ان کی موٹر میں بیٹھ تو گئی مگر سخت نگاہ سے انہیں دیکھتی رہی انہوں نے اپنا ورد جاری رکھا مگر کھل کر بات نہیں کی۔ رقیہ نے ان کے گھر جانے یا ان کے ساتھ سیر کرنے سے انکار کیا۔
انہوں نے رقیہ کے والد سے سب حال بیان کر کے کہا، ’’آپ کی اجازت ہو تو میں رقیہ سے شادی کا پروپوزل کروں۔‘‘
والد نے اجازت دی۔ اماں نے بھی کہا، ’’کیا برا ہے اتنا مالدار ہے۔ اسکول میں روز کی گھس گھس سے تو اچھا ہے اور پھر ایک لاکھ کی جائیداد مہرمیں رکھنے کو بھی کہا ہے۔ میں تو کر دوں گی۔ وہ تم سے کہے گا تم انکار نہ کرنا۔‘‘
اب رقیہ بےقرار ہو کر اٹھ بیٹھی اور چیخ کر رونے لگی۔ ہائے وہ اس سے کیوں تن گئی تھی۔ اس سعید کے مارے یہ کیسا اس کے دل میں بیٹھ گیا تھا۔
پھر روتے روتے سو گئی اور نہ معلوم کیسے کیسے خواب دیکھتی رہی۔ بار بار آنکھ کھل جاتی اور وہ کہتی، ’’ایسا محبت دار آدمی۔ اف۔ اف۔ امی سے کیسے کہا گیا تھا کہ اب سے آپ میرے گھر نہ آیےگا۔‘‘ اور پھر نعیم صاحب اس کے گھر نہ آئے تھے۔ کئی مہینے ہوئے تھے۔ ایک، دو، تین، چار، پانچ، چھ، سات مہینے سے وہ نہیں آئے تھے۔ اٹھتے ہوئے اس نے طے کیا کہ وہ خود نعیم صاحب کے یہاں جائےگی۔
وہ کالج کے وقت سے ایک گھنٹہ پیشتر گھر روانہ ہوئی۔ رکشہ پر بیٹھ کر نعیم صاحب کے گھرکی طرف چلی۔ گھر جوں جوں قریب آتا گیا وہ اس کا دل دبدباتا گیا۔ رکشہ گھر سے آگے نکل گئی اور وہ رکوانا بھول گئی۔ پھرا س نے رکشہ والے سے کہا، ’’واپس لے چلو۔‘‘ مگر گھر کے پاس پہنچ کر قریب کی گلی میں مڑوائی کافی دور جاکر پھر کہا، ’’واپس لے چلو۔‘‘ کئی دفعہ ایسا کرنے کے بعد رکشہ والا بولا، ’’کہاں تک چکر کھلایےگا؟‘‘ اس نے جواب دیا، ’’تم کو اپنے کرائے سے مطلب ہے کہ چکر سے۔ میں دن بھر چکر لگواؤں گی۔ تمہارے میٹر سے جو کرایہ بنے لے لینا۔‘‘ رکشہ والا خاموش ہو گیا اور چکر لگاتا رہا۔
پانچویں چکر میں نعیم صاحب کے گھر سے چار گھر آگے ایک گھر سے ایک لڑکی نکلتی دکھائی دی۔ جس نے اس کو سلام کیا۔ اس نے رکشا والے سے کہا، ’’یہاں روک دو۔‘‘ لڑکی اس کے پاس آگئی۔ اس نے کرایہ دیا اور لڑکی کی طرف رخ کر لیا۔
’’کیا مس آپ کوئی مکان ڈھونڈ رہی ہیں؟‘‘
’’تم میری شاگرد رہی ہو مجھے یاد آیا۔ کیا نام ہے تمہارا یہ یاد نہیں رہا۔‘‘
