سول لائنز کا بھوت بنگلہ

انگریز راج میں فوج اور سیولین رہائشی علاقے علیحدہ علیحدہ بنائے گئے اور سیولین علاقے کو سول لائن کا نام دیا گیا۔ ہر سول لائن اپنے دور کا ایک پوش رہائشی علاقہ ہوتا تھا جہاں اس دور کی اشرافیہ رہتی تھی۔ ان لوگوں میں انگریز افسر،متمول ہندو اور سکھ خاندان اور چند ایک مسلمان کنبے رہائش رکھتے تھے۔ سول لائنز عموماً باقی شہر سے الگ تھلگ لیکن کچہری اور دوسرے ضلعی دفاتر کے نزدیک واقع ہوتی تھی۔ اس آبادی کی گلیاں چوڑی، ہموار اور آمدو رفت کی ہر سہولت لیے ہوئے ہوتی تھیں۔ سول لائنز میں تعمیر کیے گئے گھر اپنے دور میں فنِ تعمیر کا ایک نادر نمونہ ہوتے تھے؛ ان میں مقامی اور برطانوی عمارتی حسن کا خوب صورت امتزاج دیکھنے کو ملتا۔ یہاں کے گھروں کی تعمیر میں جو خیال کارفرما ہوتا وہ ان کا منفرد ہونا تھا۔ ان کے نقشے تیار کرتے وقت اور بعد میں دوران تعمیریہ ذہن میں رکھا جاتا کہ وہ پرانے شہر کی پرانی اور تاریخی عمارتوں سے الگ نظر آئیں اور وقت آنے پر شہر کی تعمیراتی تاریخ ان کے بغیر نا مکمل ہو۔ وہاں رہنے والے بھی خود کو باقی شہر کی آبادی سے مختلف اور الگ سمجھتے۔ گھر سے نکلنے کے بعد سول لائنز کے غیر ملازم رہائشیوں کو ابھی پسینہ تک نا آیا ہوتا کہ وہ ضلع کچہری یا پولیس کے کسی افسر تک پہنچ جاتے۔ ان گھروں میں رہنے والے بچے بھی شہر کے اپنے ہم عمروں سے مکمل طور پر مختلف ہوتے۔ ان کا لباس اور گفتگو برطانوی راج کی توسیع ہوتا۔ ان کی تربیت میں ان کے گھروں کے نیم یورپی ماحول کے علاوہ سینٹ میری سکولوں کا بھی دخل تھا جو ہر سول لائنز کی تہذیب کا حصہ تھے۔ ان سکولوں میں تعلیم حاصل کرنے والے بچے کرکٹ اور ٹینس کھیلتے اور یہاں فٹ بال اور ہاکی کو اتنی اہمیت نہیں دی جاتی تھی حالانکہ یہ کھیل بھی برطانوی ایجاد تھے۔ فٹ بال اور ہاکی میں عوامی رنگ زیادہ واضح تھا اس لیے سینٹ میری کے طالب علموں کو کرکٹ اور ٹینس کھیلنے پر ہی اکسایا جاتا۔ چھوٹی جماعتوں کے لڑکے خاکستری نیکر، سفید قمیص اور گھٹنوں تک سفید جرابیں پہنے ہوتے جب کہ بڑے لڑکے نیکر کے رنگ کی پتلون میں ہوتے۔ سکول کے تمام طالب علموں کے بوٹ کالے ہوتے۔ جب یہ لڑکے سکول کے اندر اپنی کھیلیں کھیل رہے ہوتے تو نزدیک کے کسی سرکاری سکول کے بچے گیٹ سے اندر حیرانی، بےیقینی اورخوف سے دیکھ رہے ہوتے۔ وہ جانتے تھے کہ انھیں کبھی وہ ماحول نہیں ملنا جو سر سبز گھاس پر کھیلنے والے ان کے ہم عمروں کو میسر تھا۔

سول لائنز میں رہنے والے مرد اجلی،چمک دار دھوتی، تنگ یا کھلا پاجامہ یا شلوار پہنے ہوتے۔ ان کے ماتھوں پر تلک یا محراب ہوتے اور یا وہ کرپان لٹکاکے گھروں سے نکلتے۔ ان کی چال میں اعتماد، نظر میں غرور اور لباس سے برتری ٹپکتی تھی، ایسا ہوتا بھی کیوں نا، انگریز سرکار نے انھیں سول لائنز میں گھر تعمیر کر کے رہنے کی اجازت دی ہوئی تھی۔ سیٹھ دھنی رام جس کی آبائی رہائش کسیرہ بازار میں تھی جہاں سردار ہری سنگھ نلوہ کا حویلی نما گھر تھا، نیلم وادی میں لکڑی کا ٹھیکے دار تھا۔ وہ ایک بار کچہری جاتے ہوئے سول لائنز کے پاس سے گزرا اور اسے سول لائنز کی ہیبت کا جادو اپنے سحر میں باندھ گیا۔ اس نے تعمیر کے لیے زمین حاصل کرنے کے لیے کوشش شروع کر دی۔ سول لائنز میں ایک گرجا گھر تھا جہاں ہر اتوار انگریز اور مقامی عیسائی خاندان عبادت کے لیے آتے۔ گرجا گھر سے تھوڑے فاصلے پر ایک انگریز افسر کا بنگلہ تھا۔ بنگلے اور گرجا گھر کے درمیان میں زمین کا ایک خالی ٹکڑا تھا جو ڈی سی نے اسے الاٹ کرنے کی پیش کش کی۔ سیٹھ کو انگریز افسر کا ہمسایہ ہو نا ایک عزت لگا لیکن گرجا گھر کے نزدیک ہونے نے اسے متعدد خدشات کی زد پر رکھ دیا۔ وہ سرکار کی پیش کش کو رد کرنے کا بھی نہیں سوچ سکتا تھا۔ بادل نخواستہ اس نے زمین کا یہ ٹکڑا قبول کر لیا۔ پورے شہر میں یہ بات مشہور ہو گئی کہ وہ انگریز سرکار کا خاص آدمی ہے ورنہ اسے اتنی اہم جگہ کی کبھی پیش کش نا کی جاتی۔

زمین کا وہ ٹکڑا مستطیل شکل کا تھا۔ سیٹھ دھنی رام ہر روز اس ٹکڑے کو دیکھنے آتا اور گھنٹوں کھڑا اسے دیکھتے ہوئے مختلف منصوبے بناتا رہتا۔ وہ یہاں ایسا گھر تعمیر کرنا چاہتا تھا جو اردگرد کے شہروں میں ابھی تک تعمیر نہیں ہوا تھا۔ وہ کئی گرمیاں سرینگر،شملہ اور دارجلینگ میں گزار چکا تھا اور وہاں بنے ہوئے لکڑی کے گھر اس کے لیے ہمیشہ ایک معمار ہے اور اب وہ ایسا گھر بنانا چاہتا تھا جو ہر دیکھنے والے کے لیے معمہ ہو۔ اس نے طے کیا کہ وہ لکڑی کا گھر بنائےگا۔ گھر کی دیواریں، فرش اور چھتیں لکڑی کی ہوں گی اور گھر کے لیے لکڑی نیلم وادی سے آئےگی اور اس لکڑی کو ملک کی بہترین لکڑی ہونا ہوگا۔

وادی نیلم میں سے لکڑی کاٹ کے اس کے گٹھے بنا کے دریائے جہلم میں بہا دیے جاتے۔ شہر جہلم میں دریا کے کنارے سیٹھ دھنی رام کا ایک ذاتی گھاٹ تھا جہاں دریا میں بہہ کے آنے والی لکڑی کو سیٹھ کے کارندے اکٹھی کرتے۔ سیٹھ مہینے میں ایک بار اپنی لکڑی کا جائزہ لینے کے لیے جہلم میں اپنے گودام کا چکر ضرور لگاتا۔ دریا کے کنارے ایک وسیع احاطہ تھا جس کے گرد چار دیواری بنادی گئی تھی اور اس کے اندر چیڑ، دیودار اور ساگوان کے الگ الگ ڈھیر تھے۔ سیٹھ اپنی کسیرہ بازار والی رہائش گاہ سے ایک چھوٹے سے قافلے کی صورت میں نکلتا۔ اس کے ساتھ ایک منشی اور دو خدمت گزار ہوتے۔ ایک منشی وہ ایک دن پہلے نکال چکا ہوتا جو لالہ موسیٰ کی سرائے میں اس کی رات کے قیام کا بندوبست کرتا۔ یہ چھوٹا سا قافلہ دو دن اور ایک رات کا سفر طے کرکے جہلم پہنچتا تو وہاں سیٹھ کی متوقع آمد کی خبر پہلے ہی پہنچ چکی ہوتی۔ سیٹھ منشیوں کے ساتھ بیٹھ کر لکڑی کی قیمت، ملک میں تقسیم اور نئے درخت لگانے کے متعلق سوچ بچار کرتا۔ پھر وہ رنگ کا ایک ڈبہ لے کر لکڑیوں پر مختلف رنگوں کے نشان لگاتا جو اس لکڑی کے معیار کو ظاہر کرتے تھے اور ملازم ان لکڑیوں کو ان پر لگائے گئے نشانوں کے مطابق رکھتے جاتے۔ زمین کا قطعہ ملنے کے بعد سیٹھ کالے رنگ کی لکڑیوں کو بہت احتیاط سے چننے لگا کیوں کہ یہ وہ لکڑی تھی جو اس نے گھر کی تعمیر میں استعمال کرنا تھی۔ منتخب شدہ لکڑی بیل گاڑیوں کے ذریعے گجرانوالا بھیج دی جاتی۔

سول لائنز کے کئی گھروں میں لکڑی کی بالکونیاں تو تھیں لیکن مکمل لکڑی کا گھر ابھی تک نہیں بنایا گیا تھا۔ لکڑی کے گھر کے متعلق شہر میں مختلف افواہیں گردش میں تھیں اور لوگ اپنی اپنی قیا س آرائیوں میں بھی مصروف تھے۔ سیٹھ نے زمین کے ٹکڑے پر ایک آرا لگویا جو سید نگری بازار کے کاریگروں نے بنایا تھا۔ اس آرے کو چلانے کے لیے ایک مضبوط جانور کی ضرورت تھی، سیٹھ نے ملتان سے ایک اونٹ خریدا جو آرے کو چلاتا۔ لکڑی کے تختے جب چیر دیے گئے تو انھیں ایسے جوڑنا تھا کہ ان میں کوئی درز نا ہو۔ سیٹھ نے مقامی کاریگروں سے ایک عرصے تک گفتگو اور تبادلۂ خیال کیا لیکن وہ ان کی ہنر وری سے مطمئن نا ہوا اور اس نے پہاڑوں کا رخ کیا۔ وہ سرینگر سے کاریگروں کا ایک دستہ لے کے آیا جنھوں نے اپنے پیشہ ور تقاضے پورے کروانے کے بعد گھر کی تعمیر پر کام شروع کیا۔ سیٹھ ہر شام کام کا جائزہ لینے کے لیے آتا اور مطمئن اور اپنے دل کے اندر خوش دیر تک وہیں بیٹھا رہتا۔ وہاں بیٹھنا اسے سکون کے علاوہ کامیابی کا بھی احساس دلاتا۔ وہاں سے گزرنے والے گھر پر کام کرتے کاریگروں اور سیٹھ کو حیرت اور ایک طرح کی بے یقینی سے دیکھتے۔ لکڑی کا گھر ایک کہانی یا خواب ضرور تھا لیکن کسی نے اسے حقیقت کے طور پر نہیں دیکھا تھا۔

دو سال گھر پر کام ہوتا رہا۔ اونٹ آرے کو چلاتا تو ہر گزرنے والا سیٹھ کے تعقل کی داد دیتا اور گھر کی لکڑی کی دیواروں کا کھڑا ہونا ان کے لیے ایک گڑیا گھر کی تعمیر تھی۔ جب بھی پھٹوں کو جوڑ کر دیواریں بلند کی جاتیں یا کمروں کے درمیان میں دیواروں کو کھڑا کیا جاتا تو سیٹھ ہر دیوار میں سوراخ یا درز دیکھتا اور اگر کوئی پھٹہ صحیح طرح سے جوڑا نا گیا ہوتا تو سیٹھ اسے اکھڑوا کر پھینک دیتا۔ سیٹھ ایسے پھٹوں کو استعمال میں نہیں لاتا تھا اور اس رد کیے پھٹے کو لوگ لے جاتے۔ لوگوں کے گھروں میں ان پھٹوں سے کئی الماریاں یا کھڑکیاں بنائی گئیں۔ جہلم سے لکڑی لیے بیل اور اونٹ گاڑیاں روز آتیں اورآرے والا اونٹ بارہ گھنٹے آرا چلاتا اور بارہ گھنٹے اسے آرام دیا جاتا اور اچھی خوراک کھلائی جاتی۔ سیٹھ کو اونٹ کے آرام اور خوراک کی ہر وقت فکر رہتی اور وہ دن میں دو بار اسے دیکھنے ضرور جاتا۔

گھر کی تعمیر کے بعد اسے سجانے کا مرحلہ سیٹھ کے لیے پیچیدہ نا ہونے کے باوجود اتنا آسان بھی نہیں تھا۔ وہ گھر کو یورپی طریقے سے سجانا چاہتا تھا۔ کسیرہ بازار میں اس کا آبائی گھر پرانے وقتوں کی یاد میں تھا اور اس کی سوچ ایک قدم آگے تھی۔ اس نے کئی شہروں کا دورہ کیا۔ وہ سیالکوٹ گیا جہاں اس نے جموں سے آنے والے تاجروں سے ملاقات کی، جہلم میں جا کے سرینگر سے آنے والوں سے ملاقات کی، ملتان گیا اور ڈیرہ غازی خان گیا جہاں ایرانی تاجروں سے گفت و شنید ہوئی اور لاہور تو تہذیب کا گہوارہ تھا ہی۔ اس نے ایرانی قالین خریدے جن پر بادشاہ ہرنوں کا شکار کھیل رہے تھے یا وہ ہاتھیوں پر بیٹھے کسی بازار میں سے گزر رہے تھے یا پھر جہاں گیر کی طرح ہاتھی پر بیٹھے ہوئے حملہ کرنے والے شیر کا مقابلہ کر رہے تھے اور یا پھر کسی باغ میں بیٹھے ملکہ یا محبوبہ کے ہاتھ سے شراب پی رہے ہوتے۔ کچھ قالین زمین پر بچھائے جانے تھے اور کچھ کو دیواروں پر لٹکایا جانا تھا۔ خواب گاہوں کے لیے ایسی مسہریوں کا انتخاب کیا گیا جو سیٹھ نے بھی پہلے نہیں دیکھی تھیں۔ سیٹھ نے لاہور میں ایک مرتبہ کسی سرکاری تقریب میں حصہ لیا جہاں کھانے کا بندوبست بھی کیا گیا تھا۔ کھانا ایک اتنی لمبی میز پر لگایا گیا تھا جس کی لمبائی سیٹھ کی سوچ سے بھی لمبی تھی۔ اسے پہلے تو یقین نا آیا کہ میز اتنی لمبی بھی ہو سکتی ہے؛ اس کا خیال تھا کئی میزوں کو جوڑا گیا تھا۔ اس نے مختلف زاویوں سے میز کو دیکھا لیکن کہیں سے بھی میزاسے جوڑی گئی محسوس نا ہوئی۔ اس دن اس کے دل میں ایک بڑی میز کا اپنے گھر میں ہونا ضروری لگا۔ اس نے اسی دن اپنے گھر میں ایسی میز رکھنے کا فیصلہ کر لیا۔