’’میں رومانہ کے ساتھ پڑھتی تھی۔ اس کی شادی میں بھی شریک تھی۔ پھر یونیورسٹی میں گئی۔ اب ایم اے فائنل میں ہوں۔ رومانہ کے والد نعیم صاحب مجھے یونیورسٹی پہنچا دیتے ہیں۔ آج دیر ہو گئی۔ قریب ہی تو گھر ہے دیکھنے جا رہی ہوں کہ کیا ہو گیا۔ میرا نام فہمیدہ ہے۔ آپ کو یاد نہیں۔‘‘
’’اچھا تم جاؤ۔ مجھے ادھر جانا ہے ‘‘
’’آپ نے رکشا تو چھوڑ دی۔ ساتھ چلیے نعیم صاحب کی موٹر میں بیٹھ کر چلی جائیےگا۔ آپ کے کالج کا وقت قریب ہے۔ کیا آج کالج نہیں جائیےگا۔‘‘
رقیہ سٹپٹائی مگر اسکے دل کو اس لڑکی کی وجہ سے ڈھارس ہوئی اور اس کے منہ سے نکل گیا، ’’اچھا چلو۔‘‘
دونوں دس قدم ہی گئی ہوں گی کہ نعیم صاحب موٹر پر آتے دکھائی دیے۔ موٹر روک کر بولے، ’’ارے آج دیر ہوگئی۔ اچھ چلو۔‘‘ اب انہوں نے رقیہ کو بھی دیکھا اور بولے، ’’آپ ادھر کہاں آگئیں، آپ بھی بیٹھ جائیے کالج اتار دوں گا آپ کے۔‘‘
فہمیدہ نعیم صاحب کے پاس بیٹھی اور رقیہ پیچھے بیٹھی۔ اسے اس کے کالج پراتار کر نعیم صاحب چلے گئے۔
جھوٹا، مکار کہتا تھا کہ تمہاری ایسی صورت کی تلاش میں میں تیس پینتیس برس سے تھا اور اب مجھے دیکھا بھی نہیں۔ سات مہینے کے اندر ہی اس صورت کو جس کو اتنے برسوں سے تلاش تھی بھول گیا۔ یہ جوان بھرے بھرے جسم کی تھرکتی ہوئی فہمیدہ کو دیکھ کر لٹو ہے ساٹھ برس کا مرد اپنی لڑکی کی برابر۔ سب سے چھوٹی لڑکی کی برابر کی لڑکی سے اٹک رہا ہے اور لڑکی بھی پھیلی جا رہی ہے۔ ہاں ایک لاکھ کا مہر، موٹر، کوٹھی کون دے گا۔ رقیہ کو خریدنے چلا تھا۔ وہ نہیں بکی تو اب اس سے زیادہ جوان خرید رہا ہے۔ اچھا ہوا تھا کہ رقیہ نے اس سے انکار کر دیا تھا۔ اب کبھی اس کی طرف رخ نہ کرےگی۔۔۔
اس سے درجے بھی نہ پڑھائے گئے۔ ہر درجہ کو ٹال ٹال دیا۔ ٹیچر زروم میں آکر سب سے الگ بیٹھی۔ ایک کتاب کھول کر سامنے رکھی اور سر اس پر جھکایا اور سوچتی رہی۔
’’اے آج کیا ہے رقیہ چپ چپ گم صم ہو؟‘‘ کئی ساتھنوں نے پوچھا۔
’’میرے سر میں درد ہے۔ شاید بخار آنے والا ہے۔‘‘ اس نے سب کو ٹال ٹال دیا۔
چھٹی کے وقت جب وہ کالج سے باہر آئی تو دیکھا نعیم صاحب موٹر لیے کھڑے ہیں۔ وہ موٹر کی طرف پیٹھ پھیر کر آگے بڑھ رہی تھی تو وہ لپکتے ہوئے پاس آئے اور بولے، ’’رقیہ میں تمہیں گھر پہنچانے آیا ہوں چلو میرے ساتھ موٹر میں۔‘‘
وہ ہچکچائی مگر ساتھ ہولی۔