سیٹھ جہلم اور ملتان کئی مرتبہ گیا۔ جہلم اس کے کاروبار کا مرکز تو تھا ہی وہاں سے سرینگر سے قافلے بھی آتے تھے۔ ان قافلوں میں تاجر اور اشرافیہ ہوتی تھی۔ سیٹھ بھی ان کے لیے اجنبی نہیں تھا۔ سیٹھ ایک سال چھوڑ کر سرینگر جاتا رہا تھا اور اس کی ہر اہم تاجر اور شخصیت سے شناسائی تھی۔ ان میں سے چند کی دربار تک رسائی تھی اور سیٹھ ان سے حاکموں کے ملاقات کے کمروں کے بارے میں پوچھتا رہتا۔ اسے سرینگر کی زندگی میں ہمیشہ ایک جداگانہ رنگ نظر آیا جو اسے اپنے مختلف شہروں کے سفروں کے دوران میں کہیں اور نظر نہیں آیا تھا۔ سرینگر جھیلوں، باغوں، پارکوں اور سڑکوں کا شہر تھا۔ غالیچا بافی اور فرنیچر شہر کی بڑی اور اہم صنعتیں تھیں۔ سیٹھ یہاں گرمیوں میں کئی بار آ چکا تھا اور وہاں اس کے حلقۂ شناسائی نے کافی وسعت حاصل کر لی تھی۔ لاہور میں دیکھی ہوئی کھانے کی میز نے اسے ایک ایسے بھنور میں ڈال دیا جس میں سے وہ نکلنا نہیں چاہتا تھا۔ وہ فرنیچر بنانے والے کارخانوں میں جاتا جہاں کاریگروں کی بڑی تعداد مصروف کار ہوتی اور ایسی کھانے کی میز کے متعلق بات کرتا جو وہاں پہلے بنائی نہیں گئی تھی لیکن بتدریج بنانے والے سیٹھ کے خواب کو سنجیدگی سے دیکھنے لگے۔ میز بنانا اتنا بڑا مسئلہ نہیں تھا جتنا کہ اسے سلامت حالت میں گجرانوالا تک پہچانا۔ وہ باغوں میں گھومتا اور پارکوں کے چکر لگاتا۔ وہاں گھومتے، جاننے والوں سے تبادلۂ خیال کرتے، کاریگروں سے ذاتی ملاقاتوں میں ان کی آرا کو سنتے ہوئے وہ اس نتیجے پر پہنچا کہ میز کو جہلم میں ہی بنایا جانا چاہیے لیکن وہاں کاریگر اور مناسب قسم کی لکڑی دستیاب نہیں تھی۔ اس نے کاریگروں کا ایسا گروہ تیار کیا جو جہلم جا کر میز بنانے پر رضامند تھا؛ وہ صرف اپنے ہنر کو دور دراز کے علاقوں تک پہچانا چاہتے تھے۔ ان کا تقاضا تھا کہ سیٹھ ساگوان کی ایسی لکڑی مہیا کرے جس کا رنگ سیاہ ہو، اتنا سیاہ کہ اسے رنگ نا کرنا پڑے۔ اس نے لکڑی کے انتخاب کے لیے اپنے معاونت کے لیے جہلم میں کام کرنے والے تین ایسے افراد کا انتخاب کیا جو پچھلی تین نسلوں سے اس کے خاندان کے ساتھ وابستہ تھے اور انھیں لکڑی کی مکمل پہچان تھی۔

ملتان ایک اہم مواصلاتی شہر تھا۔ وہاں ایران، سندھ، بلوچستان اور بالائی پنجاب سے لوگ کاروبار، سفر، تعلیم اور جاسوسی کے لیے آتے۔ سیٹھ کی ملتان میں ایک چھوٹی سی لیکن نہایت خوب صورت رہائش تھی۔ وہ اپنی گھر کی زیبائش کے لیے مقامی مصوری والے مٹی کے مختلف اقسام کے سجاوٹی گلدان اور برتن خریدتا، ایران سے آنے والے تاجروں سے ملاقاتوں میں اپنے گھر کو سجانے پر تبادلۂ خیال کرتا اور مقامی تاجروں کے ساتھ اپنی لکڑی کے سودے کرتا۔ اس کے یہ دورے چند دنوں کے ہوتے اور وہ اپنے گھر میں ایک رات گانے کی محفل بھی سجاتا۔ ملتان کا بازارِ حسن وہاں کی گانے والیوں کی آواز اور ان کے فن کی وجہ سے جانا جاتا تھا اور لوگ دادِعیش دینے دور دور سے آتے تھے۔ اس کی اپنے گھر میں برپا ہونے والی محفلوں میں ایک بار کجن بائی بھی آئی اور سیٹھ نے اسے اپنے گھر کی افتتاحی تقریب میں بلانے کا فیصلہ کر لیا۔ سیٹھ کی تجویز پر اس نے اسے ایک ادا سے دیکھا، دیکھتے ہوئے مسکرائی اور مسکراتے ہوئے اسے دیکھا۔

’’مجھے بلانا اتنا آسان نہیں!‘‘ کجن بائی کی آواز میں اس کی مسکراہٹ کا عکس نہیں تھا۔

’’اس میں مشکل کیا ہے؟‘‘ سیٹھ نے انجان بن کر معصومیت سے پوچھا۔

کجن بائی سیٹھ کی معصومیت کے اندر چھپی مکاری کو سمجھتے ہوئے قہقہ لگا کے ہنسی ۔ ’’سیکھے ہوئے ہیں آپ!‘‘ اس نے سنجیدگی سے کہا۔ ’’آپ کا شہر کچھ فاصلے پر ہے۔ آپ کو میرے لوگوں سے اجازت لینا ہوگی جس کے لیے کافی محنت کی ضرورت ہے۔ ‘‘ وہ رکی، ’’لاہور تک تو ٹھیک ہے۔ میں وہاں چند ایک بار جا بھی چکی ہوں اور بس۔ کسی چھوٹے شہر میں نہیں گئی ابھی تک۔ ‘‘ اس نے ایک ادا سے کان کے اوپر آئی لٹ کو درست کیا، ’’اور وہ جانے بھی نا دیں شاید۔ ۔ ۔ بشرطیکہ۔ ۔ ۔ ‘‘ وہ ایک معنی خیز انداز میں خاموش ہو گئی اور اس نے سیٹھ کی آنکھوں میں دیکھا۔ سیٹھ کاروبار کا ماہر اور سودے کرنے میں استاد کا درجہ رکھتا تھا۔ وہ کسی جنس کی قیمت کم کرنے کے لیے وہی جنس اپنے گوداموں میں سے سستے داموں پر بیچنا شروع کر دیتا تھا، اس نے اسی انداز سے کجن بائی کی طرف دیکھا۔ کجن بائی ایسے موقعوں پر لوگوں کی آنکھوں کے جھک جانے کی دیکھنے کی عادی تھی لیکن سیٹھ کی نظر کی شدت اسے خوف زدہ کر گئی۔ یہ معصوم سی مسکراہٹ اور شرمیلی قسم کی گفتگو کرنے والا آدمی اس پر لرزہ طاری کر گیا۔ کجن بائی نے اپنی ذات کے اندر گم ہو کر اپنے تاثرات چھپانے کی کوشش کی۔

’’میں جب کہوں تو تم میرے شہر میں میرے گھرکی افتتاحی تقریب میں آؤگی۔ ‘‘ سیٹھ مسکرا رہا تھا لیکن اس کی آواز میں ٹھنڈے لوہے کی سختی تھی۔ اس نے اپنے چوغے کی دائیں ہاتھ والی جیب میں ہاتھ ڈال کر سب سے ہلکی تھیلی تھامی۔ اس نے کجن بائی کا رویہ اور خود اعتمادی دیکھتے ہوئے بازار میں اس کی قیمت گرانے کا فیصلہ کیا اور وہ تھیلی اسے تھماتے ہوئے لاپرواہی سے کہا:

’’یہ پیشگی ہے۔ میں جب مناسب سمجھوں، پیغام بھیج کے منگوا لوں گا۔ ‘‘

اگلی شام سیٹھ نے کجن بائی کے بجائے ایک ایسی مغنیہ کو بلایا جسے کسی سرپرست کی تلاش تھی لیکن اس کے اپنے دل میں کجن بائی ہی آباد تھی!

یہ بات جنگل کی آگ کی طرح سارے شہر میں پھیل گئی اور سیٹھ کے گھر آنے والی مغنیہ گانے والی محفلوں میں جانے لگی۔ کجن بائی کے لیے ناگزیر ہو گیا کہ وہ سیٹھ دھنی رام کو فتح کرے۔ لیکن کیسے؟ سیٹھ ملتان کی مصوری والے ظروف، ایران سے آنے والی حافظ کی شراب کی صراحی اور پیالوں کی مختلف سائزوں کی تصویریں اور قالین خرید کر گجرنوالا کے لیے روانہ ہو چکا تھا۔

کجن بائی نے سیٹھ کی موت کی دعا کی لیکن وہ خیریت سے اپنے شہر پہنچ گیا۔ گھر اس کی آمد کے انتظار میں تھا۔ جہلم سے میز تیار ہو کر آ گئی تھی جسے بڑے کمرے میں رکھ دیا گیا تھا۔ میز کی لکڑی میں ایسی چمک تھی کہ سیٹھ شام تک حیرت میں گم اسے دیکھتا رہا۔ اسے یقین نہیں آ رہا تھا کہ میز کی سطح پر کسی قسم کا مصنوعی رنگ نہیں لگایا گیا تھا۔ سیٹھ میز کو دیکھے جا رہا تھا اور سرینگر سے آئے ہوئے کاریگروں کا گروہ سیٹھ کو دیکھتا تھا۔ ان کے چہروں سے خوشی،اطمینان اور فخر ٹپک رہے تھے۔ سیٹھ نے پہلے کمرے کے تمام لمپ روشن کیے اور میز کو دیکھا؛ اسے میز کی چمک میں اضافہ ہوا لگا اور پھر اس نے صرف ایک لمپ جلنے دی تو میز کی چمک مزید بڑھ گئی تھی۔ وہ تمام رات روشنی اور اندھیرے میں میز کو دیکھتے ہوئے ایک خوشی میں ڈوبااپنی محنت کو سراہتا رہا۔ اس نے رات کے آخری پہر میں سرینگر سے آئے ہوئے کاریگروں کو انعام و اکرام دے کے ان کی واپسی کا بندوبست کیا۔