موٹر بڑھاتے ہوئے نعیم صاحب بولے، ’’آج کیا تھا جو تمہیں یاد ہماری آئی؟‘‘
رقیہ خاموش رہی۔
’’آج تم میرے پاس آئیں تھیں مگر میرے گھر میں آنے کی ہمت نہ پڑی۔ میں نے دیکھا کہ کئی بار تمہاری رکشہ میرے گھر کے سامنے سے گزری میں نے تیس برس مجسٹریٹی کی ہے۔ ہزاروں قسم کے لوگ دیکھے ہیں۔ میں انتظار کرتا رہا کہ تم شاید اتر کر آؤ۔ اسی میں فہمیدہ کے پاس پہنچنے میں دیر ہو گئی۔ اب تمہیں کیا کہنا ہے بتاؤ۔‘‘
’’آپ نے یہ سب فرض کر لیا ہے۔ سب غلط۔ سات مہینے ہوئے ہیں آپ سے پر جھاڑ کر الگ ہوگئی تھی۔ مجھے آپ سے ملنے کا کوئی شوق نہیں آپ ہی میرے پیچھے دوڑے آئے۔‘‘
’’خیر یہ سب جانے دو۔ تم کو دیکھ کر مجھے محسوس ہوا تھا کہ وہ صورت جو میرے ذہن میں تیس برس سے تھی سامنے آ گئی جب تم سے باربار ملا تو یہ بھی محسوس ہوتا رہا کہ تم اس کے مقابلہ میں بالکل بےجان اور بےحس ہو۔ وہ کھلی ہوئی تھی تم مرجھائی ہوئی۔ صورت تو ضرور ہے اسی کی سی مگر اس کا بھوت اور پھر جب تم نے انکار کر دیا تو میرا دھیان اس سے مشابہت سے زیادہ تمہارے سوکھے پن تمہاری بےحسی پر جانے لگا۔ فہمیدہ کے ماں باپ نہیں ہیں۔ چچا کے یہاں پل رہی ہے۔ رومانہ کی شادی کے بعد سے برابر میری دلجوئی میں لگی ہے۔ اس کے چچا چچی اور چچا زاد بھائی بہن اس سے پیچھا چھڑانا چاہتے ہیں۔ وہ ایم اے پر یویس کر چکی تھی۔ میں بھی کہتا ہوں ایم اے کر لے دو مہینے اور ہیں۔ کسی دن بھی ہم دنوں نکا ح کر لیں گے۔
’’جب یہ سب ہے تو پھر آپ کیوں میرے پیچھے لگنے کو آتے۔۔۔ اور اور میرے گھر کی سڑک تو پیچھے رہ گئی یہ آپ مجھے کہاں لے جا رہے ہیں۔‘‘
’’ابھی میری بات ختم نہیں ہوئی۔ اگر تم کہو تو اپنے گھر چلوں اور بات پوری کرلوں۔‘‘
’’نہیں نہیں آپ مجھے یہیں اتار دیجئے میں گھر چلی جاؤں گی اور اب کبھی میری طرف رخ نہ کیجئےگا۔ فہمیدہ میں مگن رہیے۔‘‘
’’خیر میں تمہیں تمہارے گھر پہنچائے دیتا ہوں۔ بات صرف یہ کہنا ہے کہ میں نے تمہارے رخ میں صاف تبدیلی دیکھی اور مجھے پھر وہی صورت یاد آ گئی۔ جس کا تم ہلکا سا چربہ ہو۔ فہمیدہ کو اتار کر میں گھر جاتا مگر لاشعوری طور پر تمہارے کالج پہنچ گیا۔ آگے کچھ نہیں۔ اب بہت دیر ہوگئی۔ یو ہیو کم ٹو لیٹ۔ ٹولیٹ، ٹولیٹ۔‘‘
نعیم صاحب نے اسے اس کے گھر پر اتارتے وقت کہا، ’’بہت دیر ہو گئی‘‘ اور موٹر لیے ہوئے چلے گئے۔
رقیہ گھر میں داخل ہوئی تو کچھ غصہ کے عالم میں تھی۔ اپنے کمرے میں جاکر کپڑے اتارے نچنت ہوکر والدہ اور والد کے ساتھ چائے پینے آئی۔ بات بات میں وہ نمایاں طور پر گم ہو جاتی۔ ماں نے ماتھے پر ہاتھ رکھ کر دیکھا۔ نبض دیکھی اور کہا، ’’کوئی ایسی بات نہیں ہے۔ آج شاید کام بہت تھا تھک گئی ہو۔‘‘
’’جی ہاں تھک گئی ہوں اب جا کر لیٹوں گی۔‘‘
بہت دیر ہو گئی، بہت دیر ہو گئی۔ آخر وہ کس خواب خرگوش میں تھی؟ نسیمہ نے دھوکے میں رکھا۔ نہیں وہ خود دھوکے میں تھی۔ سعید نے بس ایک دفعہ الگ لے جاکر کہا تھا، ’’تم آج بہت جچ رہی ہو‘‘ آج۔ آج اور وہ اس آج کو دوام سمجھ گئی۔ آٹھ برس تک انتظار۔ خواہ مخواہ وہ آیا تو یہ کہتا ہوا، ’’ارے تمہارے چہرہ پر یہ داغ کیسے ہیں۔‘‘ جیسے وہ کوئی جانور تھی۔ جس کو خریدنے سے انکار کرتے ہوئے وہ کہہ رہا تھا۔ کیا وہ نسیمہ کے پاس جائے اور اس سے پوچھے؟ کیا پوچھے؟ وہ اور بھی ہنسے گی۔ شاید یہ تاڑ کر کہ بھائی سعید پر ریجھی ہیں کبھی اس نے کوئی بات کرلی ہوگی یہ سمجھ گئیں کہ مر رہا ہے۔ ’’ذرا اپنی اوقات میں رہیں، ذرا اپنا منہ آئینہ میں دیکھیں اور اب تو سوکھ کر امچور ہو گئی ہیں۔ کوئی پوچھتا ہی نہیں۔ یہی کہتی ہوگی سب سے اور بھائی کے آنے پر رقیہ کو بلایا پارٹی میں کہ وہ اپنے خوابوں کی تعبیر دیکھ لے۔ اچھا اس نے یہ ٹرک کیا اور اس کا میاں ضمیر اسے کہتا سنا گیا، ’’بالکل معمولی بلکہ معمولی سے بھی گری ہوئی اور بنو اب اس کے آٹھ بچے ہو گئے۔‘‘ کیا کہنے لگی۔ تم نے نعیم صاحب سے انکار کر دیا۔ غضب کیا۔ اب تمہیں کون پوچھےگا۔ اچھا تھا کہ ماں باپ نے ہائی اسکول کے بعد ہی میری شادی کر دی تھی۔ میں نے چار بچے ہونے کے بعد انٹر جوائن کیا۔ تمہارے ساتھ جب ایم اے میں آئی تو چھ بچے ہو چکے تھے۔ اب بوڑھی ہو گئی۔ میرے ساتھ کہ نہ معلوم کتنی بیٹھی ہیں، ’’بہت دیر ہو جائے تو کوئی پوچھتا نہیں۔‘‘، ’’ہاں نعیم صاحب کے سامنے آنے پر بھی بہت دیر ہو چکی تھی۔ وہ قسمت سے ملے تھے۔ آخر ان میں کیا کمی تھی؟ جائیداد، موٹر، ملازم ہر قسم کا آرام، ایسے لوگ جن کو مل جائیں ان کو قسمت والی کہتے ہیں۔ ہاں صرف سن آ گیا ہے۔ ساٹھ کے قریب۔ مگر اس سے کیا ہوتا ہے۔ تاجور کی شادی ساٹھ برس والے سے ہوئی اور وہ اب تک زندہ ہے۔ اب تو دونوں ہم سن معلوم ہوتے ہیں۔ جمیلہ کا میاں اس سے سال بھر چھوٹا تھا۔ مگر دو سال ہی میں مر گیا۔ اب بیوہ بیٹھی ہے ایک لڑکا لیے ہوئے۔ محض وہم ہے سن کے فرق سے کچھ نہیں ہوتا۔ ہاں حیثیت، مال، آرام سب کچھ ہے۔‘‘ فہمیدہ اس سے دس برس چھوٹی ضرور ہوگی۔ مگر اسے نعیم صاحب سے کوئی انکار نہیں۔