اس نے علی الصباح اپنے گھر کا جائزہ لیا۔ یہ گھر ایک بڑے سارے مربع شکل کے کمرے اور دو خواب گاہوں پر مشتمل تھا۔ ایک خواب گاہ اس کی اپنی اور دوسری کسی بھی مہمان کی ہو سکتی تھی اور وہ یہ بھی جانتا تھا کہ کجن بائی وہاں ٹھہرنے والی پہلی مہمان ہوگی۔ باورچی خانہ اور ملازموں کے لیے رہائش ذرا ہٹ کر تعمیر کی گئی تھی۔ باورچی خانہ کے ساتھ جڑا ہوا ایک کھلا کمرہ تھا جہاں پکانے کے لیے درکار سامان رکھا ہوتا۔ باورچی خانہ تک چھتا ہوا راستہ تھا جو بارش سے بچاؤ تھا۔ ہر ملازم کے لیے ایک کمرہ تھا اور ذرا ہٹ کر ان کے لیے غسل خانے بنائے گئے تھے۔ سیٹھ ہر ملازم کو صبح تازہ دم اور اچھے لباس میں دیکھنا چاہتا تھا؛ وہ اکثر ان کا صبح کے وقت معائنہ کرتا۔

سیٹھ دھنی رام نے گھر کو جتنا خوب صورت بنانا ممکن تھا، بنا کر اس میں افتتاحی دعوت کا سوچنا شروع کر دیا۔ اس نے مہمانوں کی فہرست ترتیب دی۔ اس میں مقامی افسر، سول لائنز کے معتبرین، پرانے شہر سے کچھ لوگ اور دوسرے چند شہروں سے اس کے ذاتی دوست شامل تھے۔ اس نے شراب، کھانا، رہائش اور موسیقی کا بندوبست کرنا تھا۔ انگریز مہمانوں کے لیے اس نے ضلعی انتظامیہ سے رابطہ کیا کہ ان کے ٹھہرنے کا بندوبست کسی ڈاک بنگلے میں کیا جائے جس کی انھوں نے حامی بھر لی۔ دوسرے شہروں کے مہمانوں کو ٹھہرانے کا بندوبست اس نے کسیرہ بازار میں اپنی حویلی میں کیا۔ وہ جانتا تھا کہ مہمانوں کی اکثریت کی کوشش ہوگی کہ رات کو گھر پہنچا جائے لیکن وہ رات کی افتتاحی تقریب کو یادگار بنانا چاہتا تھا۔ اس نے ولندیزی، ہسپانوی، پرتگالی اور سکاٹ لینڈ کی شراب کا بندوبست کیا ہوا تھا جو اس کے مہمانوں کے لیے کسی طرح کم نہیں ہونا تھی اور موسیقی کے لیے وہ کجن بائی کو لانا چاہتا تھا لیکن اپنی قیمت پر۔ اس نے اپنے تین منشی ملتان بھیجے جنھوں نے وہاں مختلف مغنیاؤں سے رابطے شروع کر دیے اور کجن بائی کو مکمل طور پر نظرانداز کیا گیا جو اس کے فن اور شخصیت کے منہ پر طمانچہ تھا۔ سیٹھ نے اپنی جنس سستے داموں بیچنا شروع کر دی تھی۔ ملتان سے ایک ایلچی روزانہ اسے خبر پہنچاتا اور ایک دن اسے پیغام آیا کہ کجن بائی کسی بھی دام پر آنے کو تیار تھی۔ سیٹھ نے اسے اور بھی کم کی پیش کش کروائی جو مان لی گئی اور ایک دن وہ منشیوں کے ہمراہ سیٹھ کے گھر پہنچ گئی۔ سیٹھ ابھی اپنی کسیرہ بازار والی حویلی میں ہی رہائش پذیر تھا اور کجن بائی نئے گھر میں ٹھہرنے والی پہلی مہمان تھی۔

کھانا پکانے کے لیے باورچیوں کا انتخاب ایک مشکل مرحلہ تھا۔ چھوٹا گوشت پکانے کے لیے الگ،بڑے گوشت کے لیے پرانے شہر میں سے سب سے پرانے پکانے والے خاندان کو چنا اور اسی طرح دال سبزی کے کاریگر بھی ڈھونڈے۔ ان تمام لوگوں سے سیٹھ نے خود طویل ملاقاتیں کیں۔ ان ملاقاتوں کے نتیجے میں لیہہ سے بکرے، چولستان سے ایک سال کی عمر کے بچھڑے، جھنگ سے دالیں اور قلعہ دیدار سنگھ کے گردو نواع سے سبزیاں منگوانے کا طے ہوا۔

سردیوں کے آغاز میں گھر میں تقریب منعقد کرنے کا طے کرکے سیٹھ نے دو کاتب منگوائے اور انھیں دعوتی خط بنانے پر معمور کردیا۔ ہر مہمان کے لیے عبارت مختلف اور ذاتی تعلق کو مس کرتے ہوئے ہونا تھی۔ اس نے ہر خط غور سے خود پڑھا، اس میں ضروری درستی کی اور پھر خصوصی ہرکارے کے ہاتھ بھیجا۔

کجن بائی جب آئی تو سیٹھ دھنی رام نے اسے تحائف سے مالا مال کر دیا۔ ہر روز ایک منشی اس کے ساتھ کر دیا جاتا جو اسے صرافوں، بزازوں، کشیدہ کاروں اور دوسرے ہنروروں کے پاس لے جاتا جہاں وہ دل کھول کے خریداری کرتی اور شام کو بن سنور کے سیٹھ کے انتظار میں بیٹھ جاتی لیکن وہ اس کی غیرحاضری میں گھر کا چکر لگا کر اس دن کی ہدایات دے جاتا؛اس نے ہر روز اتنا کمانا ہوتا تھا جتنا کجن بائی کو خرچ کرنے کی اجازت تھی۔ سیٹھ اپنے خراجات کو کبھی اپنی بچت سے زیادہ نہیں ہونے دیتا تھا۔ یہ دعوت بھی ایک کاروبار تھا جو اس کے لیے گھر کی قیمت کو پورا کرنے کا سبب بننا تھا۔

یہ واحد گھر تھا جس کے گرد چار دیواری نہیں تھی، یہ ایسے ہی تھا جیسے راستے پر کوئی لیٹ جائے۔ گھر کے سامنے والے حصے پر ایک ولندیزی شیشہ لگایا گیا تھا جو رات کو اندر کا نظارہ باہر کر دیتا لیکن سیٹھ کا اس چھوٹے سے شہر میں اتنا دبدبہ تھا کہ سامنے والے راستے پر گزرنے والے اندر دیکھنے کی جسارت نہیں کر سکتے تھے۔ سول لائنز کے رہائشیوں اور وہاں سے پرانے شہر کو جانے والوں کو اس نئے گھر سے اپنائیت میں ڈوبا ہوا ایک حسد تھا، وہ وہاں رُک کر شیشے کے اندر جگمگاتی روشنیوں میں سے گھر کی ایک جھلک دیکھنا چاہتے تو تھے لیکن انھیں سیٹھ کی ذاتی زندگی میں ساجھے داری دخل در معقولات لگتا۔ اس گھر کے اندر شام ہوتے ہی روشنیاں ہو جاتیں لیکن کوئی ان کی طرف توجہ نا دیتا۔

ابھی دعوت میں چند دن تھے اور ایک دِن کجن بائی نے منشی کے ساتھ جا کرخریداری کرنے کے بجائے گھر میں ہی دن گزارنے کا فیصلہ کیا ہوا تھا کہ سیٹھ دھنی رام اپنے معمول کے مطابق وہاں آ گیا اور بائی کو وہاں موجود دیکھ کر حیران ہونے کے ساتھ خوش بھی ہوا۔ دونوں سامنے بیٹھے باتوں میں مشغول ہو گئے۔ سیٹھ ایک سفاک کاروباری تھا اس لیے اسے گفتگو کا ڈھنگ آتا تھا۔ اس کی باتوں میں ایک کشش اور ایسی علمیت ہوتی تھی کہ سننے والا اس کی آواز کے بہاؤ، لفظوں کی گہرائی اور جسم کی زبان میں ایسے گم ہوتا کہ وقت اپنی اہمیت کھو بیٹھتا۔ کجن بائی کے ساتھ بھی یہی ہوا۔ وہ سیٹھ کو شکست دینے یہاں آئی تھی اور اسے لگا کہ شروع ہونے سے پہلے ہی وہ بازی ہارنا شروع ہو گئی ہے۔ وہ ایک پیشہ ور محبت کرنے والی تھی، اسے سیٹھ کی آنکھوں میں ایک اداسی، تنہائی اور لاچاری کا سایہ سا محسوس ہوا جو اسے اپنے اندر بھی محسوس ہوتا۔ وہ جان گئی کہ سیٹھ اس کی طرف ملتفت ہے، اسے خوشی ہوئی اور کسی حد تک اداسی بھی۔ اس نے سوچا: کاش وہ یہیں رہ جائے!

کجن بائی نے خریداری کے لیے جانا ختم کردیا اور وہ دعوت کے لیے گھر میں ہونے والے کاموں کی نگرانی میں مصروف ہو گئی۔ شروع میں سیٹھ کو یہ کسی حد تک نامناسب لگا لیکن پھر اس نے یہ قبول کر لیا اور وہ تمام ہدایات بائی کو ہی دینے لگا جو ہر کام نہایت مستعدی اور نفاست سے مکمل کرتی۔ بائی کے کہنے پر کمرے کو پھولوں سے بھر دیا گیا؛ ہر جگہ جہاں کچھ نہیں ہونا تھا وہاں پھول تھے۔ سردیوں کا موسم تھا اور اسی مناسبت سے بائی نے سیٹھ کو مشورہ دیا کہ برفانی علاقوں سے پرندوں کی ہجرت شروع ہو گئی ہے اس لیے وہ کھانے میں انھیں بھی شامل کرے۔ سیٹھ نے ایک مختصر سی تعریفی نظر بائی پر ڈالی اور ایک منشی کو شکاریوں کو بلانے کا حکم دیا؛ بائی نے مسکراتے ہوئے مچھلی منگوانے کا بھی کہا۔ نارووال دریا ئے راوی کے کنارے آباد ایک قصبہ تھا۔ راوی، ناروال کے قریب سے اپنے رخ میں تھوڑی سی تبدیلی لاتا تھا ۔ جہاں دریا کا رُخ تبدیل ہوتا تھا وہاں گہرائی بڑھ گئی تھی اور اس علاقے میں پائے جانے والی مچھلی کا ذائقہ دور دور تک مشہور تھا۔ سیٹھ نے وہاں سے مچھلی لانے کے لیے حکم دیا۔

دعوت والی رات بائی نے اپنے لیے جو کونا منتخب کیا وہ مکمل اندھیرے میں تھا۔ میز پر تھالوں میں بھنا ہوا بکرا، بچھڑا، مرغابیاں، مچھلی اور تیتر رکھے ہوئے تھے۔ کئی قسم کے سالن، سبزیاں اور دالیں ڈونگوں میں تھیں اور خادم شراب کے گلاس تھالوں پر رکھے گھوم پھر رہے تھے۔ مہمان اسی طرح آ رہے تھے جس ترتیب سے انھیں دعوت دی گئی تھی۔ ایک چوب دار مہمان کی آمد کو اعلان کرتا، سیٹھ دروازے تک جا کے اس کا استقبال کرکے اسے دیگر مہمانوں کے ساتھ ملاتا۔ یہ سلسلہ کافی دیر چلتا رہا اور پھر ایک ایسا مہمان آیا جسے بلایا نہیں گیا تھا۔ وہ ڈنر جیکٹ اور بلیو پٹرول پہنے ہوئے تھا اور اس کے بوٹوں میں اندر کی طرف مہمیز (spur ) لگے ہوئے تھے جس وجہ سے وہ ایسے ہی چل رہا تھا جیسے کہ گھوڑے پر سوار ہو۔ اس کا قد دراز، نظر اور مسکراہٹ میں مکاری تھی جو سیٹھ کے لیے نئی چیز نہیں تھی، اس کا کاروباری معاملات میں اکثر انگریزوں سے واسطہ رہتا اوراسے یہ مکاری ہر چہرے میں نظر آتی۔

اس آدمی کی آمد کا اعلان نہیں کیا گیا۔ جب وہ آدمی آیا تو ڈپٹی کمشنر آ چکا تھا اور دعوت پورے جوبن پر تھی، مہمان اپنی پسند کی شراب سے لطف اندوز ہو رہے تھے اور وہاں ایک بےفکری کا ماحول تھا۔ کوئی نہیں جانتا تھا کہ کجن بائی ایک کونے میں بیٹھی مناسب وقت کے انتظار میں تھی کہ مہمانوں کو چونکا سکے! وہ آدمی ایسے آگے بڑھا جیسے وہ ایک دشوار گزار راستے میں گھوڑے کو سنبھال رہا ہو۔ سیٹھ کو چوب دار سرگوشی میں مہمان کی آمد کی اطلاع دے چکا تھا۔ سیٹھ کسی حد تک ایک الجھاؤ، ناپسندیدگی میں ڈوبا، مہمان کو خوش آمدید کہنے کے لیے بڑھا۔

’’میرا نام ڈیوڈ ولسن ہے۔ ‘‘ اس نے بھاری سے لہجے میں کہا۔ اس کی اردو کافی صاف تھی لیکن اتنی بھی نہیں کہ ڈیوڈ ہندوستانی لگتا۔ ’’ میں شرمندہ ہوں کہ دعوت کے بغیر آ گیا لیکن مجھے یقین ہے کہ آپ مجھے باہر نہیں نکالیں گے۔ ‘‘سیٹھ کو اس کی معذرت میں ایک دھمکی کا احساس ہوا۔ اس نے تو یہ محفل کسی خاص مقصد کے لیے برپا کی تھی، اسے ڈیوڈ کی دھمکی کی وجہ سمجھ میں نہیں آئی۔ وہ تو اپنے کام سے کام رکھنے والا آدمی تھا، وہ کبھی کسی کے راستے کی رکاوٹ نہیں بنا تھا اور نا ہی کسی کو اس کے راستے کی رکاوٹ بننا پسند تھا۔ وہ جواب میں دھیرے سے مسکرا دیا اور مصافحہ کرتے ہوئے، ایک مصنوعی سی شرماہٹ میں بولا، ’’میرے بھاگ کہ آپ جیسے لوگ بن بلائے مجھے عزت دینے آئے۔ ‘‘ اور ساتھ ہی سیٹھ نے اسے ہاتھ کے اشارے کے ساتھ دوسرے مہمانوں میں گھل مل جانے کا اشارہ کیا۔