اسے تو کوئی برابر کا مل سکتا ہے اگر ذرا انتظار کر لے۔ مگر کیوں انتظار کرے۔ خطرہ مول لے۔ پھر محسوس ہو بڑی دیر ہو گئی۔ مگر اب وہ کیا کرے نعیم صاحب بھی ہاتھ سے نکل گئے، صاف صاف کہہ گئے۔ ٹولیٹ، ٹولیٹ۔ یہی کہے گی کہ مجھے گھریلو زندگی اچھی نہیں لگتی۔ لومڑی کو انگور نہیں ملے تو کھٹے ہیں۔ نو کہنے لگےگی۔ آخر اس کے بابت بات کرنا ہی کیا فرض ہے۔ شادی کی بات ہی نہ کرو۔ کوئی بات کرے تو ٹال دو۔ جب پڑھتی تھی تو اس نے افسانے لکھے تھے۔ اب پھر لکھنے گلے۔ دل بہل جائے گا۔ ہاں کئی ایک ناول لکھے۔ فرزانہ نے اب تک دس ناولیں لکھ ڈالیں۔ وہ بھی یہی کرے۔ پڑھانے میں جی نہیں لگتا۔ ناولوں سے بڑی آمدنی ہوگی۔ موٹر، بنگلہ، سب ہی ہو جائےگا۔ نعیم کے پاس کیا ہے یہی تو ہے اور جب مشہور ہو جائےگی تو بہت سے لڑکے آیا کریں گے۔ کتاب پر تصویر دیکھ کر نہ معلوم کتنے لوگ خط لکھیں گے۔ تصویر میں یہ چہرہ کے داغ بھی نہیں آئیں گے اور اس رخ سے بیٹھ کر تصویر کھنچوائے گی کہ یہ گڑھے نظر نہ آئیں اور ہاں مس خاتون نے اپنے بابت لکھا۔ میں نے پہلا ناول چودہ برس کے سن پر لکھا۔ ایم اے کے بعد لکھا۔ یعنی تیرہ برس کی تھی۔ جب ایم اے پاس کیا۔ خوب چھ برس کے سن میں ہائی اسکول کیا۔ یہ نہ کہو کہ ہائی اسکول کا سرٹیفکیٹ منہ میں تھا جب پیدا ہوئیں مگر یہ سب حساب کون لگاتا ہے۔ وہ بھی مشہور کرا دےگی کہ بیس برس کی ہے جوان جوان لڑکے ٹوٹ ٹوٹ کر گریں گے۔ کوئی نہ کوئی پرپوز ضرور کرےگا۔ چھوٹے سے شادی کر لی۔ لونڈا پھانس لیا۔ کیا ہے؟ شاہدہ نے نہیں کر لیا ہے۔ لوگ تو ہر چیز پر اعتراض کرنے کھڑے ہو جاتے ہیں۔ ہاں مرد کو جب شوق چراتا ہے تو کچھ بھی نہیں دیکھتا۔ بیل کی طرح منہ اٹھائے ہوئے دوڑنے لگتا ہے۔ کوئی دوڑتا آئےگا۔ ضرور آئےگا۔ اب کے جو آئےگا اسے نہ جانے دے گی۔ ضرور پھانس لےگی۔ مگر آئےگا بھی۔ ان جوانوں کا ٹھیکہ نہیں۔ دوڑتے ہیں اور پھر بھاگ لیتے ہیں۔ دیر ہو گئی، کیا سچ مچ دیر ہو گئی۔۔۔؟
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