مہمان زیادہ نہیں تھے لیکن جو بھی تھے اس وقت کے اہم لوگ تھے۔ شراب، کھانا، قہقہے، غیراہم قصے اور بےفکری کا دور دورہ تھا اور اسی بے خیالی میں کسی نے بائی والے کونے کی طرف کوئی توجہ نہیں دی کہ کب وہ ایک اندھیرے سے روشنی میں تبدیل ہو گیا تھا تاوقتیکہ بائی نے تان پورے کے تاروں کو چھیڑا اور سب نے حیرانی کے ساتھ چونک کر اس کی طرف دیکھا اور اس کے حسن کی کشش انھیں ایک سکتے کی کیفیت میں لے گئی۔ کمرے میں ایک خاموشی تھی، اتنی خاموشی کہ ہرکسی کے سانس کی آواز تک بھی سنی جا سکتی تھی۔ وہ سب ہلنے سے بھی خائف تھے کہ مبادا کجن بائی کا تخلیق کیا ہوا سحر ٹوٹ جائے۔ کجن بائی مہمانوں کے تاثر اور ردعمل سے جان گئی کہ اس نے صحیح وقت پر اپنی موجودگی کی اطلاع دی ہے اور وہ اس تاثر کو زائل نہیں کرنا چاہتی تھی۔ وہ جانتی تھی کہ کسی محفل کی کامیابی پہلی سر کے صحیح وقت کے انتخاب پر ہے؛ وہ اس وقت کو اپنی گرفت میں لے چکی تھی۔ اب اس نے اپنی آواز سے سب کو اپنے سحر میں گرفتار کرنا تھا۔ اس نے پھر تان پورے کے تار سہلائے۔ اس کے طبلہ نواز اور ہارمونیم بجانے والے نے ایک دوسرے کی طرف دیکھا اور ہارمونیم بجانے والے نے بھیرویں کے سروں کو چھیڑا؛ ساتھ ہی طبلچی نے اپنے طبلے کے سر کو باجے کے سر کے ساتھ ملایا۔ اسی وقت بائی نے بھیرویں، جو کہ کومل سروں کا راگ ہے، کا، سارے گاماپادھاپاماگارے سامیں الاپ لیا اور اپنی آواز کچھ دیر وہیں رکھی اور پھر آواز کا ٹکاؤ اوپر والے سا پر رکھا اور ساتھ ہی طبلے والے کو اشارہ کرتے ہوئے استھائی کے بول شروع کیے تو طبلہ نوازنے ان بولوں کے ساتھ دادراتال رکھی اور یہ بول مد ستک سے ہوتے ہوئے تار سبتک کے کومل ریکھب تک جا رہے تھے۔ دونوں نکھاد، رکھب اور گندھار کو آمیز کرتے ہوئے مصر بھیرویں کی شکل دی جو ایک صحرائی رنگ ہے۔ بائی کا سا اتنا بلند تھا کہ آواز باہر بھی سنی جا سکتی تھی۔ اس وقت ایک اونٹ گاڑی اور گھوڑا گاڑی سیٹھ کے گھر کے سامنے سے گزر رہی تھیں۔ بائی کی آواز اس سرد رات کو سامنے والے راستے پر جیسے رک گئی تھی۔ اونٹ اس آواز کے کان میں پڑتے ہی مستی میں بلبلانے لگے اور گھوڑے نے ہنہنانا شروع کر دیا۔ گاڑی بان پریشانی کے عالم میں اپنے جانوروں کو کوستے ہوئے انھیں چلتے رہنے کو سمجھا رہے تھے۔ پیدل چلنے والے ایک لمحے کے لیے رک کر گھر کی طرف دیکھتے، بھیرویں کے صحرائی رنگ سے لطف اندوز ہوتے اور آگے چل پڑتے۔

مہمان اب بائی کے رحم و کرم پر تھے۔ وہاں انگریز اور ہندوستانی راگ کو نا سمجھتے ہوئے بھی سمجھ رہے تھے۔ سب سامنے کو رینگتے رہے اور بائی کے سامنے قالینوں پر ہی بیٹھتے گئے۔ ڈیوڈ راگ کو سمجھتا تھا اور ہر سم پر وہ ہاتھ سے اشارہ دیتے ہوئے اپنے بول بلند آواز میں گاتا جاتا۔ وہ آگے کو سرکتا ہوا بائی کے بالکل قریب ہو کر بیٹھ گیا، اتنا قریب کہ جب چاہے اسے چھو لے۔ سیٹھ کو یہ اس کے ذاتی معاملات میں دخل اندازی لگا۔

مہمانوں کی ہر بات سرگوشی میں تھی اور ایسے محسوس ہو رہا تھا کہ بائی کی آواز کے زیرو بم میں سے نکلنا نہیں چاہتے!

بائی نے راگ پیش کرکے اپنے دونوں سازندوں کو اختتام کا اشارہ کیا اور مہمان با دل نخواستہ وہاں سے جانے لگے۔ ڈیوڈ جانے والوں میں پہلا آدمی تھا۔

۲

سب لوگ جا چکے تھے؛ چوب دار، خدمت گار اور آب دار بھی۔ سیٹھ کمرے کے وسط میں اپنی ہی سوچوں میں گم بیٹھا ہوا تھا۔ اس کی اس کیفیت کی وجہ سر کا ہلکا سا درد بھی تھا۔ بائی کے سازندے گھر کے عقب میں ملازموں کی رہائش گاہ میں چلے گئے تھے اور وہ اپنے سامنے سرخ شراب کا گلاس، مچھلی کا قتلہ اور مرغابی کا پر رکھے دائیں ہاتھ کے انگوٹھے اور درمیان والی انگلی سے گوشت کے ناخن برابر ٹکرے توڑ توڑکر کھانے میں مصروف تھی۔ سیٹھ اپنے سر کے درد کی وجہ سے بھی پریشان تھا۔ کیا یہ شراب کی معمول کی مقدار سے زیادہ پینے کی وجہ سے تھا؟ ایسی دعوتوں میں وہ ہمیشہ اپنا ذاتی آب دا ر ساتھ لے کر جاتا جو اس کے گلاسوں کو کسی کے ساتھ ملنے نا دیتا لیکن آج وہ بھی شاید ذرا لاپرواہی کا شکار ہو گیا تھا۔ ڈیوڈ کی مہمانوں کے ساتھ بات چیت کے کچھ حصے وہ بھی سن چکا تھا۔ سیٹھ نے ڈیوڈ کی باتوں سے یہ نتیجہ اخذ کیا کہ اس کاکا لکڑی کا کاروبار ہے۔ وہ ہمالیہ کے جنگلوں سے لکڑی دریائے سندھ سے جنوب تک لاتا تھا اور اب وہ دریائے جہلم کے کنارے کے جنگلوں میں سے لکڑی کاٹنے کا ٹھیکہ لینا چاہتا تھا۔ سیٹھ کے خاندان کی تین نسلوں سے نیلم کی وادی میں لکڑی کے کاروبار کی اجارہ داری تھی جو اسے ڈیوڈ کی وجہ سے اچانک خطرے میں محسوس ہوئی۔ وہ اپنی پریشانی اور سر درد کی وجہ سے اپنے خیالوں میں گم تھاکہ اسے بائی کے پاس آکر بیٹھنے کا پتا ہی نا چل سکا۔ وہ ایک ہاتھ میں گلاس اور دوسرے میں مرغابی کا پر لیے ہوئے تھی۔

’’آپ پریشان ہیں؟‘‘ بائی نے مسکراتے ہوئے پوچھا لیکن اس کی آواز میں ہمدردی کی گہرائی تھی۔ وہ سیٹھ کے ساتھ کچھ دن اس طرح گزار چکی تھی جس کا اسے پہلے تجربہ نہیں تھا۔ آدمی اسے ہمیشہ ایک ایسی عورت سمجھتے تھے جو صرف ان کے لیے بنائی گئی تھی لیکن سیٹھ نے اسے ایک الگ قسم کا تاثر دیا۔ اس نے اسے یقین دلایا کہ وہ اس کے اخراجات ضرور اٹھا رہا تھا لیکن اس کا اپنا ایک مقام ہے جس کو وہ قدر کی نگاہ سے دیکھتا تھا۔ اس نے لکڑی کے اس گھر میں خود کو پہلی مرتبہ محفوظ محسوس کیا گو وہ یہاں اکیلے ہی رہ رہی تھی؛ سیٹھ اس کی طرف سے لاتعلق تھا جو رویہ اسے نا پسند بھی تھا۔ سیٹھ کی اس رات سی دعوت اس نے پہلے کبھی نہیں دیکھی تھی لیکن اسے ایسے بیٹھے دیکھ کر پریشانی بھی ہوئی۔ وہ اس کی مدد کرنا چاہتی تھی۔

سیٹھ اس کی آواز سے چونکا جس وجہ سے بائی بھی چونکی اور دونوں مسکرائے۔ بائی کی مسکراہٹ میں اپنائیت اور سیٹھ کی مسکراہٹ میں ایک لاتعلقی اور تھکاوٹ سی تھی۔ ’’آپ نے کچھ کھایا؟‘‘بائی نے ہاتھ میں پکڑا پر اس کی طرف بڑھاتے ہوئے پوچھا۔ سیٹھ نے اس کی طرف حیرانی اور کسی قدر ناپسنددیدگی سے دیکھا اور پھر قہقہ لگا کے ہنس دیا۔ اسے حیرت ہوئی کہ وہ اس طرح کبھی ہنسا ہی نہیں تھا۔ اس کے نزدیک قہقہے بےاحتیاطی تھے اوراس کی زندگی ایک ایسے ضبط میں گزری تھی جہاں اپنی سوچ کو کسی پر ظاہر نہیں ہونے دینا تھا۔ اس نے چہرے پر سنجیدگی اور دانش طاری کرکے کاروباری فیصلے کرنے ہوتے ہیں؛ اسے اپنے قہقہے سے کچھ شرمندگی بھی ہوئی۔

’’میں کھلانے والوں میں تھا۔ ‘‘ اس نے براہ راست جواب نہیں دیا۔ بائی کوئی جواب دیے بغیر اٹھی اور پچھلا درواز ہ کھول کر باہر نکل گئی اور ایک تھالی میں چند بوٹیاں لے کے آ گئی۔ سیٹھ نے بائی کی طرف تعریفی نظر سے دیکھا۔ بائی نے بھی اسے ایسی نظر سے دیکھا جس میں مبارزت تھی۔ سیٹھ نے اس کی نظر کو نظرانداز کرتے ہوئے تھالی تھام لی۔ اس نے ٹھنڈے گوشت کا ٹکڑا منہ میں ڈال کر چبانا شروع کر دیا۔ بائی اسے چباتے ہوئے دیکھتی رہی اور پھر اپنا گلاس اس کی طرف بڑھایا۔

’’گوشت گرم نہیں رہا۔ ‘‘ اس نے دبی زبان سے سیٹھ کو ایسے اطلاع دی کہ گویا اس کا اپنا قصور ہو۔ وہ اسے مزید پریشان نہیں کرنا چاہتی تھی۔ سیٹھ نے بائی کو گلاس والا ہاتھ روکنے کا اشارہ کیا۔ دونوں نے پھر ایک بار ایک دوسرے کو دیکھا۔

’’شاید سر درد اس کی وجہ سے ہو۔ ‘‘

بائی خوش مزاجی سے مسکرائی، اس کی آنکھوں میں چمک تھی اور آنکھوں سے ٹپکتی شرارت کی وجہ سے گال بھی دمک رہے تھے۔ سیٹھ جھکی ہوئی آنکھوں سے اس کے چہرے کے تاثرات دیکھ رہا تھا اور اس کے ذہن میں ایک تربیت یافتہ کاروباری کی جگہ سادہ سا ،بے ضرر قسم کا آدمی جاگ رہا تھا۔ سیٹھ اچانک اس آدمی سے خوف زدہ ہو گیا۔ اس نے بائی کی طرف دیکھا تو وہ شوخی سے مسکرا رہی تھی۔ ’’ اس کی وجہ سے سر میں درد نہیں ہوتا۔ ‘‘یہ کہتے ہوئے اس نے ایک گھونٹ لیا۔

سیٹھ نے اس کے ہاتھ سے گلاس لے کر قالین پر رکھ دیا اور گلاس لیتے ہوئے اس کی انگلیاں بائی کی ہتھیلی سے چھو گئیں۔ اتنے دنوں سے وہ یہاں رہ رہی تھی لیکن وہ اسے چھو نہیں سکا تھا یا اس نے کوشش ہی نہیں کی تھی۔ سیٹھ کو اپنی انگلیاں کبھی جلتے ہوئے اور کبھی جلنے کے لیے بے چین محسوس ہوئیں۔ بائی ،سیٹھ کے اندر آنکھیں کھولتی تبدیلی کو دیکھ رہی تھی؛ وہاں جودونوں اپنے پیشوں میں ماہر تھے، مکمل اناڑی بنتے جا رہے تھے۔ بائی، اس سے پہلے جہاں بھی جاتی تھی، اسے اپنے گاہک سے کوئی دل چسپی نہیں ہوتی تھی گو وہ سب صاحبان حیثیت لوگ ہوتے تھے۔ اس کے رویے میں ایک طرح کی اپنایت کے ساتھ لاتعلقی بھی ہوتی تھی۔ یہ پہلی مرتبہ تھا کہ اسے اپنے لانے والے کے ساتھ ہمدردی تھی؛ وہ اس کی پریشانی دور کرنا چاہتی تھی۔

’’آپ آرام کر لیں!‘‘بائی نے اسے ہمدردی میں ڈوبی سادگی سے کہا۔ اس کی آنکھوں اور گالوں سے شرارت کی چمک جاتی رہی تھی اور وہ اسے ایسے دیکھ رہی تھی جیسے سیٹھ ایک لاوارث بچہ ہو۔

’’بہتر! اور تم کہاں۔ ۔ ۔ ‘‘ سیٹھ نے تھکے ہوئے لہجے میں بات شروع کر کے ادھوری چھوڑ دی۔ سیٹھ کے اندرسادہ، بے ضر سا بیدار ہوتا آدمی پھر کسی گہری نیند میں سو گیا تھا۔ وہ بائی کو ایسی نظر سے دیکھنے لگا جیسے وہ دیکھے جانے کی عادی تھی۔ بائی نے سیٹھ کے اندر کی نئی تبدیلی کو محسوس نہیں کیا۔ وہ اسے اپنی ہمدردی سے مالا مال کر دینا چاہتی تھی۔

’’اسی کمرے میں۔ میرے پاس روغن بادام ہے جوسر درد کو کھا جاتا ہے۔ میں آپ کے سر پر اس کی مالش کروں گی۔ ‘‘بائی کی آواز متوازی اور کسی تاثر سے خالی تھی؛ کسی کو چھا لیا لانے کا پیغام دینے کی طرح۔ سیٹھ نظر نیچے کیے بیٹھا رہا۔ وہ بائی کو اپنے تاثرات پر قابو پا لینے کا وقت دینا چاہتا تھا۔ وہ اس کے چہرے پر جوانی کی جلد بازی کی جگہ اس کے پیشے کی منافقت کو حاوی دیکھنا چاہتا تھا تا کہ اس نقاب میں سے وہ اصلی حالت دیکھ سکے۔ اس کے سر درد میں کمی آ گئی تھی، درد کی وجہ شاید بھوک ہی تھی اور بائی کی لائی ہوئی چند ٹھنڈی بوٹیوں نے اس کے معدے کو متحرک کرکے درد میں کمی کر دی تھی۔ اسے اچانک ڈیوڈ کا خیال آیا۔ اس نے اپنادل ایک لمحے کے لیے تیز دھڑکتے محسوس کیا، ایسے محسوس ہوا کہ اسے پسینہ آ گیا تھا لیکن در اصل پسینے کا ایک قطرہ بھی اس کے جسم پر نہیں تھا۔ اس نے سوچا کہ وہ ڈیوڈ سے اتنا خوف زدہ کیوں تھا؟ اس کا خاندان کئی نسلوں سے ان جنگلوں میں سے اپنے رزق نکالتا آیا تھااور ایک دم کوئی مہم جو اسے محروم نہیں کر سکتا تھا۔ سیٹھ نے آنکھیں اوپر کر کے کاروباری مذاکرات والی نظر سے بائی کے چہرے کی طرف دیکھا۔ اسے مایوسی کے ساتھ خوشی بھی ہوئی کہ بائی کے چہرے پر پریشانی بھری معصومیت تھی۔ اسے بائی کسیرہ بازار کی کسی بھی عورت کی طرح لگی؛ وہ تو اسے شکست دینا چاہتا تھا، شاید بائی اسے مات دے گئی۔

’’نہیں تم وہیں سونا،مالش کی بھی ضرورت نہیں ہے،میں اب ٹھیک ہوں۔ میں یہیں پڑا رہوں گا۔ ‘‘

’’نہیں! آپ وہاں سوئیں گے۔ ‘‘بائی نے کمرے کی طرف اشارہ کرتے ہوئے کہا۔ سیٹھ کے چہرے پر مسکراہٹ پھیل گئی، وہ مسکراہٹ اتنی بے ساختہ تھی کہ اس سے اس کی آنکھیں چندھیا گئیں۔ بائی کی آواز میں اپنائیت بھرا حکم تھا۔ سیٹھ اس کا ہاتھ اپنے ہاتھ میں لے کر اٹھا اور بائی کوبھی ساتھ ہی اٹھنا پڑا۔

صبح سیٹھ ابھی سو رہا تھا کہ بائی کی آنکھ کھل گئی۔ وہ ایک عرصے سے صبح جلدی جاگنے کی عادی تھی۔ وہ علیٰ الصباح اٹھنے کے بعد ریاض کرتی اور جب اس کے گھر والے ابھی گہری نیند میں ہوتے وہ دوبارہ سو جاتی۔ گجرانوالا آنے کے بعد وہ معمول کے مطابق صبح جاگ تو جاتی لیکن ریاض نہیں کر پا رہی تھی۔ اس نے رات سیٹھ کے پہلو میں گزاری تھی اور صبح اٹھتے ہی اس نے ملتان نا جانے کا فیصلہ کرکے اپنے دونوں سازندوں کو فارغ کر دینے کا طے کر لیا۔ وہ جانتی تھی کہ اس نے اپنے لیے ایک ایسے راستے کا انتخاب کیا ہے جس پر چل کے کوئی کبھی کامیاب نہیں ہوا۔ اس نے سوچاکہ وہ پہلے کون سی کامیاب ہے۔ اسے کسی وقت ملتان کے کسی مجاور یا جاگیر دار کی داشتہ بننا ہے تو کیوں نا سیٹھ دھنی رام کے ساتھ رہنا شروع کر دے؟ جو لوگ اس کے سر پرست ہونے کا دعویٰ کرتے تھے ان کے ٹھاٹھ اس کے ہی مرہونِ منت تھے اور وہ یہ بھی جانتی تھی کہ سیٹھ اتنا فراخ دل تھا کہ اگر وہ ا ن لوگوں کو ماہانہ خرچہ بھجوانا شروع کر دے تو انھیں شاید کوئی اعتراض نا ہو؛وہ صرف کچھ زیادہ کی ضد کریں گے لیکن وہ ایسا کرےگی نہیں۔

اس نے سازندوں کو بھیجنے سے پہلے سیٹھ سے مشورہ کرنا اور اسے اطلاع دینا ضروری جانا۔ وہ محسوس کر سکتی تھی کہ سیٹھ کو اس کی ضرورت ہے۔ کیا ایسے تو نہیں کہ ہر آدمی کو ایک مخصوص عورت کی ضرورت ہوتی ہے؟

وہ سیٹھ کے انتظار میں بیٹھ گئی! اسے وقت کبھی تھما ہوا اور کبھی تیز رفتار لگتا۔ وہ بے چین ضرور تھی لیکن اسے جلدی بھی نہیں تھی۔ اسے معلوم تھا کہ سیٹھ کے باہر نکلنے کا ایک ہی راستہ تھا سو وہ سیٹھ کے انتظار میں بیٹھی ہوئی تھی۔ سیٹھ کے آنے تک کا عرصہ اسے ایک عمر لگا۔ وہ عمروں کے متعلق کچھ بھی نہیں جانتی تھی؛ سوائے اس کے کہ وہ مرنا نہیں چاہتی تھی۔ وہ اپنے خیالوں میں گم اس کے انتظار میں بیٹھی رہی۔ سیٹھ جب آیا تو وہ کچھ شرمسار سا تھا۔ اس نے ایک نظر بائی کو دیکھ کر اس کی خوب صورتی سے اپنے ذہن کو سیراب کیا۔ سیٹھ نے ارد گرد تنقیدی نظر دوڑائی، اسے کچھ بھی بےترتیب نظر نا آیا۔ اس کے خیال میں رات کو دیر تک چلنے والی دعوت کے بعد ہر جگہ بے ترتیبی ہوگی۔ اسے حیرت ہوئی کہ سب کچھ معمول کے مطابق کیسے ہو گیا؟

’’کچھ کھایا؟ بھوک لگ رہی ہے!‘‘ سیٹھ نے بائی کے سامنے بیٹھتے ہوئے پوچھا۔ اسے احساس ہی نہیں تھا کہ وہ بھوکی ہے! اسے بھی اچانک بھوک کا شدید احساس ہونے لگا۔ وہ آہستہ سے اٹھی اور ایک نظر سیٹھ کے لباس پر ڈال کر باورچی خانے کو جانے والے دروازے کی طرف چل پڑی۔ سیٹھ دل چسپی سے اسے دیکھتا رہا۔ وہ جب واپس آئی تو سیٹھ ہلکا سا مسکرایا۔ اس مسکراہٹ میں کسی سوچ کا عکس تو نہیں تھا؛ بس ایک مسکراہٹ تھی جو انسان کو کسی جانور یا پرندے سے جدا کرتی ہے۔ بائی سیٹھ کے مصنوعی سکون میں ایک بےچینی محسوس کر سکتی تھی۔ اسے کچھ تکلیف بھی ہوئی کہ سیٹھ اس طرح کھچاؤ میں کیوں ہے؟

’’ایک بات کہنا چاہتی ہوں؟‘‘ سیٹھ کو اپنے سینے میں دل کی پھڑ پھڑاہٹ سی محسوس ہوئی۔ وہ خاموش اسے دیکھتا رہا۔ سیٹھ نے اثبات میں سر ہلا کراسے بات جاری رکھنے کا اشارہ کیا۔ بائی نے ایک لمبا سانس لیا۔ ’’آپ پتا نہیں کیا سوچیں؟ لیکن میں اب یہاں رہنا چاہتی ہوں۔ ‘‘ وہ تیزی سے یہ بات کر گئی اور پھر اسے احساس ہوا کہ وہ اپنی استادوں کے بتائے ہوئے طریقوں کی نفی کر گئی تھی۔ ’’اگر آپ ایسا چاہیں ؟‘‘

سیٹھ کے لیے یہ اتنا غیر متوقع تھا جتنا بائی کے ساتھ رات گزارنا۔ وہ اگر چاہتا تو ملتان میں بھی اس کے ساتھ رات گزار سکتا تھا لیکن وہ عورت کو جنس کے بجائے عورت ہی دیکھنا چاہتا تھا۔ رات کو جب بائی نے شب بسری کی پیش کش کی تو اس کا انکار کئی سوال پیدا کر سکتا تھا۔ بائی کی پیش کش سے وہ اتنا خوش ہوا کہ اسے اپنے سینے کی کوٹھری کی دیوراوں کے ساتھ دل کی ٹکریں محسوس ہوئیں۔ وہ خوف زدہ سا ہو گیا کہ یہ دل کے دورے کا پیش خیمہ نا ہو؟ اس نے محسوس کیا کہ اس کے چہرے کا رنگ گلابی ہو جائےگا جو اس کے مذاکراتی ذہن کی شکست تھی کیوں کہ بائی نے اس کے احساسات پڑھ جانے تھے۔ وہ اپنے تاثرات چھپانے کے لیے سر جھکاکر کھانسنے لگا اور اسی دوران میں اپنے دل کی دھڑکن پر قابو بھی پا گیا۔ اب اس نے نظر اٹھاکر بائی کی طرف ایسے دیکھا کہ وہ اپنی بات جاری رکھے، ’’آپ یہاں دعوتیں کیا کریں اور میں ان میں آپ کے ساتھ مہمان دار ہوں گی۔ ‘‘ وہ رکی۔ سیٹھ کے ذہن میں خیالات کا سلسلہ گلی میں سے روشن دان کے راستے سے آتے ہوئے سایوں کی طرح چل نکلا۔ یہ پہلے کبھی نہیں ہوا تھا کہ کسی ہندوستانی کے گھر کی دعوت میں کوئی عورت مہمانوں کی دیکھ بھال میں مصروف ہو۔ یہ نا صرف اس کے وقار میں اضافے کا سبب ہوگا اس کے کاروبار کو بھی ترقی ملےگی۔ وہ، بائی کو اس کمرے میں مہمانوں کے ہجوم میں بظاہر فارغ، لیکن دراصل، مصروف دیکھ سکتا تھا۔

’’تمھارے گھر والے۔ ۔ ۔ ؟‘‘ سیٹھ نے جھجکنے کا لہجہ اپناتے ہوئے پوچھا۔

بائی کے چہرے پر کوئی تاثر نہیں تھا، سیٹھ اس کی آنکھوں میں ایک لاتعلقی سی دیکھ سکتا تھا۔ وہ دل چسپی سے بائی کے چہرے کو دیکھتے ہوئے اس کی بات کے انتظار میں تھا۔ ’’میرے گھر والوں کو کیا۔ ۔ ۔ ؟‘‘ اس نے طنزاً کہا۔

سیٹھ کو بائی کا اور اپنا یہ مکالمہ ایک ناٹک سا لگا۔ دونوں جانتے تھے کہ وہ کیا کہنا چاہتے ہیں اورایک دوسرے سے کیوں چھپا رہے ہیں؟ سیٹھ نے اس ناٹک کو جاری رکھنے کا فیصلہ کیا۔ اسی وقت دو خادم تھالوں پر ناشتہ رکھ کر لے آئے۔ چھوٹی چھوٹی رکابیوں میں بھنا ہوا گوشت، سبزی کی بھجیا، تانبے کے گلاسوں میں دودھ اور لسی تھے۔ ’’سیٹھ جی! مجھے تو اپنے دھرم کا کچھ پتا نہیں لیکن آپ ہندو ہیں اور یہ سب کھاتے ہیں۔ ‘‘ بائی نے گوشت والے مصالحے کو تنور کے پراٹھے کے نوالے سے لگا کرمنہ میں ڈالتے ہوئے کہا۔